Epanọ Ma Sai ro Wo Onaa Ziezi Evaọ Usiuwoma Ota—Fi Obọ Họ kẹ Oniọvo nọ Wha Gbẹ Rrọ Usiuwoma

Oware nọ U ro Wuzou: Jesu ọ riẹ nọ u woma re imava e jọ usu evaọ usiuwoma. Fikiere, nọ o je vi ilele nọ i bu te 70 kpohọ usiuwoma, ọ ghale rai imimava. (Luk 10:1) Otẹrọnọ a nọ oniọvo jọ onọ nọ o bẹ riẹ ẹza hayo ọ gwọlọ obufihọ ofa, oniọvo ọdekọ na ọ rẹ sai fi obọ họ kẹe. (Ọtausi. 4:9, 10) Ọ rẹ sae ta kpahe onaa nọ o ro ruiruo no evaọ usiuwoma, yọ evaọ ẹsejọ ọ rẹ sae fodẹ oware nọ u re fi obọ họ kẹ ọrivẹ riẹ na wo onaa ziezi. (Itẹ 27:17) Nọ wha tẹ rrọ edhere evaọ usiuwoma, oghẹrẹ ẹme nọ whọ be ta o rẹ bọ oniọvo nọ wha gbẹ rrọ usu na ga re.—Fil. 4:8.