Tha Ohwo nọ Wha gbe Kpohọ Usiuwoma Uke
1. Irere vẹ i re noi ze nọ imava i te kuomagbe kpohọ usiuwoma?
1 Okejọ Jesu o vi ilele 70 riẹ kpohọ usiuwoma ota yọ o ‘vi rai imimava.’ (Luk 10:1) Ababọ avro, onana u ru nọ ilele riẹ a ro fi obọ họ jẹ tuduhọ ohwohwo awọ evaọ iruo usiuwoma ota na. Nọ ma tẹ rọ usiuwoma kugbe owhowho-uvie ọfa, ẹvẹ ma sae rọ thae uke?
2. Nọ ohwo nọ ma gbẹ rrọ usu ọ tẹ be ta usiuwoma, fikieme ma jẹ gaviezọ, kọ ẹvẹ ma sai ro ru ere?
2 Ẹkwoma Ezọgaviẹ: Gaviezọ ziezi nọ ohwo nọ wha gbẹ rrọ usu ọ tẹ be ta usiuwoma. (Jem. 1:19) O te bi se Ebaibol, rri ọra lele iei. Rri ọnọ ọ be ta ẹme na, o tẹ make rọnọ ohwo nọ wha gbẹ rrọ usu na hayo ohwo nọ wha di họ uwou na. Whọ tẹ be gaviezọ ziezi kẹ ẹme na, o sae lẹliẹ ohwo nọ wha be ta usiuwoma kẹ na gaviezọ re.
3. Okevẹ ohwo nọ ma gbe kpohọ usiuwoma ọ sae rọ gwọlọ obufihọ mai?
3 Muẹrohọ Okenọ Who re ro Dhunu họ Ẹme Na: Nọ ohwo nọ ma gbe kpohọ usiuwoma ọ tẹ be t’ẹme, ma rẹ kẹe uvẹ re ọ t’ẹme na. (Rom 12:10) Ma re mu dhunu họ ẹme na ha. Otẹrọnọ ẹme nọ ọ gwọlọ ta o thọrọ e riẹ ẹro, hayo ọnọ ọ be ta ẹme kẹ na ọ be vravro hayo ọ nọ onọ jọ, yọ ọrivẹ mai ọ gwọlọ ọkpahefihọ mai, ma rẹ daoma re ma fiba ẹme na orọnikọ ma re mu ẹme ọkpokpọ họ họ. (Itẹ 16:23; Ọtausi. 3:1, 7) Ẹme kpobi nọ ma be kpahe o rẹ rọwokugbe ẹme nọ oniọvo na ọ be ta.—1 Kọr. 14:8.
4. Eme u ti fiba oghọghọ gbe obokparọ mai evaọ odibọgba na?
4 Nọ ilele 70 a zihe no usiuwoma ota rai ze, a “ghọghọ ziheze.” (Luk 10:17) Ere ọvona ma ti wo oghọghọ gbe obokparọ evaọ odibọgba na nọ ma be gaviezọ je muẹrohọ okenọ ma re ro dhunu họ ẹme nọ ohwo nọ ma gbe kpohọ usiuwoma ọ be ta.