“Wha Hẹ Kẹ Uyere”
1 Nọ Jesu o siwi emoti ikpe, omọvo ọ jọ usu rai zihe ze ti yere Jesu. Jesu ọ nọ riẹ nọ: ‘Kọ ogbẹrọnọ ikpe e fo? Rekọ izii erọ?’ (Luk 17:11-19) U wuzou gaga re ma dhesẹ ovuhumuo kẹ okẹ uwoma avọ okẹ nọ o gba kiete kpobi nọ Jihova Ọghẹnẹ, Ọsẹ oyoyou obọ odhiwu mai nọ ọ rẹ kẹ okẹ ziezi na ọ kẹ omai!—Kọl. 3:15; Jem. 1:17.
2 Eware jọ vẹ u fo nọ ma rẹ rọ fiki rai yere Ọghẹnẹ? Ma re yere Ọghẹnẹ fiki ẹtanigbo na, okẹ nọ o mae rro nọ Ọghẹnẹ ọ kẹ ahwo-akpọ. (Jọn 3:16) Ma re je yere Jihova fikinọ o si omai kẹle omariẹ. (Jọn 6:44) Okugbe nọ ma wo evaọ ukoko Ileleikristi na yọ oware ofa jọ nọ ma rẹ rọ fiki riẹ kẹ uyere re. (Ol. 133:1-3) Ababọ avro, whọ sai roro te ekẹ efa nọ Jihova ọ kẹ omai no. Ma gwọlọ ru wọhọ emọ Izrẹl he, enọ eware iwoma nọ Jihova o ru kẹ ai e thọrọ ẹro!—Ol. 106:12, 13.
3 Dhesẹ Ovuhumuo Ra Via: Dede nọ oware nọ Jesu o ru kẹ emoti ikpe na o were rai, ọvo rai ọvo o dhesẹ edẹro riẹ via. (Luk 17:15) Ere ọvona, ma re dhesẹ edẹro mai via ẹkwoma ọwhọ nọ ma re ro wobọ evaọ odibọgba na. Ma te gine wo edẹro kẹ eware kpobi nọ Ọsẹ oyoyou obọ odhiwu mai o ru kẹ omai no, udu mai o rẹ wọ omai raro kele uyoyou gbe ẹzi ọghọruo riẹ ẹkwoma ẹme nọ ma rẹ ta kpahe iẹe kẹ amọfa. (Luk 6:45) Nọ ma be vuẹ amọfa kpahe iruo igbunu Jihova gbe emamọ ẹjiroro nọ o wo kẹ omai na, edẹro nọ ma wo kẹ ewoma riẹ gbe uyoyou mai kẹ Jihova e vẹ te rro.—Ol. 40:5.
4 Fiobọhọ kẹ Amọfa Wo Ovuhumuo: Ma rẹ daoma gwọlọ oghẹrẹ nọ ma re ro fiobọhọ kẹ emọ mai gbe emọ-uwuhrẹ Ebaibol mai re a wo ovuhumuo. Esẹgbini a wo uvẹ sa-sa nọ a sai ro ru onana, uvẹ jọ họ nọ a tẹ be ta kẹ emọ rai kpahe eware nọ Jihova ọ ma. (Rom 1:20) Nọ ma te bi wuhrẹ obe kugbe ọmọ-uwuhrẹ Ebaibol mai, ma sae nọe inọ, “Eme onana u wuhrẹ omai kpahe oghẹrẹ ohwo nọ Jihova ọ rrọ?” Nọ ovuhumuo ọmọ-uwuhrẹ na ọ be rro na, ere ọvona uyoyou riẹ kẹ Ọghẹnẹ gbe ọtamuo riẹ re o ru eva were iẹe e te rro.
5 Evaọ edẹ urere nana, ahwo buobu a wo ẹzi edẹro gbe uyere he. (2 Tim. 3:1, 2) O rẹ ginẹ were Jihova eva gaga nọ ọ be ruẹ idibo riẹ nọ i bi dhesẹ edẹro rai via ẹkwoma ọwhọ nọ a bi ro wobọ evaọ odibọgba na!—Jem. 1:22-25.