Hai Wo Ẹnyaharo Evaọ Odibọgba Na
1 O rẹ were Ọsẹ obọ odhiwu mai nọ idibo riẹ i te bi wo ẹnyaharo abọ-ẹzi. Abọjọ ẹnyaharo yena họ oma nọ ma rẹ dawo re ma wo ona ziezi evaọ iruo usiuwoma ota na. Pọl ọ ta udu họ Timoti awọ inọ ọ hae rọ oma kẹ uwuhrẹ ẹsikpobi re ahwo kpobi a ruẹ ẹnyaharo riẹ. (1 Tim. 4:13-15) Mai kpobi ma rẹ gbẹ daoma wo ẹnyaharo ziezi evaọ ona usiuwoma ota mai, makọ te omai nọ ma rrọ iwhowho-uvie kri no.
2 Fi Itee Họ kẹ Oma Ra: Re ma wo ẹnyaharo, o gwọlọ nọ ma re fi itee họ kẹ oma mai. Itee jọ vẹ ma rẹ sai fihọ kẹ oma mai? Ma rẹ sae daoma re ma ruẹ nọ ma riẹ ona sa-sa nọ ma sae rọ rehọ Ebaibol na ruiruo. (Ẹf. 6:17) Ẹsejọhọ u wo abọjọ iruo odibọgba na nọ o gwọlọ nọ ma re jo wo ẹnyaharo, wọhọ usiuwoma ota evaọ iyẹrẹ, usiuwoma ota ẹkwoma ifonu, hayo evaọ oria ekiọthuọ. O sae jọnọ o gwọlọ re ma daoma epanọ ma re gbe ro wo ẹnyaharo evaọ eru izihebro. Obọdẹ utee ofa o sae jọ epanọ ma re ro wo ẹnyaharo evaọ ona nọ ma rẹ rọ tuọ ebe-iwuhrẹ Ebaibol họ je ru uwuhrẹ na.
3 Eruẹrẹfihotọ nọ I re Fiobọhọ kẹ Omai: A ruẹrẹ iwuhrẹ ukoko na họ, maero Isukulu Odibọgba Esuo-Ọghẹnẹ gbe Ewuhrẹ Odibọgba na, re i fiobọhọ kẹ omai wo ẹnyaharo wọhọ etausiuwoma. Epanọ ma be daoma te ruẹrẹ oma kpahe kẹ je kpohọ iwuhrẹ nana, je fi eware nọ ma wuhrẹ họ iruo, ere erere nọ ma re wo no ai ze ọ rẹ rro te.—2 Kọr. 9:6.
4 O gwọlọ nọ ma re fiobọhọ kẹ ohwohwo re. (Itẹ 27:17) Ma tẹ be hai gaviezọ ziezi kẹ oghẹrẹ nọ inievo nọ ma gbẹ rrọ usiuwoma a be rọ ta usiuwoma u re fiobọhọ kẹ omai wo ẹnyaharo. U te no ere no, owuhrẹ utu obe uwuhrẹ ukoko mai ọ rẹ sai ru ọruẹrẹfihotọ jọ nọ a re ro fiobọhọ kẹ omai. O rrọ oghale ulogbo re ọkobaro nọ o wo ona ziezi hayo owhowho-uvie ọfa jọ o fiobọhọ kẹ omai wo ona ziezi nọ u re ru nọ ma je wo evawere ziezi evaọ odibọgba na! Kọ wha jọ utu obe uwuhrẹ ukoko rai wo owhowho-uvie ọkpokpọ jọ? Whọ sae ta kẹe inọ o kuomagbe owhẹ kpohọ usiuwoma ota.
5 Iruo odibọgba na họ iruo nọ e mai wuzou kpaobọ nọ ma bi ru nẹnẹ na. Nọ ma be rehọ “okẹ iwẹegọ ejiro” kẹ Jihova na, ma gwọlọ rehọ ẹgba mai kpobi ro ru ei. (Hib. 13:15) Ma tẹ be daoma wo ẹnyaharo evaọ odibọgba na, ma te jọ iruiruo nọ a “jẹrehọ no, obọ aro Ọghẹnẹ” enọ e “kare omaovuọ, nọ [e] rẹ yọrọ ẹme uzẹme na ziezi.”—2 Tim. 2:15.