Sasa Enọ E Rrọ Uweri Oma
1. Fikieme ahwo nọ ohwo o whu ku a rọ gwọlọ omosasọ?
1 O rẹ da gaga nọ ohwo nọ ma you o te whu, yọ rọkẹ ahwo nọ a wo ẹruore Uvie na ha edada na e rẹ ga w’umuo ho. (1 Tẹs. 4:13) Ahwo buobu a rẹ nọ inọ: ‘Fikieme ahwo a bi ro whu? Bovẹ ahwo nọ a whu a re kpohọ? Kọ mẹ sae te wariẹ ruẹ oyoyou mẹ nọ o whu no?’ Whọ rẹ jọ obotọ na ruẹ idhere jọ nọ ma sae rọ sasa ahwo nọ ma jọ usiuwoma nyaku nọ ohwo o whu ku oma.—Aiz. 61:2.
2. Nọ ohwo nọ ma nyaku ọ tẹ ta kẹ omai inọ ohwo o whu ku ei, kọ ẹsikpobi u re fo re ma ta usiuwoma kẹe evaọ oke thethei?
2 No Ẹthẹ ruọ Ẹthẹ: Ohwo nọ ma jọ usiuwoma nyaku ọ sae vuẹ omai inọ ohwo uviuwou riẹ jọ o whu. Kọ ma ruẹ nọ uweri o da riẹ oma fia? Kọ ahwo nọ a rrọ uweri a vọ uwou na? Evaọ uyero utioye na, orọnikọ ẹsikpobi u re woma re whọ jọ etẹe ta usiuwoma thethei hi. (Ọtausi. 3:1, 7) Ma sae ta eme nọ i re dhesẹ nọ ma weri kẹe, rehọ omobe-ovẹvẹ, emagazini, hayo ibroshọ nọ u fo uyero na kẹe, ma vẹ ta kẹe inọ ma te ruẹro ẹdẹfa. Ma vẹ wariẹ zihe evaọ oke ofa nọ u kiehọ re ma gbẹ rehọ Ebaibol na sasa iẹe oma.
3. Otẹrọnọ uyero na o k’uvẹ riẹ, ikere vẹ ma sai ro lele ohwo nọ ọ rrọ uweri t’ẹme?
3 Evaọ uyero ofa jọ, ma rẹ sae ruẹ inọ ma sai lele ohwo na t’ẹme thei omojọ evaọ iweze ọsosuọ na. Dedenọ onana o rrọ oke nọ ma rẹ rọ kpọ eriwo ọthọthọ ohwo na vi hi, ma rẹ sai se eyaa Ebaibol kpahe ẹkparomatha na kẹe. (Jọn 5:28, 29) Hayo ma sai dhesẹ oware nọ Ebaibol na e ta kpahe ahwo nọ a whu no kẹe. (Ọtausi. 9:5, 10) Ikuigbe ẹkparomatha jọ nọ e rrọ Ebaibol na o sae kẹe omosasọ. (Jọn 11:39-44) Oware ofa nọ ma rẹ sai ru họ, re ma dhesẹ eme Job nọ i dhesẹ ẹruore nọ o wo kpahe Jihova kẹe. (Job 14:14, 15) Re ma tẹ nyase iẹe ba, ma sae kẹe ibroshọ Eme Ọ rẹ Via k’Omai Okenọ Ma te Whu?, Okenọ Ohwo nọ Who You O te Whu, hayo omobe-ovẹvẹ hayo ibroshọ ọfa nọ u kiehọ. Hayo ma sae kẹe obe Ebaibol Wuhrẹ na, dhesẹ oware nọ o rrọ uzou avọ 6 kẹe, je ru ọruẹrẹfihotọ nọ ma re ro zihe oke ofa re ma gbẹ ta ẹme na haro.
4. Oke ofa vẹ ma sae rọ kẹ omosasọ?
4 Eva Iyero Efa: Otẹrọnọ a be jọ obọ Ọgwa Uvie kẹ ovuẹ uwhori, kọ ahwo nọ a rrọ ukoko ho a te jariẹ? A sae ghale ebe mai nọ e rẹ kẹ ahwo nọ a rrọ uweri omosasọ rọ kẹ ai. Evaọ ẹsejọ, uwhu ohwo nọ a rẹ jọ ebe-usi whowho u rovie uvẹ fihọ no nọ Isẹri Jihova jọ a ro kere ileta omosasọ okpẹkpẹe se ahwo uviuwou ohwo nọ o whu na. Evaọ ojọ nọ o via, nọ ileta nọ a fi emebe-evẹvẹ ukoko na jọ kugbe i te ọzae jọ nọ aye riẹ o whu obọ, tei te ọmọtẹ riẹ a te kpobọ uwou owhowho-uvie nọ o kere ileta na, ọ tẹ nọe nọ: “Kọ whai họ ahwo nọ a kere ileta nana se omẹ na? Mẹ gwọlọ gbẹ riẹ kpahe Ebaibol na!” Ọzae na avọ ọmọtẹ riẹ a tẹ rọwo nọ a wuhrẹ Ebaibol kugbe ai, a te je mu iwuhrẹ ukoko na họ ẹnyaze.
5. Fikieme u ro fo re ma fiẹrohotọ kẹ uvẹ nọ ma sae rọ sasa ahwo nọ a bi weri oma?
5 Ọtausiuwoma Na 7:2 o ta nọ: “Uwoma re a kpo obọ uwou uweri vi ikpe nọ a re kpo obọ uwou eha.” Ohwo nọ ọ rrọ uweri ọ rẹ mae gaviezọ kẹ Ẹme Ọghẹnẹ vi enọ isiuru rae e rrọ re a re jẹ da ọvo. Jọ omai kpobi ma fiẹrohotọ kẹ uvẹ nọ ma sae rọ sasa ahwo nọ a bi weri fiki ohwo nọ o whu ku ai oma.