Ileta Nọ I No Obọ Uwou Ogha Ze

Iwhowho-Uvie Eghaghae:

Owhowhovia jọ nọ a ru kẹ uviuwou Ebẹtẹle ọ United States evaọ okenọ a kuomagbe re a se ese okpẹdẹ na evaọ ohiohiẹ February 4, 2008, o lẹliẹ e rae tehe abọ avọ oghọghọ. Owhowhovia na họ: “Esẹro ukoko a no ikoko sasa nọ e rrọ orẹwho United States ze anwọ urere oka nọ o vrẹ na. A rrọ Patterson enẹna kẹ eklase ọsosuọ ọrọ Isukulu nọ a re jo wuhrẹ Ekpako Ukoko.”

Ekpako ukoko yena a reawere usu ọbọga kugbe uviuwou Ebẹtẹle na. A je kuomagbe uviuwou Ebẹtẹle na k’ohiohiẹ k’ohiohiẹ kẹ ese okpẹdẹ na, gbe Uwuhrẹ ọ Uwou-Eroro na evaọ owọwọ Ẹdọvo-Oka. Evaọ ẹdẹ urere isukulu na, omọvo Ogbẹgwae Uwou Ogha ọ United States gbe omọvo Ugboma Esuo ukoko na a kẹ evuẹ obọdẹ jọ kpahe eware nọ o gwọlọ nọ ekpako na a rẹ mai muẹrohọ.

Ekpako nọ i kpohọ isukulu na a kere eme uyere buobu ro dhesẹ edẹro rai se uwou ogha yena no. Ọkpako jọ ọ ta nọ: “Oka ọvo nọ mẹ rria Ebẹtẹle na o bọ omẹ ga ziezi!” Ọfa jọ o kere nọ: “Enẹna, me wo ajọwha vrẹ epaọ ọsosuọ no nọ mẹ sae rọ wha ewha-iruo mẹ haro evaọ ukoko na.” Omaa isukulu nana nọ ma be nya lele obọnana u wo abọ sa-sa orọ ewha-iruo esẹro ukoko, yọ onana u ti fiobọhọ kẹ ae nọ a sae rọ nyate ẹgwọlọ ukoko rai ziezi.—Iruẹru 20:28.

Isukulu nana e re jọ Nigeria muhọ họ, rekọ ma te kẹ owhai evuẹ kpahe onana otẹrọnọ ma ru ọruẹrẹfihotọ nana no. Eva e be were omai fiki ọruẹrẹfihotọ isukulu na, yọ ma bi rẹro okenọ i ti ro muhọ evaọ Nigeria.

Inievo rai,

Uwou Ogha Nigeria