Ma Wo Efe Ọghaghae nọ Ma rẹ Ghale kẹ Ahwo
1 Obọdẹ iwuhrẹ e vọ Ebaibol na nọ ma rri ghaghae. (Ol. 12:6; 119:11, 14) Okejọ o jariẹ nọ Jesu ọ rehọ etadhesẹ rọ ta ẹme kpahe abọ sa-sa ọrọ Uvie na, kẹsena ọ tẹ nọ ilele riẹ nọ: “Wha riẹ otọ eme enana kpobi?” Nọ a kuyo nọ Ee, ọ tẹ ta kẹ ae nọ: “Fikiere kohwo okere-obe kohwo okere-obe nọ a wuhrẹ fiki uvie odhiwu ọ wọhọ ọ nọ o wo ighẹ nọ ọ rehọ eware no efe riẹ ze, eware ekpokpọ gbe erọ anwae.”—Mat. 13:1-52.
2 Eriariẹ Ebaibol nọ ma wo nọ ma mu Ẹme Ọghẹnẹ họ ewuhrẹ obọ a sai rri rai wọhọ efe anwae. Rekọ ẹkwoma uwuhrẹ omobọ mai nọ ma be jọ wuhrẹ kpahe eware ididi Ọghẹnẹ kẹse kẹse, ma be jọ Ebaibol na se ku eware nọ ma riẹ vẹre he, nọ e wọhọ efe ọkpokpọ k’omai. (1 Kọr. 2:7) Ofariẹ, ma be rọ ẹkwoma ‘odibo nọ o wo ẹrọwọ avọ areghẹ na’ wo otoriẹ eware ekpokpọ.—Mat. 24:45.
3 Ma rri eriariẹ hayo efe abọ-ẹzi nana ghaghae gaga. Onana o lẹliẹ omai wo ọwhọ kẹ uwuhrẹ re ma wo onaa wọhọ iwuhrẹ Ẹme Ọghẹnẹ, jẹ be wọ omai wuhrẹ amọfa eware eghaghae nọ ma jọ Ebaibol wuhrẹ no.
4 Wuhrẹ no Oriruo Jesu Ze: Fikinọ Jesu o rri uzẹme Ẹme Ọghẹnẹ ghaghae, ọ dao ẹgba riẹ kpobi ro wuhrẹ amọfa ẹme Ọghẹnẹ. Makọ okenọ oma o rọe no, o seri ahwo wuhrẹ họ họ.—Jọn 4:6-14.
5 Uyoyou nọ Jesu o wo kẹ enọ i wo eriariẹ Ọghẹnẹ hẹ o wọ riẹ je wuhrẹ ai uzẹme nọ u re su kpohọ uzuazọ. (Ol. 72:13) Ohrọ ahwo nọ ohọo abọ-ẹzi u je kpe o re riẹ, o te “mu ai eware buobu họ ewuhrẹ.”—Mak 6:34.
6 Rọ Aro Kele Jesu: Nọ ma te rri eriariẹ Ẹme Ọghẹnẹ nọ ma wo ghaghae, ma ti wo ọwhọ nọ ma re ro wuhrẹ amọfa iwuhrẹ eghaghae nọ e rrọ Ebaibol na wọhọ epanọ Jesu o ru. (Itẹ 2:1-5) Dede nọ oma o rẹ sae rrọ omai ẹsejọ, ma te ruabọhọ wuhrẹ amọfa no Ebaibol na ze avọ ajọwha. (Mak 6:34) Ovuhumuo odidi nọ ma wo kẹ efe abọ-ẹzi mai o rẹ wọ omai roma kẹ iruo odibọgba na, daoma ẹsikpobi re ma ru ẹkabọ mai vọvọ.