W’obọ Evaọ Oghọghọ Ẹkẹ!
“Ẹkẹ oghale o mae rọ vi emio.”—IRUẸRU 20:35.
1. Ẹvẹ Jihova o bi ro dhesẹ oghọghọ ẹkẹ?
OGHỌGHỌ ẹriẹ uzẹme na gbe eghale nọ i re noi ze yọ ekẹ eghaghae n’obọ Ọghẹnẹ ze. Ahwo nọ e riẹ Jihova no a wo ẹjiroro buobu nọ a rẹ rọ ghọghọ. Rekọ nọ oghọghọ o rọ emio okẹ na, oghọghọ o rọ ẹkẹ re. Jihova họ Ọkokẹ ọ “kokẹ uwoma kokẹ uwoma avọ okẹ nọ o gba kiete kpobi,” yọ ọye họ ‘Ọghẹnẹ evawere na.’ (Jemis 1:17; 1 Timoti 1:11) Ọ rẹ kẹ ohwo kpobi nọ ọ rẹ gaviezọ iwuhrẹ omokpokpọ, yọ ọ rẹ wereva kpahe ẹmeoyo enọ o bi wuhrẹ, wọhọ epanọ esẹ gbe ini a rẹ ghọghọ evaọ okenọ emọ rai e tẹ j’owọ kẹ uthubro uyoyou na.—Itẹ 27:11.
2. (a) Eme Jesu ọ ta kpahe ẹkẹ? (b) Didi evawere ma re wo evaọ okenọ ma te wuhrẹ amọfa uzẹme Ebaibol?
2 Epọvo na re, okenọ ọ jọ otọakpọ Jesu ọ wereva nọ ọ ruẹ ahwo nọ a be jẹ emamọ owọ kẹ ewuhrẹ riẹ. Pọl ukọ na ọ wariẹ eme ọ Jesu inọ: “Ẹkẹ oghale o mae rọ vi emio.” (Iruẹru 20:35) Evawere nọ ma re wo evaọ okenọ ma te wuhrẹ amọfa uzẹme Ebaibol na orọnikọ evevọwẹ inọ ma ru ohwo jọ rọwo kugbe erọwọ egagọ mai ọvo ho. Rro vi oyena, o rọ oghọghọ ẹriẹ inọ ma be kẹ oware nọ u wo uvi aghare nọ o rẹ tọ. Ẹkwoma ẹkẹ evaọ abọ-ẹzi, ma rẹ sai fiobọhọ kẹ ahwo wo erere k’omobọ rai enẹna gbe ebẹdẹ bẹdẹ.—1 Timoti 4:8.
Ẹkẹ Ọ rẹ Wha Oghọghọ Ze
3. (a) Ẹvẹ Pọl gbe Jọn ikọ na a ro dhesẹ oghọghọ rai evaọ obufihọ kẹ amọfa evaọ abọ-ẹzi? (b) Fikieme uzẹme Ebaibol nọ ma rẹ rọ kẹ emọ mai o rọ rrọ odhesẹvia uyoyou?
3 Ẹhẹ, wọhọ epanọ Jihova gbe Jesu a rẹ ghọghọ evaọ ẹkẹ ekẹ abọ-ẹzi na, Ileleikristi a rẹ ghọghọ re. Pọl ukọ na ọ ruẹ oghọghọ evaọ ẹriẹ inọ o fiobọhọ kẹ amọfa wuhrẹ uzẹme Ẹme Ọghẹnẹ no. O kere se ukoko nọ o jọ obọ Tẹsalonika inọ: “Kọ eme họ ẹruore mai, hayo oghọghọ hayo etu-uvie nọ ma te rọ yoma eva obaro Ọnowo mai Jesu oke ẹtha riẹ? Ogbẹrọnọ kọ owhai? Keme whai họ oro gbe aghọghọ mai.” (1 Ahwo Tẹsalonika 2:19, 20) Evaọ oghẹrẹ ovona Jọn ukọ na, nọ ọ jẹ ta kpahe emọ abọ-ẹzi riẹ, o kere nọ: “Evawere nọ me wo vi onana o rọ họ, re me yo nọ emọ mẹ e rọ kpahe uzẹme na.” (3 Jọn 4) Je roro kpahe oghọghọ nọ o rrọ obufihọ kẹ emọ obọ mai re a zihe ro emọ abọ-ẹzi! Ẹyọrọ emọ evaọ ‘ọwhọkuo gbe ọkpọvio-iroro ọ Jihova’ yọ odhesẹvia uyoyou orọ esẹ gbe ini. (Ahwo Ẹfẹsọs 6:4) Eyewọ a rẹ rehọ ere dhesẹ nnọ a wo ọdawẹ kpahe ewoma ebẹdẹ bẹdẹ emọ rai. Okenọ a tẹ j’owọ, esẹ gbe ini a rẹ ruẹ oghọghọ ulogbo gbe evevọwẹ.
4. Didi oware nọ o via u dhesẹ oghọghọ ẹkẹ abọ-ẹzi?
4 Dell yọ ọgbodibo ọkobaro oke-kpobi, ọ tẹ jẹ rọ oni emọ isoi. Ọ ta nnọ: “Mẹ rẹ sai wo otoriẹ eme ọ Jọn ukọ na ziezi keme mẹ vọ avọ uyere inọ emọ ene mẹ e be ‘nya evaọ uzẹme na.’ Mẹ riẹ nọ o rẹ wha ọghọ gbe orro se Jihova evaọ okenọ iviuwou i te kuomagbe evaọ egagọ uzẹme, fikiere me wo evevọwẹ ididi evaọ ẹruẹ oghale riẹ evaọ omodawọ mẹ re mẹ bọ uzẹme na fihọ emọ mẹ. Emamọ Irẹro ọ uzuazọ ebẹdẹ bẹdẹ evaọ Aparadase kugbe uviuwou mẹ o be k’omẹ ẹruore gbe ọwhọ re me thihakọ ghelọ ebẹbẹ gbe ezadhe.” U yoma gaga, a si ọmọtẹ Dell jọ no ukoko fiki ele edhere nọ o mukpahe ọrọ Oleleikristi. Ghele na, Dell o bi ruiruo gaga re ọ yọrọ eriwo ọliọliọ. Ọ ta nọ: “Me rẹro inọ ẹdẹjọ ọmọtẹ mẹ o ti zihe bru Jihova ze avọ omarokpotọ gbe oruọzewọ. Rekọ me yere Ọghẹnẹ inọ emọ mẹ jọ a gbẹ be gọe avọ ẹrọwọ. Oghọghọ nọ mẹ ruẹ no o rrọ uvi ehri ogaga k’omẹ.”—Nehemaya 8:10.
Ewo Egbẹnyusu Ebẹdẹ Bẹdẹ
5. Nọ ma be daoma mai evaọ iruo ilele-iruo na, didi eriariẹ e rẹ k’omai evevọwẹ?
5 Jesu ọ ta kẹ ilele riẹ inọ a ru ilele nọ e rẹ jọ Ileleikristi jẹ wuhrẹ ai kpahe Jihova gbe itee riẹ. (Matiu 28:19, 20) Te Jihova gbe Jesu a rehọ ababọ-oriobọ fiobọhọ kẹ ahwo no re a wuhrẹ edhere uzẹme na. Fikiere nọ ma be daoma mai evaọ iruo ilele-iruo na, ma wo evevọwẹ ọrọ ẹriẹ inọ ma be raro kele oriruo Jihova gbe Jesu, wọhọ epanọ Ileleikristi ọsosuọ na a ru. (1 Ahwo Kọrint 11:1) Okenọ ma te ruiruo kugbe Ọghẹnẹ Erumeru na gbe Ọmọ oyoyou riẹ, izuazọ mai i re wo uvi otofa. Ẹvẹ oghale riẹ o rro te re a kele omai gbe ‘ibe iruiruo’ Ọghẹnẹ! (1 Ahwo Kọrint 3:9) Kọ o gbẹ rọ oware oghọghọ inọ makọ enjẹle a bi w’obọ evaọ iruẹru ewhowho emamọ usi nana?—Eviavia 14:6, 7.
6. Nọ ma bi w’obọ evaọ ẹkẹ abọ-ẹzi na, amono a rẹ jọ egbẹnyusu mai?
6 Evaọ uzẹme, ẹkwoma abọ-owo evaọ iruo ẹkẹ abọ-ẹzi nana, orọnọ ibe iruiruo kugbe Ọghẹnẹ ọvo ma rẹ sae jọ họ—ma rẹ sae ruọ usu ebẹdẹ bẹdẹ kugbei. Fiki ẹrọwọ riẹ, a se Abraham ogbẹnyusu Jihova. (Jemis 2:23) Nọ ma be daoma re ma ru oreva Ọghẹnẹ na, ma rẹ sae jọ egbẹnyusu Ọghẹnẹ re. Ma te ru ere, ma rẹ sae jẹ jọ egbẹnyusu Jesu. Ọ ta kẹ ilele riẹ inọ: “Me se owhai ezọ, keme eware kpobi nọ mẹ jọ obọ Ọsẹ mẹ yo, eye mẹ jẹ owhai riẹ.” (Jọn 15:15) O rẹ kẹ ahwo buobu oghọghọ re a dhesẹ ai wọhọ egbẹnyusu ikpahwo hayo isu ikpehru, rekọ a rẹ sai se omai egbẹnyusu imava nọ e mai kpehru kpobi evaọ ehrugbakpọ na!
7. (a) Ẹvẹ aye jọ o ro wo uvi ogbẹnyusu? (b) Kọ oghẹrẹ oware utioye na o via kẹ owhẹ no?
7 Ofariẹ, okenọ ma te fiobọhọ kẹ ahwo re a nyaze te riẹ Ọghẹnẹ, a re zihe ro egbẹnyusu mai re, nọ o rẹ k’omai evawere obọdẹ. Joan, ọnọ ọ be rria obọ United States, o mu Ebaibol na họ ewuhrẹ kugbe aye jọ nọ a re se Thelma. Dede nọ Thelma ọ rẹriẹ aro ku ọwọsuọ uviuwou fiki uwuhrẹ riẹ, o thihakọ ọ tẹ họ-ame evaọ ukpe ovo nọ u lele i rie. Joan o kere inọ: “Usu mai u kuhọ evaọ etẹe he; ukpoye, o rro zihe ro usu nọ o tọ te oware wọhọ ikpe 35 no enẹna. Ẹsibuobu ma re kpohọ usiuwoma gbe ikokohọ kugbe. Uwhremu na, mẹ tẹ kwa kpohọ uwou ọkpokpọ nọ o rọ ikilomita 800 ro thabọ no etẹe. Rekọ Thelma o gbe bi vi ileta uyoyou nọ e rẹ sa-sa udu s’omẹ, be ta k’omẹ nọ o bi roro kpahe omẹ gaga je bi yere omẹ fikinọ mẹ rrọ ogbẹnyusu gbe oriruo rọkẹ ẹe gbe fiki uzẹme na nọ me wuhrẹ i rie no Ebaibol ze. Ewo ogbẹnyusu ọkpekpe otiọye na nọ ọ re ghaghae yọ osohwa igbunu rọkẹ omodawọ nọ me ru ro fiobọhọ kẹe re o wuhrẹ kpahe Jihova.”
8. Didi eriwo ọliọliọ o re fiobọhọ k’omai evaọ odibọgba na?
8 Irẹro ẹnyaku ohwo jọ nọ ọ gwọlọ wuhrẹ uzẹme na o sai fiobọhọ k’omai thihakọ o tẹ make rọnọ ahwo buobu nọ ma be nyaku a bi dhesẹ isiuru ekakao ọvo kẹ Ẹme Jihova hayo a maki dhesẹ hẹ. Ababọ osegboja otiọye na o sae jọ use-abọ kẹ ẹrọwọ gbe akothiwo mai. Ghele na, eriwo ọliọliọ o re fiobọhọ k’omai. Fausto, ọnọ o no Guatemala ze, ọ ta nọ: “Okenọ me te bi se isẹri kẹ amọfa, me re roro kpahe epanọ u ti gbunu te otẹrọnọ ohwo nọ mẹ be t’ẹme kẹ na o zihe ro oniọvo abọ-ẹzi mẹ. Me re roro nọ o tẹ kao ohwo jọ nọ mẹ te nyaku ọ te jẹ uzẹme Ẹme Ọghẹnẹ rehọ. Iroro yena i re fiobọhọ k’omẹ ruabọhọ isẹri-ise jẹ wha uvi oghọghọ s’omẹ.”
Ekokohọ Efe Evaọ obọ Odhiwu
9. Eme Jesu ọ ta kpahe efe obọ odhiwu, kọ eme ma rẹ sai wuhrẹ no onana ze?
9 Ilele-iruo, makọ erọ emọ mai hayo amọfa, o rẹ lọhọ ẹsikpobi hi. O rẹ sae rehọ oke, odiri, gbe ithihakọ. Ghele na, kareghẹhọ inọ ahwo buobu a re wo unevaze re a ruiruo gaga ro koko ekwakwa efe buobu họ, eware nọ e rẹ wha oghọghọ se ai hi nọ e rẹ tọ bẹdẹ bẹdẹ hẹ. Jesu ọ ta kẹ enọ e jẹ gaviezọ kẹe inọ o rẹ mai woma re a ruiruo kẹ eware abọ-ẹzi. Ọ ta inọ: “Wha kọ okọ akpọ na kẹ oma rai hi, oria nọ ehẹhẹ gbe ẹgbẹomuo e jẹ rahae gbe enọ iji erẹ tọ lafiẹ a tho, rekọ kọ okọ obọ odhiwu kẹ oma ra, oria nọ, ehẹhẹ gbe ẹgbẹomuo ọvuọvo e jẹ raha ae he jegbe nọ iji e rẹ tọ lafiẹ i tho ho.” (Matiu 6:19, 20) Ẹkwoma ilale itee abọ-ẹzi—enọ i kugbe abọ-owo evaọ iruo obọdẹ ọrọ ilele-iruo na—ma rẹ sai wo evevọwẹ ẹriẹ inọ ma bi ru oreva Ọghẹnẹ gbe nọ ọ te ghale omai. Pọl ukọ na o kere inọ: “Ọghẹnẹ ọ kare ọ rọ ẹrẹreokie he nọ iruo rai i re vẹro ho gbe uyoyou nọ owha be rehọ fiki riẹ ruẹ.”—Ahwo Hibru 6:10.
10. (a) Fikieme Jesu o je wo efe abọ-ẹzi? (b) Ẹvẹ Jesu ọ rọ rehọ omariẹ rọ kẹ, kọ didi erere ologbo oyena o rọ kẹ amọfa?
10 Ma te ruiruo ziezi ro ru ilele, yọ ma be “kọ okọ obọ odhiwu” kẹ oma mai, rọwokugbe eme nọ Jesu ọ ta na. Onana o rẹ wha oghọghọ emio s’omai. Otẹrọnọ ma kẹ ababọ-oriobọ, ukuhọ riẹ ma re wo efe buobu k’omobọ mai. Jesu omariẹ ọ gọ Jihova avọ ẹrọwọ no evaọ ikpe buobu nọ i wo unu hu. Dai roro efe nọ o kokohọ no evaọ obọ odhiwu! Ghele na, Jesu ọ gwọlọ isiuru omobọ riẹ hẹ. Pọl ukọ na o kere inọ: “[Jesu] ọ rehọ oma riẹ kẹ fiki izieraha mai, re ọ ruẹse si omai no akpọ omuomu ọnana, epaọ oreva Ọghẹnẹ Ọsẹ mai.” (Ahwo Galesha 1:4, ẹjẹlẹ ibieme na ọmai.) Orọnikọ evaọ odibọgba riẹ ọvo Jesu ọ jẹ rehọ omariẹ kẹ hẹ rekọ o siobọno uzuazọ riẹ dẹẹ wọhọ ẹtanigbo re amọfa a sai wo uvẹ nọ a re ro koko efe họ evaọ obọ odhiwu.
11. Fikieme ekẹ abọ-ẹzi i ro woma vi erọ iwo?
11 Ẹkwoma amọfa owuhrẹ kpahe Ọghẹnẹ, ma re fiobọhọ kẹ ae ruẹ epanọ ae omarai a sai ro koko efe abọ-ẹzi nọ ọ rẹ tọ họ. Didi okẹ ofa nọ o rro vi onana whọ rẹ sae kẹ? Otẹrọnọ whọ kẹ ogbẹnyusu jọ ughọjọ oghaghae, omoto, hayo tubọ uwou, ẹsejọhọ ogbẹnyusu ọyena ọ rẹ vọ avọ uyere jẹ wereva, yọ who re wo oghọghọ ẹkẹ. Rekọ ẹvẹ okẹ oyena o rẹ jọ evaọ ikpe 20 nọ i lele i rie? Evaọ ikpe 200? Evaọ ikpe 2,000? Evaọ abọdekọ riẹ, whọ tẹ rehọ omara kẹ re who fiobọhọ k’ohwo jọ gọ Jihova, o rẹ sai wo erere no okẹ oyena ze bẹdẹ bẹdẹ.
Ẹgwọlọ Via Ahwo nọ E Gwọlọ Uzẹme Na
12. Ẹvẹ ibuobu a rọ rehọ oma rai kẹ no re a fiobọhọ kẹ amọfa evaọ abọ-ẹzi?
12 Re a w’obọ evaọ oghọghọ ẹkẹ abọ-ẹzi, ahwo Jihova a nya kpohọ oka akpọ na no. Idu buobu a nya siọ iwou gbe uviuwou rai ba no re a rehọ iruo imishọnare evaọ ekwotọ nọ a re jo wuhrẹ evẹrẹ gbe iruemu-ẹwho ekpokpọ. Amọfa a nya kpohọ abọ ọfa evaọ erẹwho obọrai no evaọ eria nọ ẹgwọlọ kẹ iwhowho Uvie ọ jọ mae rro. Ghele na efa jọ a wuhrẹ ẹvẹrẹ orẹwho ofa no, u te rovie uvẹ usiuwoma ota okpokpọ fihọ kẹ erara nọ i no orẹwho rai ziọ ẹkwotọ rai. Wọhọ oriruo, nọ a yọrọ emọ ivẹ kpako no enọ e be gọ evaọ oria-uzou ọ Isẹri Jihova enẹna, imava-orọo jọ evaọ New Jersey, U.S.A., a te muọ iruo ọkobaro họ je wuhrẹ ẹvẹrẹ China. Evaọ etoke ikpe esa, a ru iwuhrẹ Ebaibol kugbe ahwo 74 nọ e rẹ ta ẹvẹrẹ China nọ i bi kpohọ ekọleji ekẹloma jọ. Kọ whọ rẹ sai ru odibọgba ra kẹre evaọ oghẹrẹ jọ re whọ sae ruẹ oghọghọ viere evaọ iruo ilele-iruo na?
13. Eme whọ rẹ sai ru otẹrọnọ whọ gwọlọ wo odibọgba nọ o wo ẹvi viere?
13 Ẹsejọhọ who wo isiuru re who ru uwuhrẹ Ebaibol rekọ whọ re sai ru ere he. Evaọ ekwotọ jọ o re bẹbẹ re a duku ahwo nọ a wo isiuru. Ẹsejọhọ ahwo nọ whọ be nyaku a bi dhesẹ isiuru kpahe Ebaibol na ha. Otẹrọ ere, ẹsejọhọ whọ sae fodẹ isiuru ra evaọ olẹ ẹsikpobi vi epaọ anwẹdẹ, nọ whọ riẹ nọ te Jihova gbe Jesu Kristi a wo isiuru kpahe iruo na gaga yọ a sae kpọ owhẹ bru ohwo nọ ọ wọhọ ogodẹ. Gwọlọ obufihọ mi ahwo nọ a rọ ukoko ra nọ i wo ona vi owhẹ hayo enọ odibọgba rai ọ be mai wo ẹvi. Rehọ ewuhrẹ gbe iroro-ejẹ nọ a rẹ kẹ evaọ iwuhrẹ Ileleikristi ro ruiruo ziezi. Wo erere no ohrẹ esẹro ọnyawariẹ gbe eyae rai ze. Maero, who sobọhọ họ. Ọzae owareghẹ na o kere inọ: “Evaọ ohiohiẹ kọ ibi ra, gbe evaọ owọwọ who si obọ ra no ho; keme whọ riẹ onọ u re ti woma ha.” (Ọtausiwoma Na 11:6) Evaọ okeovo na, kareghẹhọ ezae ẹrọwọ wọhọ Noa gbe Jerimaya. Dede nọ ahwo kakao ọvo a j’owọ kẹ usiuwoma ota rai, odibọgba rai ọ jọ obokparọ. Maero, o were Jihova eva.
Eruo Utho Ẹgba Ra
14. Ẹvẹ Jihova o re rri ahwo nọ a kpako no evaọ egagọ riẹ?
14 O sae jọ nọ uyero ra o k’owhẹ uvẹ hẹ re who ru epanọ whọ gwọlọ ru te evaọ odibọgba na. Wọhọ oriruo, ikpe owho e sai fi umuo họ oware nọ whọ rẹ sai ru evaọ egagọ Jihova. Dede na, kareghẹhọ oware nọ ọzae owareghẹ na o kere: “Eza uzou yọ etu-uvie adhẹẹ nọ a te woi evaọ edhere ẹrẹreokie.” (Itẹ 16:31, NW ) Rọkẹ Jihova, uzuazọ nọ ohwo ọ raha evaọ egagọ riẹ o rẹ were iẹe. Ofariẹ, Ikereakere na e ta nọ: “Rite oke owho ra, Mẹ [Jihova] họ Ọye, rite okenọ whọ dhẹ eza no yọ omẹ gbẹ be yọrọ owhẹ; mẹ tẹ ta nọ, me re ru gba, mẹ rẹ te wọ owhai me veti siwi ei.” (Aizaya 46:4) Ọsẹ oyoyou obọ odhiwu mai ọ yeyaa inọ ọ te sẹro je fiobọhọ kẹ erọ omarokpotọ riẹ.
15. Kọ whọ rọwo inọ Jihova o wo otoriẹ uyero ra? Fikieme?
15 Ẹsejọhọ who bi muabọ kugbe ẹyao, ọwọsuọ ọrivẹ-orọo nọ ọ rọwo ho, owha-iruo ogbẹgbẹdẹ uviuwou, hayo ebẹbẹ egaga efa. Jihova ọ riẹ ọnyaba gbe uyero mai, yọ o you omai fiki omodawọ ajọwha mai re ma gọe. Oyena o rrọ uzẹme o tẹ make rọnọ oware nọ ma bi ru o kawo vi enọ amọfa a bi ru. (Ahwo Galesha 6:4) Jihova ọ riẹ nọ ma gba ha, yọ oware nọ o re rẹro riẹ mi omai u re bu hrọ họ. (Olezi 147:11) Ma te ru utho ẹgba mai, ma rẹ sai wo imuẹro inọ ma rọ ghaghae evaọ aro Ọghẹnẹ gbe nnọ iruo ẹrọwọ mai e te thọriẹe ẹro ho.—Luk 21:1-4.
16. Evaọ oghẹrẹ vẹ ahwo ukoko na kpobi a re ro w’abọ evaọ ilele-iruo?
16 Jẹ kareghẹhọ inọ iruo ilele-iruo na yọ omodawọ okugbe. Omọvo o re ru olele he, wọhọ epanọ ogẹgẹ ame ọvo o rẹ sai ru okakọ rro ho na. Uzẹme, Osẹri ọvo ọ sae nyaku ohwo nọ o wo isiuru je ru uwuhrẹ Ebaibol kugbei. Rekọ nọ ohwo ọkpokpọ ọyena ọ tẹ nwane nyaze Ọgwa Uvie na no, ahwo ukoko na kpobi a re fiobọhọ kẹe vuhu uzẹme na mu. Omosasa okugbe-inievo na u re dhesẹ okpomahọ ẹzi Ọghẹnẹ. (1 Ahwo Kọrint 14:24, 25) Emọ gbe izoge e rẹ kẹ iyo ejaja, bi dhesẹ kẹ ohwo ọkpokpọ na inọ emaha mai a wo ohẹriẹ no izoge akpọ na. Enọ e be mọ gbe enọ e kpako no evaọ ukoko na a re wuhrẹ ahwo ekpokpọ na kpahe oware nọ akothiwo ọ rọ. Makọ oghẹrẹ kpobi nọ ikpe hayo ọnyaba mai ọ rọ, mai kpobi ma w’obọ nọ u wuzou evaọ obufihọ kẹ ahwo ọkpokpọ nọ uyoyou rai kẹ uzẹme Ebaibol na u bi kodo nọ a be jẹ nyaharo kpohọ ame-ọhọ na. Euwa kpobi nọ ma raha evaọ odibọgba na, ozihebro kpobi, ẹmeọta kugbe ahwo nọ a wo isiuru eva Ọgwa Uvie na kpobi, o sae jọ kakao, rekọ o rọ abọjọ iruo ilogbo nọ Jihova o bi rugba na.
17, 18. (a) Fiba abọ-owo evaọ iruo ilele-iruo na, ẹvẹ ma sai ro w’obọ evaọ oghọghọ ẹkẹ? (b) Ẹkwoma abọ-owo evaọ oghọghọ ẹkẹ, ono ma be raro kele?
17 Dede na, u te no abọ-owo evaọ iruo ilele-iruo obọdẹ na no, mai wọhọ Ileleikristi ma re je w’obọ evaọ oghọghọ ẹkẹ evaọ idhere efa. Ma rẹ sai fi unuigho jọ họ akotọ re ma ro ru azọhọ ro fiobọhọ kẹ egagọ efuafo je ro fiobọhọ kẹ enọ i wo ho. (Luk 16:9; 1 Ahwo Kọrint 16:1, 2) Ma rẹ sae gwọlọ uvẹ nọ ma re ro dhesẹ ọghoruo kẹ amọfa. (Ahwo Rom 12:13) Ma rẹ sae daoma re ma “ru iruo ezi kẹ ahwo kpobi, onọ o mae ro kọ rọ kẹ otu nọ ọrọ ẹgba orọwọ na.” (Ahwo Galesha 6:10) Yọ evaọ idhere elọlọhọ nọ i wuzou, ma rẹ sae kẹ amọfa—ileta, use ifonu, okẹ, obufihọ nọ u w’iruo, ẹme uduotahawọ.
18 Ẹkwoma ẹkẹ, ma re dhesẹ nọ ma be raro kele Ọsẹ obọ odhiwu mai. Ma re je dhesẹ uyoyou inievo mai, oka ovuhumuo Ileleikristi uzẹme. (Jọn 13:35) Ma rẹ kareghẹhọ nọ eware enana e rẹ sai fiobọhọ k’omai w’obọ evaọ oghọghọ ẹkẹ.
Kọ Whọ Sae k’Iyo Nana Vevẹ?
• Ẹvẹ Jihova gbe Jesu a ro fi oriruo h’otọ no evaọ ẹkẹ abọ-ẹzi?
• Ẹvẹ ma sai ro wo egbẹnyusu ebẹdẹ bẹdẹ?
• Didi owọ ma rẹ sae jẹ re ma ru odibọgba mai kparobọ viere?
• Ẹvẹ ahwo kpobi evaọ ukoko na a sai ro w’obọ evaọ oghọghọ ẹkẹ?
[Iwoho nọ e rrọ ẹwẹ-obe avọ 25]
Okenọ emọ e tẹ j’owọ lele ewuhrẹ, esẹ gbe ini e rẹ ruẹ oghọghọ ulogbo gbe evevọwẹ
[Uwoho nọ o rrọ ẹwẹ-obe avọ 27]
Evaọ eruo ilele, ma rẹ sai wo uvi egbẹnyusu
[Uwoho nọ o rrọ ẹwẹ-obe avọ 28]
Jihova ọ rẹ rẹrote omai evaọ oke owho
[Iwoho nọ e rrọ ẹwẹ-obe avọ 29]
Evaọ idhere elọlọhọ nọ i wuzou, ma rẹ ruẹ oghọghọ evaọ ẹkẹ