Whọ Sae Jọ Owuhrẹ!
1. Uvẹ obọdẹ vẹ owhowho-uvie kpobi o wo?
1 Abọjọ iruo odibọgba na nọ ọ rẹ mae kẹ oghọghọ họ omọfa nọ who re wuhrẹ uzẹme na. Nọ who te bi fi obọ họ kẹ ohwo re o si kẹle Osu ehrugbakpọ na, jẹ be ruẹ nọ o bi fi eware nọ o bi wuhrẹ họ iruo o rẹ wha oghọghọ ulogbo se owhẹ. (Jem. 4:8) Utee owhowho-uvie kpobi o rẹ jọ re o wuhrẹ ohwo nọ ohọo uzẹme na u bi kpe, rọ ere fi obọ họ kẹe ru inwene nọ i fo evaọ uzuazọ riẹ.—Mat. 28:19, 20.
2. Fikieme ahwo jọ a gbẹ gwọlọ ru ebe-iwuhrẹ Ebaibol ho, kọ eme o ti fi obọ họ kẹ ai fi ẹbẹbẹ nana kparobọ?
2 Rọ Ẹro So Jihova: Evaọ okenọ u kpemu, idibo Jihova nọ i wo ẹrọwọ a roro nọ a te sai ru iruo nọ Jihova ọ kẹ rae gba ha. Ẹrorọsuọ Jihova Ọghẹnẹ u fi obọ họ kẹ Mosis, Jerimaya, Emọs, gbe amọfa gheghe fi ozodhẹ rai kparobọ je ru iruo nọ a roro nọ ae omarai a hae sai ru hu. (Ọny. 4:10-12; Jeri. 1:6, 7; Emọs 7:14, 15) Pọl ukọ na omariẹ ọ rọ aruọwha tẹme re. Ẹvẹ ọ sai ro ru ei? O ru rie vẹ inọ ẹkwoma “Ọghẹnẹ mai.” (1 Tẹs. 2:2) Ẹhẹ, mai kpobi ma sae rọ ẹro so Jihova kẹ obufihọ, areghẹ, gbe ẹgba nọ ma sai ro ru ebe-iwuhrẹ Ebaibol nọ e rẹ nyaharo.—Aiz. 41:10; 1 Kọr. 1:26, 27; 1 Pita 4:11.
3, 4. Uwuhrẹ vẹ a be k’omai nọ u re fi obọ họ k’omai wuhrẹ amọfa ẹme Ọghẹnẹ?
3 Jẹ Uwuhrẹ Rehọ: Jihova Ọghẹnẹ, Owuhrẹ Ologbo Mai, o bi wuhrẹ omai ẹkwoma ọruẹrẹfihotọ iwuhrẹ abọ-ẹzi ẹsikpobi re ma sae jọ iwuhrẹ nọ i te ziezi. (Aiz. 54:13; 2 Tim. 3:16, 17) Jẹ uwuhrẹ nana rehọ ẹkwoma eroruiruo ọruẹrẹfihotọ nana re who fiba eriariẹ Ebaibol nọ who wo je wo ẹnyaharo evaọ onaa nọ who re ro wuhrẹ amọfa Ẹme Ọghẹnẹ. Dede nọ onana họ ugogo ẹjiroro Isukulu Odibọgba Esuo-Ọghẹnẹ gbe Ewuhrẹ Odibọgba na, iwuhrẹ ukoko na kpobi i bi wuhrẹ omai re ma sai wuhrẹ amọfa Ẹme Ọghẹnẹ.
4 Daoma wuhrẹ idhere elọlọhọ nọ whọ sai ro wuhrẹ amọfa makọ eware ididi Ebaibol. Obe Isukulu Odibọgba, o ta evaọ ẹwẹ-obe avọ 227, inọ: “Uzoẹme ra na u re v’owhẹ ẹro ziezi otẹrọnọ whọ gwọlọ ru ei vẹ kẹ amọfa.” Ẹme nọ ma rẹ kpahe evaọ iwuhrẹ u re fi obọ họ k’omai kareghẹhọ igogo eme uwuhrẹ na. Fikiere, ruẹrẹ oma kpahe ziezi, yọ ere oruo u ti fi obọ họ k’owhẹ wo ẹnyaharo evaọ onaa uwuhrẹ ra.
5. Edhere ọfa vẹ a bi ro wuhrẹ omai evaọ ukoko na re ma wo ẹnyaharo wọhọ iwuhrẹ?
5 No anwọ oke anwae ze, egbodibo Ileleikristi a bi ro wuhrẹ mi ohwohwo evaọ iruo usiuwoma ota na. (Luk 10:1) O tẹ lọhọ, kuomagbe iwhowho-uvie nọ i wo onaa, ekobaro, ekpako na gbe esẹro ọnyawariẹ evaọ ebe-iwuhrẹ Ebaibol. Muẹrohọ epanọ a be rọ rehọ iwoho gbe etadhesẹ nọ e rrọ ebe nọ a bi ro ru uwuhrẹ na ro ru Ẹme Ọghẹnẹ vẹ. Nọ ae re a dhesẹ k’owhẹ epanọ whọ sae rọ jọ emamọ owuhrẹ. (Itẹ 1:5; 27:17) Jẹ uwuhrẹ nana rehọ ziezi, keme nọ edhere nọ Ọghẹnẹ o bi ro wuhrẹ owhẹ.—2 Kọr. 3:5.
6. Re ohwo ọ jọ ọnọ o re wuhrẹ amọfa Ẹme Ọghẹnẹ, eme ọ mae gwọlọ?
6 Rọ ẹro so Jihova, je wo erere no uwuhrẹ riẹ ze. Lẹ se Jihova rọkẹ ẹnyaharo ra. (Ol. 25:4, 5) Who te fi obọ họ kẹ ohwo jọ zihe ruọ ọnọ o re wuhrẹ amọfa Ẹme Ọghẹnẹ wọhọ owhẹ, who ti wo oghọghọ!