Jihova O bi Wuhrẹ Omai Kẹ Iruo Nana
1. Nọ Jihova ọ tẹ kẹ ahwo-akpọ iruo, eme o re ru?
1 Nọ Jihova ọ tẹ kẹ ahwo-akpọ iruo, o re dhesẹ epanọ a re ro ru iruo na kẹ ai. Wọhọ oriruo, okenọ Jihova ọ ta kẹ Noa inọ o ku okọ, dede nọ o ri ku okọ ẹdẹvo ho, Jihova o dhesẹ epanọ o re ro ku okọ na kẹe. (Emu. 6:14-16) Nọ Jihova o je vi Mosis othuru-igodẹ omaurokpotọ na bru ekpako Izrẹl gbe Fẹro, ọ kẹ riẹ imuẹro inọ: “Mẹ rẹte jọ unuẹme ra je wuhrẹ owhẹ onọ whọ rẹte ta.” (Ọny. 4:12) Epọvo na, Jihova o bi wuhrẹ omai epanọ ma re ru iruo usiuwoma ota nọ ọ kẹ omai na. O bi ru onana ẹkwoma Isukulu Odibọgba Esuo-Ọghẹnẹ gbe Ewuhrẹ Odibọgba na. Ẹvẹ ma sai ro wo erere no iwuhrẹ nana ze?
2. Ẹvẹ ma sai ro wo erere no Isukulu Odibọgba Esuo-Ọghẹnẹ ze?
2 Isukulu Odibọgba Esuo-Ọghẹnẹ Na: Taure who te ti kpohọ ewuhrẹ na hae daoma ruẹrẹ oma kpahe kẹ eme nọ a ti ru. Nọ whọ jẹ te ruẹ oghẹrẹ nọ emọ-isukulu na a bi ro ru eme na, u ve ti fiba onaa uwuhrẹ ra. (Itẹ 27:17) Hae wha obe ọ Isukulu Odibọgba ra ziọ ewuhrẹ na. Nọ ọsẹro isukulu na ọ tẹ be ta ẹme noi ze nọ ọmọ-isukulu o te ru ẹme riẹ no, si usi họ otọ eme nọ who ti fihọ iruo, whọ sai je kere eme fihọ akotọ obe na. Obọ nọ ma rẹ jọ isukulu na wo oye o rẹ mae kẹ erere. Kọ whọ be hae jọ isukulu na ru ẹme? Nọ a tẹ kẹ owhẹ ẹme, ruẹrẹ ẹme na ziezi je fi ithubro nọ a kẹ owhẹ họ iruo. Fi eware nọ who wuhrẹ na họ iruo nọ who te kpohọ usiuwoma.
3. Ẹvẹ ma sai ro wo erere no Ewuhrẹ Odibọgba na ze?
3 Ewuhrẹ Odibọgba: Ma tẹ romatotọ se jẹ ruẹrẹ iyo nọ ma te kẹ họ taure ma te ti kpohọ ewuhrẹ na ẹsiẹe ma te mae rọ kareghẹhọ ithubro nọ a te kẹ. Nọ iyo mai e tẹ rrọ kpẹkpẹe, ẹsiẹe ahwo buobu a te rọ kẹ iyo. Muẹrohọ idhesẹvia nọ a ti ru, je fi ithubro nọ who roro nọ i ti fi obọ họ kẹ owhẹ ru ziezi evaọ odibọgba na họ iruo. Rawo Odibọgba Uvie Mai nọ i wo izoẹme nọ i ti fi obọ họ kẹ owhẹ evaọ odibọgba ra.
4. Fikieme ma je fi eware nọ a bi wuhrẹ omai evaọ ukoko na họ?
4 Wọhọ Noa gbe Mosis, ma be jọ iruo nọ a kẹ omai inọ ma jọ akpọ na soso ta usiuwoma na rẹriẹ ovao dhe ise-abọ. (Mat. 24:14) Ma ti fi ise-abọ na kparobọ nọ ma tẹ rẹroso Jihova, Owuhrẹ Ologbo mai na, je fi eware nọ o bi wuhrẹ omai họ iruo.—Aiz. 30:20.