Kọ Whọ be Rehọ Omobe ọ Ebaibol E rọ Jiroro gbe Orọ Izoẹme Ebaibol rọ kẹ Iroro e Jẹ na ro Ruiruo?
1. Oghẹrẹ vẹ Pọl ukọ na avọ Jesu a ro wuhrẹ ahwo?
1 Pọl ukọ na ọ jẹ rọ eme Ikereakere na jiroro kugbe ahwo. (Iruẹru 17:2, 3; 18:19) Evaọ ere oruo, ọ rọ aro kele Jesu, ọnọ ọ jẹ ta eme no Ikereakere na ze, jẹ rehọ etadhesẹ ro fi obọ họ kẹ ahwo nọ a jẹ gaviezọ kẹe wo otoriẹ oreva Ọghẹnẹ. (Mat. 12:1-12) A ruẹrẹ omobe ọ Epanọ A ro Muhọ Jẹ Ruabọhọ Ebaibol E rọ Jiroro na họ re u fi obọ họ k’omai ru epọvo na.
2. Ẹvẹ ma sae rọ rehọ omobe ọ Ebaibol E rọ Jiroro na rọ ruẹrẹ eme-emuhọ nọ e rẹ kpare isiuru họ?
2 Ẹruẹrẹhọ Eme-Emuhọ nọ E rẹ Kpare Isiuru: Eme-emuhọ nọ e rẹ kpare isiuru e rrọ ẹwẹ-obe avọ 2-7 ọrọ omobe ọ Ebaibol E rọ Jiroro na. Whọ tẹ riẹ jẹ be rehọ idhere sa-sa nọ a re ro mu ẹme họ ro ruiruo, maero otẹrọnọ wha rẹ jọ ẹkwotọ rae ta usiuwoma kpere kpere, o rẹ lẹliẹ owhẹ wo onaa ziezi evaọ odibọgba na jẹ riẹ idhere sa-sa nọ who re ro mu ẹme họ. Whọ rẹ sai se eme-emuhọ ra no omobe na ze ovavo nọ whọ tẹ be rehọ ifonu rọ ta usiuwoma.
3. Eme ọ rrọ ẹwẹ-obe avọ 7-13 ọrọ omobe ọ Ebaibol E rọ Jiroro na nọ u re fi obọ họ k’omai evaọ odibọgba na? (b) Amono a sae rọ eme nọ e rrọ ẹwẹ-obe avọ 13-16 lele ta ẹme?
3 Nọ A tẹ Gwọlọ Bru Ẹme Dhe Omai Unu: Hai rẹro nọ ahwo a rẹ sai bru ẹme dhe owhẹ unu nọ whọ tẹ rrọ usiuwoma, fikiere taure who te kpohọ usiuwoma, rehọ omoke jọ kiẹ ẹwẹ-obe avọ 7-13 kpahe ẹme nọ whọ rẹ sae ta. O sae jọ nọ ahwo Buddha, Hindu, Ju, hayo Muslim a te jọ usu ahwo nọ whọ te nyaku. O tẹ rrọ ere, eme nọ e rrọ ẹwẹ-obe avọ 13-16 i ti fi obọ họ.
4. Ẹvẹ ma sae rọ rehọ obe ọ Izoẹme Ebaibol rọ kẹ Iroro e Jẹ na ruiruo nọ a tẹ nọ omai onọ hayo ta ẹme jọ nọ ọ wha avro ze?
4 Rehọ iẹe Kiyo Enọ: Omobe ọ Izoẹme Ebaibol rọ kẹ Iroro e Jẹ na o sai je fi obọ họ nọ a tẹ nọ omai onọ hayo nọ a tẹ ta ẹme jọ nọ ọ wha avro ze. Whọ rẹ sae ta kẹ ohwo na nọ, o te were owhẹ re who dhesẹ oware jọ nọ o te were iẹe rọ kẹe kpahe ẹme na, whọ vẹ tọlọ omobe na no ẹkpa ze. Nọ o rọnọ a ruẹrẹ izoẹme na họ othotha na, kpohọ ugogo uzoẹme nọ who roro nọ a jọ ta kpahe ẹme na. Whọ vẹ kiẹ enọ nọ a kere ibiẹme rai kpokpoko na. Nọ whọ tẹ ruẹ ẹme nọ whọ be gwọlọ na no, sei no omobe na ze ovavo. Whọ tẹ be ta kpahe epanọ Ebaibol na o rọ rrọ gbagba, whọ sai kpohọ uzoẹme na “Ebaibol.”
5. Idhere efa vẹ emebe nana i re ro fi obọ họ?
5 Idhere Efa: Inievo jọ a wo emebe nana fihọ oria iruo rai hayo obọ isukulu re a hẹ sae rehọ ae kiyo enọ wọhọ, ‘Fikieme wha gbe ru ehaa edẹ-eriosehọ họ?’ ‘Fikieme wha gbẹ rọwo uwuhrẹ erae-ehẹle he?’ Eme nọ e rrọ otọ izoẹme na “Emama” i bi fi obọ họ kẹ izoge nọ a te bi kere eware isukulu rai, yọ eme nọ e rrọ otọ uzoẹme na “Ọguakugbe-Ẹrọwọ” e sai fi obọ họ kẹ ae nọ a tẹ be gbae họ nọ a wobọ evaọ elẹ nọ isukulu soso e rẹ lẹ kugbe. Kọ who bi ti weze bru ohwo jọ nọ ọ be mọ hayo ọnọ ohwo jọ o whu ku? Eme nọ e rrọ otọ izoẹme na “Uwhu” gbe “Ẹkparomatha” e sai fi obọ họ k’owhẹ rọ Ikereakere na ta eme omosasọ kẹe. Emebe nana i wo evuẹ nọ i re fi obọ họ kẹ ahwo nọ a be ruẹrẹ ẹme nọ a te jọ iwuhrẹ ru họ, gbe enọ e te rẹrote uwuhrẹ omakugbe kẹ usiuwoma ota.
6. Eme họ utee mai nọ ma tẹ rọ usiuwoma?
6 Nọ ma tẹ rọ usiuwoma, orọnikọ utee mai họ re ma dhesẹ nọ ma riẹ vi ahwo ho; hayo kọ re ma lele ai ta ẹme ọvo ho. Utee mai họ re ma rọ Ikereakere na lele ahwo jiroro ziezi. Ma tẹ rọ emebe nana ruiruo ziezi, ma rẹ rọ ere dhesẹ nọ ma bi muẹrohọ onaa uwuhrẹ mai.—1 Tim. 4:16.