Epanọ A Sae rọ Bọ Ẹgba Iroro-Ejẹ
1 Otofa jọ orọ ubiẹme na “jiroro” họ “ẹmeọta kugbe omọfa re u kpomahọ owojẹ gbe iroro riẹ.” Re whọ ruẹsi ru woma viere evaọ odibọgba na, u fo re whọ bọ ẹgba nọ whọ rẹ rọ jiroro kugbe enọ whọ nyaku. (Iruẹru 17:2-4) Rekọ ẹvẹ whọ sae rọ bọ ona onana?
2 O rẹ Rọ Eroro Muhọ: Okenọ who te bi wuhrẹ kpahe uzẹme Ebaibol na, whọ te ruẹ nọ u re fiobọhọ re who roro kpahe oria uwuhrẹ na. O tẹ wọhọ nọ eme na e dina rọ kpakrekpakre, rehọ oke ru ekiakiẹ jọ je roro kpahe iyo na. Gwọlọ wo otoriẹ uvevẹ orọnikọ orọ otofa eme na ọvo ho rekọ te ẹjiroro Ikereakere nọ a rọ kẹ otofa utioye na.
3 U Kugbe Omaruẹrẹhọ kẹ Odibọgba Na: Roro kpahe epanọ who ti ro ru uzẹme na vẹ kẹ oghẹrẹ ahwo sa-sa. Roro kpahe onọ nọ u re ru ohwo roro nọ o rẹ kpare isiuru. Roro kpahe epanọ who re ro fi Ikereakere họ iẹe jẹ jiroro kpahe iẹe. Roro kpahe avro nọ e sae te roma via, re who je roro kpahe oghẹrẹ nọ whọ te kpahe fihọ ae. Kpokahọ ugogo eme jọ nọ e te mai w’iruo evaọ obe uwuhrẹ na.
4 Lele Oriruo Jesu: Jesu ọ kẹ oriruo nọ ọ mai woma kpobi ọrọ ẹgba nọ a rẹ rọ jiroro no Ikereakere na ze. Re whọ kiẹ epanọ o ro wuhrẹ riwi, roro kpahe ikuigbe nọ e rọ Luk 10:25-37 na. Muẹrohọ eware enana: (1) Kpọ iroro kpohọ Ikereakere na okenọ whọ tẹ be k’iyo enọ ahwo. (2) Zizie ai re a ta ẹkẹ eva rai, je jiri ai okenọ a tẹ kpahe emamọ eme. (3) Jọ u mu owhẹ ẹro nnọ okugbe nọ ọ rrọ onọ na gbe Ikereakere na o re vevẹ. (4) Fodẹ ọtadhesẹ isiuru jọ re u mu owhẹ ẹro nnọ uyo na u vẹro ziezi.—Rri Uwou-Eroro Na ọrọ March 1, 1986 (ọrọ Oyibo), ẹwẹ-obe avọ 27-28, edhe-ẹme avọ 8-10.
5 Rehọ Ekwakwa nọ A k’Omai na Ruiruo: A kporo Epanọ A ro Muhọ Jẹ Ruabọhọ Ebaibol E rọ Jiroro na wọhọ obe usiuwoma ota. Eme emuhọ, eme nọ a rẹ kpahe kẹ enọ e gwọlọ whaha ẹmeọta mai, gbe eme iroro-ejẹ nọ e riẹe i re fiobọhọ k’omai bọ ẹgba iroro-ejẹ mai. Omobe ọ Epanọ A ro Muhọ Jẹ Ruabọhọ Ebaibol E rọ Jiroro na yọ obọdẹ okwakwa nọ ma rẹ wha lele oma ẹsikpobi kpohọ usiuwoma ota nọ ma re gb’ebẹbẹ ẹtọlọ riẹ hẹ evaọ okenọ ma tẹ rrọ ẹmeọta Ebaibol.
6 Ẹbọga ẹgba iroro-ejẹ ra u re fiobọhọ bọ ona ra evaọ iruo usiuwoma ota gbe ewuhrẹ na. Onana o rẹ wha eghale buobu se owhẹ gbe ahwo nọ whọ nyaku evaọ odibọgba na.