Rọ ‘Fiki Usiuwoma Ota na Ru Eware Kpobi’
1. Eme owhowho-uvie kpobi ọ be rọ unevaze ru, kọ fikieme?
1 Pọl ukọ na ọ rehọ e riẹ inọ owha-iruo riẹ o rrọ re o whowho emamọ usi na kẹ amọfa. (1 Kọr. 9:16, 19, 23) Ere ọvona re, ọdawẹ nọ ma wo kẹ ewoma ibẹdẹ amọfa o be wọ omai dao ẹgba mai kpobi re ma ta usiuwoma na kẹ ae.
2. Inwene vẹ ma rẹ sae jọ omaa mai ru fiki usiuwoma ota na, kọ fikieme?
2 Ta Usiuwoma Evaọ Oria gbe Oke nọ Whọ Sae rọ Ruẹ Ahwo: Orọnikọ oke nọ u je emamọ okuori gbe oria kpobi o re ro kpohọ iyei-ikpe he, rekọ o re kpohọ iyei-ikpe evaọ emamọ oke gbe oria nọ ọ jẹ sae ruẹ iye kpe. Ere ọvona re, mai wọhọ “ikuori ahwo,” o sae gwọlọ nọ ma ru inwene jọ re ma sae jọ ẹkwotọ mai ruẹ ahwo, jẹ rọ ere wo oghọghọ ulogbo evaọ ekokohọ “oghẹrẹ iyei” kpobi. (Mat. 4:19; 13:47) Kọ ma sae rọ akọ owọwọ nyabru ahwo evaọ obọ iwou rai hayo rọ ohiohiẹ ta usiuwoma evaọ iyẹrẹ? Utee Pọl o jọ re o ‘sisẹri usiuwoma na ziezi,’ yọ ọ rehọ uvẹ kpobi nọ u rovie fihọ ro ru ere.—Iruẹru 17:17; 20:20, 24.
3, 4. Nọ ma tẹ rrọ usiuwoma ota, ẹvẹ ma sai ro nwene ẹmeọta mai, kọ eme ọ rẹ sai noi ze?
3 Nwene Ẹmeọta Ra Lele Uyero Ohwo nọ Whọ Nyaku: Ikwori i re nwene onaa iyei-ikpe rai noke ruoke re a sai kpe oghẹrẹ eri nọ a gwọlọ. Ẹvẹ ma sae rọ ta emamọ usi Uvie na kẹ ahwo ẹkwotọ mai evaọ edhere nọ o rẹ were ai? Ma rẹ rọ onaa t’ẹme kpahe oware jọ nọ o rrọ ọdawẹ kẹ ahwo kpobi, ma vẹ gaviezọ ziezi kẹ ẹme nọ ahwo na a te kpahe fihọ iẹe. (Jem. 1:19) Ma sae nọ ai onọ jọ nọ o rẹ lẹliẹ ae ta iroro rai via. (Itẹ 20:5) Enẹ oruo ma sae rọ ta usiuwoma na evaọ edhere nọ o re duobọte ahwo udu. Pọl o “zihe ruọ oghẹrẹ eware [kpobi] kẹ ahwo kpobi.” (1 Kọr. 9:22) Ẹmeọta mai nọ ma re nwene lele uyero ahwo yọ obọdẹ edhere nọ ma rẹ rọ nyate ai udu.
4 O rẹ kẹ oghọghọ kẹhẹ re a wha “emamọ usi” se amọfa! (Aiz. 52:7) Jọ ma rọ ‘fiki usiuwoma na ru eware’ kpobi re ma sae whae te ahwo buobu oma te epanọ o rẹ lọhọ te kpobi.—1 Kọr. 9:23.