Kọ Who Ti Ru Inwene?
1. Fiki epanọ akpọ na o bi nwene, eme o gwọlọ nọ ma re ru?
1 Evaọ obe 1 Ahwo Kọrint 7:31, Ebaibol na ọ rehọ akpọ na wawo ughe nọ u re dhe enwenwene. Fiki epanọ eware i bi nwene hayo be vrẹ evaọ akpọ na, o gwọlọ nọ ma re nwene oghẹrẹ nọ ma rẹ rọ ta usiuwoma, oke gbe ẹme nọ ma re ro mu usiuwoma họ. Kọ o were owhẹ re who nwene?
2. Fikieme o rọ gwọlọ nọ ma re nwene lele ukoko na?
2 Onaa Usiuwoma Ota: Ukoko na o be hai ru inwene anwẹdẹ. Nọ Jesu ọ kaki vi ilele riẹ kpohọ usiuwoma ota, ọ ta kẹ ae nọ a wha emu hayo igho ho. (Mat. 10:9, 10) Evaọ oke ofa, Jesu o nwene ẹme riẹ yena keme ahwo a ti mukpahe ilele riẹ, yọ a te ta usiuwoma na kẹre te ewho efa re. (Luk 22:36) Anwọ ikpe udhusoi nọ e vrẹ na, Isẹri Jihova a rehọ oghẹrẹ sa-sa ta usiuwoma na no. Ejọ họ ekade nọ a re kere eme fihọ, iredio, gbe imoto nọ a rẹ jọ ta usiuwoma. Evaọ oke mai nana, fikinọ a rẹ kake jọ eria buobu di ahwo họ uwou ho, ma be ta usiuwoma na n’uwou ruọ uwou gbe okenọ ma kpohọ usiuwoma ha. A tuduhọ omai awọ nọ ma hae ta usiuwoma n’uwou ruọ uwou evaọ oke owọwọ otẹrọnọ ma bi di ahwo họ uwou evaọ ohiohiẹ hẹ. Nọ ẹzi Jihova ọ be kpọ akẹkẹ riẹ na, kọ who bi nwene lele iei?—Izik. 1:20, 21.
3. Ẹvẹ ma sae rọ ta usiuwoma ziezi evaọ ẹkwotọ mai?
3 Ẹme nọ Whọ rẹ Ta: Eme ahwo nọ a rrọ ẹkwotọ ra a rẹ mae ta ẹme kpahe? Ẹbẹbẹ ugho, uviuwou, omofọwẹ, manikọ ẹmo? Ma te muẹrohọ ẹbẹbẹ nọ o rrọ ẹkwotọ mai gbe oghẹrẹ nọ eware e rrọ, u re fi obọ kẹ omai riẹ ẹme nọ ma rẹ ta evaọ usiuwoma. (1 Kọr. 9:20-23) Otẹrọnọ ohwo nọ ma be ta usiuwoma kẹ ọ nọ onọ jọ hayo ọ ta ẹme jọ, ukpenọ ma rẹ ruabọhọ uzoẹme nọ ma ruẹrẹ kpahe, o te mai woma re ma kẹ ohwo na uyo onọ riẹ.
4. Fikieme u ro fo re ma nwene onaa usiuwoma ota mai enẹna?
4 Kẹle na, uye ulogbo na u ti muhọ. Ebaibol na ọ ta nọ: “Oke nọ a fihọ o rẹ kpẹkpẹe.” (1 Kọr. 7:29) Fikiere u wuzou re ma nwene onaa mai re ma sae ta usiuwoma na ziezi evaọ umutho oke nọ u kiọkọ na.