Usiuwoma Ota O rẹ Lẹliẹ Omai Jọ Gaga Evaọ Abọ-Ẹzi
1. Irere vẹ ma be jọ iruo usiuwoma ota na wo?
1 Ma te bi wobọ ziezi evaọ iruo usiuwoma ota na o rẹ bọ omai ga evaọ abọ-ẹzi je fiba evawere mai. Ugogo ẹjiroro nọ ma be rọ ta usiuwoma na họ re ma ru Jihova eva were. Rekọ, fikinọ ma bi ru lele ujaje na inọ ma ‘whowho ẹme na,’ ma bi wo eghale Jihova, je bi wo irere evaọ idhere efa. (2 Tim. 4:2; Aiz. 48:17, 18) Oghẹrẹ vẹ usiuwoma ota o sae rọ bọ omai ga je ru omai wereva?
2. Idhere vẹ iruo odibọgba na e be rọ bọ omai ga?
2 Ma Bi Wo Ọbọga gbe Eghale: Usiuwoma ota u bi fi obọ họ k’omai tẹrovi eghale Uvie na, orọnikọ ebẹbẹ akpọ inẹnẹ hẹ. (2 Kọr. 4:18) Iwuhrẹ Ebaibol nọ ma bi ru vẹ kẹ amọfa e be bọ ẹrọwọ mai kpahe eyaa Jihova ga, jẹ be lẹliẹ omai wo ovuhumuo odidi kẹ uzẹme na. (Aiz. 65:13, 14) Nọ ma bi fi obọ họ kẹ amọfa re a wo usu kugbe Jihova re a siọ “e rọ akpọ na” ba ẹjọ na, ma be rọ ere bọ ọtamuo mai nọ ma rọ gwọlọ jọ abọ akpọ na ha ga.—Jọn 17:14, 16; Rom 12:2.
3. Ẹvẹ odibọgba na o bi ro fi obọ họ k’omai wo ekwakwa-aghae Oleleikristi?
3 Ekpohọ usiuwoma ota u bi fi obọ họ k’omai wo ekwakwa-aghae Oleleikristi. Wọhọ oriruo, nọ ma be daoma ‘zihe ruọ oghẹrẹ eware kpobi kẹ ahwo kpobi na,’ u bi fi obọ họ k’omai wo omaurokpotọ vi epaọ ọsosuọ. (1 Kọr. 9:19-23) Nọ ma be ta usiuwoma kẹ ahwo nọ “a rọ oyoya, a tẹ jẹ vaha wọhọ igodẹ nọ i wo othuru hu” na, o be lẹliẹ omai wuhrẹ ororokẹ gbe ohrọ. (Mat. 9:36) Nọ ma be ruabọhọ iruo na ghelọ ọwọsuọ gbe ezọ nọ a be gaviẹ k’omai hi na, yọ ma be rọ ere wuhrẹ ithihakọ. Obọ nọ ma bi fihọ kẹ amọfa evaọ odibọgba na u bi fiba oghọghọ mai.—Iruẹru 20:35.
4. Ẹvẹ odibọgba na ọ rrọ owhẹ oma?
4 Oghale o rrọ k’omai nọ ma bi ro ruiruo odibọgba nọ o be wha ajiri se Ọghẹnẹ. Odibọgba na ọ be bọ omai ga. O be wha eghale buobu se ahwo nọ a be rọ ẹgba rai kpobi ro ‘se isẹri usiuwoma na ziezi.’—Iruẹru 20:24.