Fi Ẹbẹbẹ nọ A Be rọ Ruẹ Ezae Ta Usiuwoma kẹ Hẹ Kparobọ
1. Ẹgwọlọ ọkpakpata vẹ ọ rrọ otọ kpahe iruo Uvie na?
1 Nọ iruo usiuwoma Uvie na e be nyaharo evaọ edẹ urere nana, ẹgwọlọ ọkpakpata ọ riẹ kẹ ezae nọ i te evaọ abọ-ẹzi nọ e rẹ jọ esẹro evaọ ukoko na. (Mak 4:30-32; Iruẹru 20:28; 1 Tim. 3:1-13) Rekọ evaọ eria jọ, a tẹ rehọ unu ezae nọ e be jẹ ovuẹ Uvie na rehọ rọ wawo eyae na, ezae nọ e be jẹ ovuẹ na rehọ a tulo ho. Evaọ iruemu ewho jọ, ezae na a rẹ nyasiọ owha-iruo ẹme Ọghẹnẹ nọ a re wuhrẹ emọ ba kẹ eyae rai. Ẹvẹ ma sae rọ ta udu họ ezae buobu awọ re a se ẹgwọlọ abọ-ẹzi rai gboja je kuomagbe omai evaọ egagọ uzẹme?
2. Didi iyẹrẹ i no oma nọ Pọl gbe Pita a dawo re a ta usiuwoma kẹ ezae na ze?
2 Gwọlọ Ezae nọ Whọ rẹ Ta Usiuwoma Kẹ: Evaọ ẹsibuobu, nọ ọzae nọ o wuzou uviuwou o te kurẹriẹ, ọ rẹ ta kẹ ahwo uviuwou riẹ re a kurẹriẹ lele iei. Wọhọ oriruo, nọ a mu Pọl avọ Saelas fihọ uwou-odi fiki usiuwoma ota rai, a ta usiuwoma kẹ oriekarọ jọ. Ọzae na avọ ekru riẹ soso a họ-ame evaọ oke ovona. (Iruẹru 16:25-34) Nọ Pọl ọ jẹ ta usiuwoma evaọ Kọrint, “Krispọs okpohwo uwou-egagọ na, avọ ekru riẹ kpobi a [kurẹriẹ bru] Ọnowo na.” (Iruẹru 18:8) Jihova ọ rehọ Pita ta usiuwoma kẹ Kọniliọs, osu elakpa-ẹmo nọ a dhesẹ nọ ọ jọ ‘ọgba egagọ, nọ ọ be dhozọ Ọghẹnẹ.’ Kọniliọs avọ uviuwou riẹ gbe egbẹnyusu ekpekpe riẹ a họ-ame.—Iruẹru 10:1-48.
3. Evaọ aruorokele Filip, amono nọ e rrọ “ekua ilogbo” whọ rẹ sae ta usiuwoma kẹ?
3 Usiuwoma nọ ma rẹ ta kẹ ezae nọ e rrọ “ekua ilogbo” o rẹ sae wha ewoma nọ ma rẹro riẹ hẹ ze. (1 Tim. 2:1, 2) Wọhọ oriruo, ukọ-odhiwu Jihova ọ ta kẹ Filip inọ ọ nyae ta usiuwoma kẹ ọzae “nọ o wo udu” nọ o wuzou eyero efe kpobi erọ ovie-aye obọ Etiopia. Nọ Filip ọ nya tei oma, o yo nọ ọzae na “o je se obe Aizaya ọruẹaro na,” ọ tẹ ta usiuwoma kẹe kpahe Jesu. Ohwo Etiopia nana o zihe ruọ Oleleikristi, yọ ẹsejọhọ ọ jẹ ta usiuwoma na bẹsenọ o ro te obọ ẹwho riẹ. O sae jẹ jọ nọ ọ ta usiuwoma na kẹ ovie-aye na gbe ahwo nọ e rrọ ighẹ ovie na, ahwo nọ uvẹ na o hae te kaki rovie kẹ hẹ re a yo emamọ usi na.—Iruẹru 8:26-39.
4. Eme ma re ru nọ ezae buobu a sai ro yo emamọ usi na?
4 Epanọ Whọ Sae rọ Ruẹ Ezae t’Ẹme Kẹ: Nọ orọnọ ezae e rẹ kake jọ uwou hu evaọ uvo fikinọ a kpohọ iruo no na, kọ whọ sae ruẹrẹ omaa ra fihọ re whọ hai kpohọ usiuwoma oke krẹkri evaọ owọwọ, urere-oka, hayo etoke ehọlide? Whọ tẹ be hae ta usiuwoma evaọ eria ekiọthuọ kẹse kẹse, o te k’owhẹ uvẹ nọ who re ro se isẹri kẹ ezae nọ e rẹ kake jọ iwou rai hi. Inievo-emezae a sae jẹ daoma ziezi re a ta usiuwoma kẹ ibe-iruiruo rai nọ e rrọ ezae. Evaọ usiuwoma nuwou ruọ uwou na, maero evaọ ẹkwotọ nọ a re ru kẹse kẹse, inievo-emezae e sae jọ iwou nọ a nyate nọ sọ a sai lele ọzae nọ ọ rrọ uwou na t’ẹme.
5. Eme oniọvo-ọmọtẹ o re ru otẹrọnọ ọzae nọ ọ ta usiuwoma kẹ o dhesẹ uvi isiuru kpahe ovuẹ Uvie na?
5 Nọ ọzae nọ oniọvo-ọmọtẹ ọ ta usiuwoma kẹ o te dhesẹ isiuru kpahe uzẹme na, jọ ọyọvo o zihe bru ọzae na ha. Ọye avọ ọzae riẹ hayo owhowho-uvie ọfa a re gbe zihe. Nọ ọzae na o te gbe bi dhesẹ isiuru, o rẹ mai woma re ọ rehọ uwuhrẹ na kẹ oniọvo-ọmọzae nọ ọ rẹ sai ru uwuhrẹ na haro.
6. Ẹvẹ ma sae rọ rehọ aro kele Pọl ukọ na re ma “ruẹse wo ahwo buobu” t’obọ?
6 Salọ Izoẹme nọ E rẹ Were Ezae Na: Pọl ukọ na o roro kpahe ahwo nọ ọ jẹ ta usiuwoma kẹ o te nwene eme riẹ re ọ “ruẹse wo ahwo buobu” t’obọ. (1 Kọr. 9:19-23) Epọvo na re, ma re roro kpahe izoẹme nọ e te mae were ezae nọ ma te nyaku, ma vẹ ruẹrẹ oma kpahe ziezi. Wọhọ oriruo, ezae i re se eme nọ i kiekpahe ẹbẹbẹ ugho, isuẹsu iwoma, ufuoma gbe omofọwẹ uviuwou rai gboja gaga. A rẹ sai je wo isiuru kpahe izoẹme wọhọ ẹjiroro uzuazọ, obaro akpọ na, gbe oware nọ Ọghẹnẹ ọ rọ kuvẹ kẹ uye-oruẹ. Ahwo a te gaviezọ kẹ ovuẹ mai otẹrọnọ ma ruẹrẹ izoẹme itienana họ ziezi.—Itẹ 16:23.
7. Ẹvẹ ahwo kpobi nọ a rrọ ukoko na a sai ro fi obọ họ kẹ ọzae nọ ọ rrọ ukoko ho nọ o lele aye riẹ ziọ ewuhrẹ?
7 Fi Obọ họ kẹ Ezae nọ Eyae Rai Ọvo E Rrọ Ukoko Na: Dede nọ uruemu ezi nọ inievo-emetẹ mai a re dhesẹ kẹ ezae rai nọ e rrọ ukoko ho o be hẹ mai lẹliẹ ezae na kurẹriẹ, ahwo nọ a rrọ ukoko na a rẹ sai fi obọ họ re. (1 Pita 3:1-4) Nọ ọzae nọ ọ rrọ ukoko ho o te lele aye riẹ ziọ ewuhrẹ, edhere ọsasa nọ a ro dede iei rehọ o sae jọ isẹri ilogbo rọ kẹe. Ẹnyaze riẹ na o sai dhesẹ nọ o mu isiuru họ ewo kpahe uzẹme na no, yọ ẹsejọhọ ọ te jẹ obe-uwuhrẹ Ebaibol rehọ.
8. Ẹvẹ inievo-emezae e sae rọ daoma fi obọ họ kẹ ezae nọ eyae rai ọvo e rrọ ukoko na nọ i dhesẹ isiuru kakao kpahe uzẹme na?
8 Evaọ abọfa riẹ, ezae jọ a re dhesẹ emamọ isiuru oke ọsosuọ họ, rekọ uwhremu na, a sae rọwo nọ oniọvo-ọmọzae jọ nọ ọ were rai ọ rehọ Ebaibol na lele ae jiroro. Inievo ukoko jọ a jẹ hae daoma weze kpohọ uviuwou jọ nọ aye na ọvo ọ jẹ rrọ ukoko, re a lele ọzae na t’ẹme kpahe eware nọ a riẹ nọ e rẹ were iẹe. Onana u su kpohọ ẹmeọta kpahe Ebaibol na, yọ enẹna ọzae na ọ họ-ame no. Oriruo ọfa họ, oniọvo-ọmọzae jọ o fi obọ họ kẹ ọzae jọ nọ aye riẹ ọvo ọ rrọ ukoko na bọ ogba wariẹ uwou riẹ họ. Obufihọ nana o lẹliẹ ọzae na rọwo nọ a ru obe-uwuhrẹ Ebaibol kugbei. (Gal. 6:10; Fil. 2:4) Whọ tẹ rrọ oniọvo-ọmọzae, ma ta udu họ owhẹ awọ inọ daoma go kẹle ezae nọ eyae rai ọvo e rrọ ukoko na.
9. Didi oghale u re noi ze nọ a te wuhrẹ ezae nọ e rrọ ukoko na?
9 Wuhrẹ Ezae Ileleikristi re A Sae Rẹrote Ewha-Iruo Evaọ Obaro: Ezae nọ i kurẹriẹ ziọ ukoko na je wo ẹnyaharo te epanọ a ro wo ewha-iruo evaọ ukoko na, a rẹ sae jọ usu ‘ekẹ ahwo’ na, koyehọ ekpako ukoko nọ e rẹ rehọ eriariẹ gbe ẹgba rai rọ gbodibo kẹ ahwo Jihova. (Ẹf. 4:8; Ol. 68:18) Ezae itieye na e rẹ rehọ unevaze gbe osegboja rọ sẹro ukoko na. (1 Pita 5:2, 3) Oghale ulogbo dẹe a rẹ jọ kẹ okugbe inievo akpọ soso na!
10. Ẹvẹ oma nọ Ananias ọ dawo ro fi obọ họ kẹ Pọl o rrọ kẹ ahwo buobu erere?
10 Wọhọ oriruo, Sọl o zihe ruọ ‘ukọ rọ kẹ otu erẹwho egedhọ,’ dede nọ ọ jọ ohwo nọ o je kpokpo Ileleikristi vẹre. (Rom 11:13) Oghẹrẹ ohwo nọ Sọl ọ jọ o kaki ru Ananias wo ehoo nọ ọ rẹ rọ ta usiuwoma kẹe. Rekọ, Ananias o ru lele ọkpọvio Olori na ọ tẹ ta usiuwoma kẹ ọzae nana nọ o zihe ruọ Pọl ukọ na. Odibọgba Pọl o kẹ idu ahwo buobu nọ e gaviezọ kẹe erere, yọ ima ahwo buobu a gbe bi wo erere no ebe-ovuẹ riẹ nọ ọ rrọ ẹgba ẹzi Ọghẹnẹ kere nọ e rrọ Ebaibol na ze. (Iruẹru 9:3-19; 2 Tim. 3:16, 17)
11. Fikieme ma jẹ dao ẹgba mai kpobi re ma ta usiuwoma kẹ ezae?
11 Fikiere, joma dao ẹgba mai kpobi re ma ruẹ nọ ma sae ta usiuwoma kẹ ezae. Nọ ma be daoma ru ere na, jọ u mu omai ẹro inọ Jihova ọ te ghale oma nọ ma be dawo re ma ru oreva riẹ jẹ be roma kẹ iruo Uvie na.