Kọ Whọ Sae Daoma Fi Obọ Họ kẹ Ọrivẹ-Orọo nọ Ọ Rrọ Ukoko na Ha?
1. Amono a gwọlọ nọ erivẹ-orọo nọ e rrọ ukoko ho a ziọ ukoko na?
1 Kọ iwhowho-uvie jọ evaọ ukoko ra a wo ọzae hayo aye nọ ọ rrọ ukoko na ha? Ababọ avro, iwhowho-uvie enana e gwọlọ nọ erivẹ-orọo rai a kuomagbe ae gọ Jihova. Orọnikọ ae ọvo a gwọlọ onana ha. Wọhọ Ọghẹnẹ, ukoko na soso o gwọlọ nọ “ahwo kpobi a wo usiwo, re a ze te riẹ uzẹme na.” (1 Tim. 2:4) Ẹvẹ ma sae rọ daoma jọ ukoko mai fi obọ họ kẹ erivẹ-orọo nọ e rrọ ukoko na ha?
2. Ẹvẹ orimuo u re ro fi obọ họ kẹ omai yerikugbe ọrivẹ-orọo nọ ọ rrọ ukoko ho?
2 Orọ ọsosuọ, ma rẹ daoma riẹ eriwo ọnọ ọ rrọ ukoko ho na. Erivẹ-orọo buobu nọ e rrọ ukoko na ha a you uviuwou rai jẹ be daoma jọ uvi erivẹ-orọo gbe emamọ esẹ hayo ini. O sae jọnọ a wo iwuhrẹ egagọ rai nọ i wo ohẹriẹ no emai. Ẹsejọhọ a riẹ kpahe Isẹri Jihova tere he ajokpaọ eme nọ egbẹrioma rai nọ e riẹ kpahe omai ziezi hi hayo nọ e rẹ gbẹroma a ta kẹ ae no. Ejọ e rẹ dheva fikinọ erivẹ rai a be rehọ oke nọ a jẹ hae raha kugbe uviuwou na ru iruẹru egagọ. Orimuo u ti fi obọ họ kẹ omai yerikugbe ọnọ ọ rrọ ukoko ho na avọ ẹwo gbe adhẹẹ jẹ rọ ere whaha ozọ nọ ma tẹ rrọ kugbei.—Itẹ 16:20-23.
3. Edhere vẹ ọ mai woma nọ a sae rọ dẹ ọnọ ọ rrọ ukoko ho rehọ?
3 Wo Isiuru Kpahe ae: Edhere nọ ọ mai woma nọ ma sae kake rọ dẹ ọrivẹ-orọo mai rehọ ziọ ukoko na họ uruemu mai, orọnikọ ẹmeọta kpahe Ebaibol ho. (1 Pita 3:1, 2) Uvi isiuru nọ ma re dhesẹ kpahe ohwo otiọye u wuzou. Inievo-emetẹ a rẹ sai dhesẹ isiuru kpahe aye nọ ọ rrọ ukoko ho, yọ inievo-emezae a rẹ sai ru epọvo na kpahe ọzae nọ ọ rrọ ukoko na ha. Evaọ oghẹrẹ vẹ?
4. Ẹvẹ ma sai ro dhesẹ isiuru kpahe ọrivẹ-orọo nọ ọ rrọ ukoko ho?
4 Otẹrọnọ who ri lele ọrivẹ oniọvo na ta ẹme ẹdẹvo ho, whọ rẹ sai ru ere nọ whọ tẹ nọ oniọvo na kpahe ọrivẹ riẹ no. Jọ o kẹ owhẹ uye he nọ ọ gbẹ sasa oma ziezi kẹ owhẹ hẹ evaọ oke ọsosuọ. Oma nọ ma be sasa kẹe gbe isiuru nọ ma bi dhesẹ kpahe iẹe o sai ru ei rehọ emamọ ubiẹro rri Isẹri Jihova. (Rom 12:20) Inievo jọ a re zizie ohwo otiọye avọ uviuwou riẹ kẹ emuọriọ, re a sae riẹ ohwo na ziezi jẹ rehọ ere si ekpehre iroro nọ o wo kpahe omai no udu riẹ. A rẹ jọ oke yena ta kpahe eware nọ e rẹ were ohwo na viukpọ eme Ebaibol. Uwhremu na, nọ Isẹri na a tẹ reria ohwo na oma no omojọ, a sai lele iei ta ẹme kpahe Ebaibol. Hayo ọ sae rọwo nọ a te zizie iei kpohọ ewuhrẹ re ọ ruẹ eware nọ aye riẹ o bi wuhrẹ, maero nọ ọ riẹ inievo jọ no na. Ọ gbẹ make gwọlọ wuhrẹ uzẹme na ha, a rẹ sai jiri ei fiki obọ nọ o bi fihọ kẹ ọrivẹ riẹ nọ ọ rrọ ukoko na.
5. Ẹvẹ ekpako na a sae rọ nyate ọrivẹ-orọo nọ ọ rrọ ukoko ho oma?
5 Ekpako na a rẹ daoma nyate erivẹ-orọo nọ e rrọ ukoko ho oma jẹ rehọ uvẹ kpobi nọ u rovie fihọ rọ ta usiuwoma kẹ ae. Ọrivẹ-orọo nọ ọ be gaviezọ kẹ eme Ebaibol vẹre he ọ sae gaviezọ kẹ uduotahawọ nọ u no Ebaibol ze nọ ọ tẹ rrọ ẹsipito hayo be mọ okpẹyao. Nọ oware jọ o tẹ via evaọ uviuwou nọ ọrivẹ-orọo na jọ ọ jẹ rrọ egagọ efa, wọhọ nọ ohwo jọ o te whu, ekpako na a sai zizie ọrivẹ otiọye re o kuomagbe ahwo uviuwou riẹ gaviezọ kẹ uduotahawọ nọ a be te kẹ ae.
6. Fikieme ma jẹ daoma fi obọ họ kẹ erivẹ-orọo nọ e rrọ ukoko ho?
6 Dai roro kpahe oghọghọ nọ oniọvo nọ ọrivẹ-orọo riẹ ọ rrọ ukoko ho o re wo nọ ọrivẹ riẹ o te kurẹriẹ! Oyena o rẹ jẹ wha oghọghọ ulogbo se Jihova, ijẹle na, gbe ukoko na soso. (Luk 15:7, 10) Rekọ, ọ gbẹ re make jẹ uzẹme na rehọ họ, ma rẹ sae ghọghọ ghele inọ oma nọ ma be dawo kẹe o be were Jihova, ọnọ “ọ guọlọ nọ ohwo ọvo o whu hu, rekọ ahwo kpobi a zite ekurẹriẹ.”—2 Pita 3:9.
[Ẹme nọ a fi ẹgba họ nọ ọ rrọ ẹwẹ-obe avọ 6]
Edhere nọ ọ mai woma nọ ma sae kake rọ dẹ ọrivẹ-orọo mai rehọ ziọ ukoko na họ uruemu mai, orọnikọ ẹmeọta kpahe Ebaibol ho