Ru Iwuhrẹ Ra Te Ahwo Udu
1. Eme o gwọlọ re a rehọ Ebaibol na ruiruo ziezi evaọ odibọgba na?
1 Etausiuwoma nọ i wo onaa wọhọ Pọl ukọ na, a riẹ inọ re a “yọrọ ẹme uzẹme na ziezi” u viọ ẹme nọ a rẹ ta no Ikereakere na ze ọvo. (2 Tim. 2:15) Nọ ma tẹ be rọ Ebaibol na wuhrẹ, ẹvẹ ma sae rọ ‘ta ẹme ruọ ahwo oma’?—Iruẹru 28:23.
2. Ẹvẹ ma sai ro fi obọ họ kẹ ahwo wo adhẹẹ kẹ Ebaibol na?
2 Se No Ebaibol Ze: Orọ ọsosuọ, si iroro ohwo na kpohọ Ebaibol na evaọ edhere nọ o re ro wo adhẹẹ kẹ uvi ehrẹ nọ e riẹe eva. Ma tẹ be t’ẹme kpahe Ebaibol na avọ imuẹro o rẹ sae lẹliẹ ohwo gaviezọ nọ ma te bi se noi ze. (Hib. 4:12) Ma rẹ sae ta nọ: “Ẹme nọ Ọghẹnẹ ọ ta kpahe oware nana o k’omẹ erere no. Gaviezọ kẹ ẹme nọ Ebaibol na e ta.” Oke kpobi nọ o tẹ lọhọ, se no Ebaibol na ze ovavo.
3. Nọ ma te se oria ikere no, eme ma sai ru ro fi obọ họ kẹ ohwo na wo otoriẹ ikere na?
3 Orọ avivẹ, ru ikere nọ who se na vẹ. O rẹ jọ bẹbẹ kẹ ahwo buobu re a wo otoriẹ oria ikere jọ evaọ oke ọsosuọ nọ a ro sei. O rẹ mae gwọlọ nọ ma dhesẹ oghẹrẹ nọ ikere na i ro kiekpahe oware nọ ma bi wuhrẹ na. (Luk 24:26, 27) Fiẹgba họ igogo eme nọ i wuzou. Nọ ohwo na onọ jọ re ọ ta oghẹrẹ nọ o wo otoriẹ ikere na.—Itẹ 20:5; Iruẹru 8:30.
4. Owojẹ urere vẹ o roja re uwuhrẹ mai o sai te ahwo udu?
4 Rehọ Ikere na Jiroro Kugbei: Orọ avesa, daoma ru ẹme na te ohwo na udu. Fi obọ họ kẹe ruẹ epanọ oria ikere na u ro kpomahọ iẹe. Whọ tẹ rọ Ikereakere na jiroro kugbe ohwo o rẹ sai fi obọ họ kẹe nwene iroro riẹ. (Iruẹru 17:2-4; 19:8) Wọhọ oriruo, nọ who te se Eviavia 21:4 no, whọ rẹ sai dhesẹ epanọ ẹriẹ kpahe eyaa Ọghẹnẹ inọ o ti si uwhu no u re kpomahọ oghẹrẹ nọ ma re rri uwhu. Kẹsena whọ sae nọ ohwo na nnọ, “Kọ ẹvẹ eyaa na inọ uwhu o gbẹ te jọ họ o rẹ sai ro fi obọ họ k’owhẹ thihakọ nọ ohwo ra jọ o te whu?” Whọ tẹ be rọ edhere otiọna dhesẹ oghẹrẹ nọ ikere na i ro kpomahọ ohwo na o rẹ kẹe erere. Ebaibol na nọ ma re ro wuhrẹ ahwo evaọ edhere nọ o re te ai udu o rẹ lẹliẹ ahwo evezi kurẹriẹ ze te gọ Jihova Ọghẹnẹ uzẹme na.—Jeri. 10:10.