Epanọ A rẹ Rọ Tẹzẹ Amọfa
1 A riẹ Pọl ukọ na wọhọ ọgbodibo nọ o wo ona ẹtẹzẹ. (Iruẹru 19:26) Makọ Agripa Ovie na dede ọ ta kẹe nọ: ‘U ti lehie he who ti ru omẹ họ ohwo Kristi.’ (Iruẹru 26:28) Eme ọ lẹliẹ odibọgba Pọl wo ona ẹtẹzẹ tere? Ọ rẹ jiroro egbagba no Ikereakere ze, je nwene iroro-ejẹ riẹ lele enọ e be gaviezọ kẹe.—Iruẹru 28:23.
2 Evaọ aruorokele Pọl, u fo nọ ma re wo ona ẹtẹzẹ re evaọ odibọgba mai. Evaọ oghẹrẹ vẹ? Ẹkwoma efihiruo orimuo evaọ okenọ ma tẹ be t’ẹme kugbe jẹ gaviezọ kẹ amọfa. (Itẹ 16:23) Owojẹ esa jọ nọ i wuzou i ti fiobọhọ k’omai ru onana gba.
3 Gaviezọ Ziezi: Nọ ohwo ọdekọ na ọ be t’ẹme na, gaviezọ re whọ ruẹse ruẹ oware nọ whai imava a jọ rọwo kugbe nọ whọ rẹ ta kpahe. Ọ tẹ kpare avro jọ, daoma riẹ ẹjiroro nọ ọ rọ emu riẹ. U ti fiobọhọ k’owhẹ riẹ uzedhe oware nọ ọ rọwo, oware nọ ọ jẹ rọwo iẹe, gbe oware nọ o kẹ riẹ imuẹro kpahe iẹe. (Itẹ 18:13) Rehọ areghẹ riẹ onana mi ei.
4 Nọ Enọ: Otẹrọnọ ohwo o dhesẹ orọwọ kpahe Esanerọvo na, whọ sae nọ nnọ: “Kọ whọ rọwo Esanerọvo na n’otọ ze?” Whọ vẹ nọ lele iei nọ: “Kọ whọ sai wuhrẹ didi kpahe oware nọ Ebaibol na ọ ta kpahe uzoẹme na no?” Whọ sae jẹ nọ inọ: “Otẹrọnọ Ọghẹnẹ yọ abọjọ Esanerọvo, kọ ma gbe rẹro nọ Ebaibol na ọ te ta ere vevẹ?” Uyo nọ ọ k’owhẹ u ti fiobọhọ k’owhẹ lele ohwo na jiroro kpahe oware nọ Ikereakere na e ta.
5 Fi Iroro Egbagba Họ Iruo: Osẹri jọ ọ nọ aye jọ nọ ọ rọwo nọ Jesu yọ Ọghẹnẹ inọ: ‘Whọ tẹ gwọlọ dhesẹ inọ imava e rrọ ẹrẹrẹe, ahwo uviuwou vẹ whọ sai ro dhesẹ iẹe?’ Aye na ọ tẹ kuyo nọ: “Mẹ sae rehọ inievo ivẹ ro dhesẹ iẹe.” Osẹri na o te fibae nọ: “Ẹsejọhọ whọ sae tubẹ rehọ ejime nọ i thoma ro dhesẹ iẹe. Rekọ nọ o wuhrẹ omai re ma rri Ọghẹnẹ wọhọ Ọsẹ je rri ọye omariẹ wọhọ Ọmọ, didi ovuẹ Jesu ọ be k’omai na?” Ẹme na o te vẹ aye na ẹro nọ ọjọ ọ mae kpako jẹ mai wo ogaga. (Mat. 20:23; Jọn 14:28; 20:17) A rehọ ona ẹtẹzẹ rọ nyate iroro gbe udu riẹ.
6 Dede na, orọnikọ ohwo kpobi o re dede uzẹme na rehọ họ, makọ epanọ ẹme mai o wo iroro jẹ gba te. Rekọ wọhọ Pọl, joma rehọ osegboja gwọlọ ahwo udu-oruọzewọ via evaọ ẹkwotọ mai, tẹzẹ ae re a dede ovuẹ Uvie na rehọ.—Iruẹru 19:8.