Rehọ Emamọ Iruo Rọ Kẹ Jihova Orro
1 Okenọ ofou-ọwhibo o te ko owhẹ họ, ẹvẹ u re woma te re whọ ruẹ uwou adhẹzọ! Uwou na o tẹ rọ ruọruọruọ je wo ufuoma yọ otẹrọnọ ahwo nọ e be rria etẹe a re dede ahwo rehọ, eva e te were owhẹ re whọ jọ etẹe. Iruo usiuwoma ota Uvie na o rẹ kpọ ahwo kpohọ oria adhẹzọ otiọye na no eyero Setan. Kọ uruemu ikẹdẹ kẹdẹ mai o sai fiobọhọ kẹ amọfa ruẹ epanọ oria adhẹzọ nana o siuru te? E, keme Jesu ọ ta nọ ahwo a te ‘ruẹ iruo iwoma mai, a ve jiri Ọsẹ mai nọ ọ rọ obọ odhiwu.’—Mat. 5:16.
2 Didi uruemu ma re dhesẹ re iruo mai e sai si amọfa bru Jihova gbe ukoko riẹ ze? Ẹkwoma uvẹ nọ ma rẹ kẹ re eme Jesu nọ a kere fihọ Luk 6:31 gbe 10:27 na e kpọ uzuazọ mai kẹdẹ kẹdẹ. Onana o te k’omai ọwhọ re ma dhesẹ ororokẹ oyoyou kẹ erivẹ, nọ o rẹ hẹriẹ omai no akpọ okpikpimẹ gbe ọrọ ababọ ororokẹ ọnana.
3 Oniọvo-ọmọtẹ jọ nọ ọ ruọ okọ o muẹrohọ upelẹ aye jọ nọ ọ jẹ mọ fiki ofou ame na te epanọ ọ gbẹ sae jẹ rẹrote ọmọ ọkakao riẹ hẹ. Oniọvo-ọmọtẹ na ọ tẹ ta nọ ọ rẹ rẹrote ọmọ na. Okenọ aye na ọ nọ kpahe epanọ ọ sai ro dhesẹ uyere riẹ, oniọvo-ọmọtẹ na ọ tẹ ta nọ: ‘Ivie gaviezọ kẹ Isẹri Jihova nọ a te weze bru owhẹ ze okiofa.’ Aye na o te ru ere, yọ enẹna tei te ọzae riẹ a rọ Isẹri. Emamọ iruo i fi ohẹriẹ họ epanọ a j’owọ kẹ ovuẹ Uvie na.
4 U Kpomahọ Uzuazọ Mai Kpobi: Uruemu mai evaọ okegbe na, eva oria iruo hayo obọ isukulu, gbe etoke arozaha o rẹ lẹliẹ amọfa wo oghẹrẹ iroro jọ kpahe omai gbe egagọ mai. Fikiere, u re fo re ma nọ oma mai nọ: ‘Ẹvẹ ahwo a bi rri omẹ gbe uviuwou mẹ? Kọ erivẹ na a bi rri uwou gbe ighẹ mai wọhọ oria ofuafo nọ o rọ kpatiẹ? Kọ ibe-iruiruo gbe ibe-isukulu mai a bi rri omai wọhọ ahwo nọ a rẹ nya lele oke avọ osegboja? Kọ amọfa a be ruẹ nọ ẹgọ mai ọ rrọ kpatiẹ avọ adhẹẹ?’ Emamọ iruo mai e sai ru egagọ Jihova siuru viere kẹ amọfa.
5 Pita ọ vẹvẹ unu nọ a te poviẹ Ileleikristi. (1 Pita 4:4) U re mu omai ẹro nọ uruemu mai o be wha eme iyoma ze he. (1 Pita 2:12) Otẹrọnọ iruo ekẹdẹ kẹdẹ mai e be kẹ Ọghẹnẹ nọ ma be gọ orro, koyehọ ma te jọ wọhọ ikpẹ nọ a kru kpehru, nọ i bi si amọfa ziọ oria adhẹzọ nọ Jihova ọ ruẹrẹhọ.—Mat. 5:14-16.