Kọ Mẹ be Daoma Te?
1. Eme uvi Oleleikristi ọ rẹ sae ruawa kpahe?
1 Kọ whẹ nọ oma ra onọ nana no ẹdẹjọ? Ẹsejọhọ o be kẹ owhẹ uye inọ whọ gbẹ be jọ iruo odibọgba na wobọ te epaọ ọsosuọ họ fiki owho, ẹyao, hayo ewha-iruo uviuwou. Oniọvo-ọmọtẹ jọ nọ o wo emọ esa o kere nọ, ẹsejọ o rẹ kẹe uye gaga inọ ewha-iruo uviuwou riẹ i bi mi ei oke gbe ẹgba nọ ọ hẹ sai ro ru iruo odibọgba na no. Eme o re fi obọ họ kẹ omai nọ ma gbe roro vrẹta ha?
2. Eme Jihova o rẹro riẹ mi omai?
2 Oware nọ Jihova O Rẹro Riẹ Mi Omai: Ababọ avro, mai kpobi ma gwọlọ ru utho ẹgba mai evaọ iruo odibọgba na. Rekọ ohẹriẹ ulogbo o rrọ oware nọ ma gwọlọ ru gbe oware nọ ma rẹ sai gine ru. Iroro ọ ma gwọlọ ru vrẹ epanọ ma bi ru vẹre u dhesẹ nọ ma se iruo na gboja. Ma rẹ kareghẹhọ nọ Jihova ọ riẹ utho nọ ma rẹ sai ru yọ orọnikọ ọ gwọlọ mi omai vrẹ onọ ma rẹ sai gine ru hu. (Ol. 103:13, 14) Eme o rẹro riẹ mi omai? Ọ gwọlọ nọ ma gọe no eva ze, jẹ rehọ ẹgba mai kpobi ru iruo riẹ.—Kọl. 3:23.
3. Ẹvẹ ma sae rọ kiẹ omodawọ mai riwi evaọ odibọgba na?
3 Eme o re fi obọ họ kẹ omai riẹ oware nọ ma rẹ sai gine ru? Ma rẹ yare Jihova re o fi obọ họ kẹ omai vuhu onana mu. (Ol. 26:2) Oware ofa jọ nọ o sai fi obọ họ họ, ibe Oleleikristi nọ ọ kpako ziezi evaọ abọ-ẹzi jẹ riẹ omai ziezi, ọnọ ọ rẹ sae gbaudu ta kẹ omai inọ u fo re ma gbe wo ẹnyaharo. (Itẹ 27:9) Kareghẹhọ re inọ uyero o sai nwene, fikiere u re woma re ma kiẹ uyero mai riwi kẹse kẹse.—Ẹf. 5:10.
4. Ẹvẹ u fo nọ ma re rri ekareghẹhọ nọ a be kẹ omai kpahe iruo odibọgba na?
4 Oghẹrẹ nọ Ma re Rri Ekareghẹhọ: Nọ ahwo a tẹ be dhẹ ohrẹ, enọ i bi rri ughe a rẹ koyẹ kẹ ae. A re ru oyena rọ tuduhọ ahwo na awọ re a sae dhẹ te oka, orọnikọ re o wha elọhoma fihọ ae oma ha. Epọvo na re, uduotahawọ gbe ekareghẹhọ nọ a be kẹ evaọ iwuhrẹ gbe ebe mai re ma ‘vuẹ ẹme na avọ ọwhọ’ na e rrọ rọkẹ erere mai orọnikọ fikinọ ma be daoma tehe he. (2 Tim. 4:2) U mu omai ẹro inọ ma tẹ ruabọhọ be dao ẹgba mai kpobi, Jihova ọ te kareghẹhọ ‘iruo mai gbe uyoyou’ nọ ma wo kẹe.—Hib. 6:10.