Kọ Who You Ekareghẹhọ Jihova Gaga?
“Ẹzi mẹ o bi se isẹri ra; me you rai thesiwa.”—OLEZI 119:167.
1. Diẹse ma rẹ mae jọ ruẹ ekareghẹhọ Jihova nọ a wariẹ unuẹse buobu?
JIHOVA ọ gwọlọ nọ ahwo riẹ a wereva. Rekọ re ma sai wo uvi evawere, ma rẹ nya evaọ uzi Ọghẹnẹ je koko ijaje riẹ. Re oyena o sae lọhọ, ọ k’omai ekareghẹhọ riẹ. A wariẹ enana unuẹse buobu evaọ Ikereakere na, maero evaọ Olezi 119, onọ o wọhọ nọ Hẹzikaya Ọmọ-Ovie ovrawha Juda na o kere. Ole awere nana o rehọ eme nana muhọ: “Oghale u te otu nọ edhere rai ọ kare afuẹwẹ, nọ e be nya eva ujaje ỌNOWO! Oghale u te otu nọ i bi koko isẹi riẹ, nọ ebe rọ eva rai kpobi gwọlọ iẹ.” (Olezi 119:1, 2)
2. Didi obọ ekareghẹhọ Ọghẹnẹ i wo kugbe evawere?
2 Ma rẹ “nya eva ujaje ỌNOWO” na ẹkwoma ẹrehọ eriariẹ egbagba Ẹme riẹ je fi ai h’iruo evaọ uzuazọ. Rekọ nọ ma gba ha na, ma gwọlọ ekareghẹhọ. Ubiẹme Hibru nọ a fa ‘ekareghẹhọ’ no ze na u dhesẹ nọ Ọghẹnẹ ọ rẹ kareghẹhọ omai izi gbe ijaje riẹ. (Matiu 10:18-20) Eva e rẹ were omai otẹrọnọ ma be hai koko ekareghẹhọ itieye na, keme i re fiobọhọ k’omai whaha egbefẹ abọ-ẹzi nọ e rẹ wha okpẹtu gbe uweri ze.
Dhẹgbalọ Ekareghẹhọ Jihova
3. Fiki eme nọ e rọ Olezi 119:60, 61 na, didi evaifihọ ma wo?
3 Ekareghẹhọ Ọghẹnẹ e jọ ghaghae kẹ ọso-ilezi na ọnọ ọ so nọ: “Eva ọwhọwhọ avọ ababọ oke oraha, me bi ro koko ijaje ra. Dede nọ ifi ahwo umuomu egba omẹ, uzi ra [o] sae thọrọ omẹ ẹro ho.” (Olezi 119:60, 61) Ekareghẹhọ Jihova i re fiobọhọ k’omai thihakọ ukpokpoma keme ma wo evaifihọ nnọ Ọsẹ obọ odhiwu mai ọ rẹ sai bru ifi awhaha nọ ewegrẹ e rọ gba omai no. Evaọ ẹruoke o ve si ezadhe itieye na n’omai oma re ma sae wha iruo usiuwoma ota Uvie na haro.—Mak 13:10.
4. Didi owọ ma rẹ jẹ kpahe ekareghẹhọ Ọghẹnẹ?
4 Ẹsejọ ekareghẹhọ Jihova e rẹ kpọ omai vi. Joma wo ovuhumuo kẹ ọkpọvio otiọye na wọhọ epanọ ọso-ilezi na o ru na. Ọ rehọ oma olẹ ta kẹ Ọghẹnẹ nọ: “Eva isẹri-ise ra mẹ jẹ ghọghọ. . . . Me you isẹri-ise ra.” (Olezi 119:24, 119) Ma wo ekareghẹhọ Ọghẹnẹ bu vi enọ ọso-ilezi na o wo. Eme udhusoi buobu nọ a wariẹ no Ikereakere Hibru na ze nọ e rọ Ikereakere Griki na orọnikọ e kareghẹhọ omai ijaje Jihova kẹ ahwo riẹ evaọ otọ Uzi na ọvo ho rekọ te ẹjiroro riẹ kpahe ukoko Ileleikristi na. Nọ Ọghẹnẹ ọ tẹ ruẹ nọ u fo re ọ kareghẹhọ omai eware nọ i kpomahọ izi riẹ, ma rẹ wereva kẹ ọkpọvio otiọye na. Yọ ẹkwoma ‘ẹdhẹgbalọ izi ỌNOWO na,’ ma rẹ whaha isiuru uzioraha nọ e rẹ dha Ọnọma omai eva je mi omai evawere.—Olezi 119:31.
5. Ẹvẹ ma re ro you ekareghẹhọ Jihova thesiwa?
5 Ẹvẹ ma re you ekareghẹhọ Jihova te? Ọso-ilezi na ọ so nọ: “Ẹzi mẹ o bi se isẹri ra; me you rai thesiwa.” (Olezi 119:167, ẹjẹlẹ ibieme na ọmai.) Ma re you ekareghẹhọ Jihova thesiwa otẹrọnọ ma rri jẹ jẹ ae rehọ wọhọ uthubro Ọsẹ nọ ọ be ghinẹ daezọ mai. (1 Pita 5:6, 7) Ma gwọlọ ekareghẹhọ riẹ, yọ uyoyou mai kẹ ai o te rro viere nọ ma be ruẹ erere nọ e be k’omai na.
Oware nọ Ma Jẹ Gwọlọ Ekareghẹhọ Ọghẹnẹ
6. Eme họ ẹjiroro jọ nọ ma jẹ gwọlọ ekareghẹhọ Jihova, kọ eme o re fiobọhọ k’omai kareghẹhọ ai?
6 Ẹjiroro jọ nọ ma jẹ gwọlọ ekareghẹhọ Jihova họ ma wo ethẹro. Enẹ The World Book Encyclopedia o ta: “Evaọ ẹsibuobu, nọ oke o be nyaharo na, evuẹ e rẹ thọrọ ahwo ẹro viere. . . . Ẹsejọhọ o via k’owhẹ no nọ whọ sae kareghẹhọ odẹ jọ họ hayo ovuẹ jọ nọ whọ riẹ gaga vẹre. . . . Oware utioye nọ o rẹ dina v’ohwo ẹro na a re se ethẹro. Ekiotọ-eriariẹ a rehọ e riẹ wawo omodawọ nọ a rẹ rọ gwọlọ oware jọ evaọ ubrukpẹ nọ eware e vọ. . . . Emamọ edhere nọ whọ rẹ rọ ruẹ nọ whọ kareghẹhọ ovuẹ jọ họ who re wuhrẹ iẹe nọ who te roro nọ whọ riẹ riẹ gbagba no.” Uwuhrẹ owhawha gbe ẹwariẹ i re fiobọhọ k’omai kareghẹhọ ekareghẹhọ Ọghẹnẹ je koko ai rọkẹ ewoma obọ mai.
7. Fikieme ma jẹ gwọlọ ekareghẹhọ Ọghẹnẹ nẹnẹ vi anwẹdẹ?
7 Ma gwọlọ ekareghẹhọ Jihova nẹnẹ vi epaọ anwẹdẹ keme emuemu o bu vrẹta no evaọ ikuigbe ohwo-akpọ. Ma tẹ gaviezọ kẹ ekareghẹhọ Ọghẹnẹ, ma re wo orimuo nọ o gwọlọ re ma whaha eviẹhọ ruọ idhere imuomu akpọ na. Ọso-ilezi na ọ ta nọ: “Me wo eriariẹ vi iwuhrẹ mẹ kpobi, keme isẹi ra họ iroro mẹ. Mẹ riẹ vi ahwo anwae, keme me koko ijaje ra. Me si awọ mẹ kpobi no edhere oyoma, re mẹ ruẹse koko eme ra.” (Olezi 119:99-101) Ẹkwoma ekoko ekareghẹhọ Ọghẹnẹ, ma te kẹnoma no “edhere oyoma” kpobi jẹ whaha ẹjọ wọhọ ogbotu ahwo-akpọ, enọ “otoriẹ rai u re biebi, nọ i vru nọ uzuazọ nọ Ọghẹnẹ ọ kẹ rae.”—Ahwo Ẹfẹsọs 4:17-19.
8. Ẹvẹ ma rẹ rọ thoma mai viere re ma thihakọ edawọ ẹrọwọ avọ obokparọ?
8 Ma gwọlọ ekareghẹhọ Ọghẹnẹ re keme e rẹ b’omai ga thihakọ edawọ buobu erọ “oke urere” nana. (Daniẹl 12:4) Ababọ ekareghẹhọ itieye na, ma re zihe ruọ ‘enọ i yo no o thọrọ ae ẹro.’ (Jemis 1:25) Rekọ uwuhrẹ omobọ ohwo gbe ọrọ ukoko na avọ osegboja ẹkwoma obufihọ ebe nọ i n’obọ ‘ọrigbo nọ o wo ẹrọwọ avọ areghẹ na’ ze i ti fiobọhọ k’omai thihakọ edawọ ẹrọwọ avọ obokparọ. (Matiu 24:45-47) Eruẹrẹfihotọ abọ-ẹzi itieye na i ti fiobọhọ k’omai riẹ oware nọ ma rẹ sai ru re ma ru Jihova eva were nọ ma tẹ rrọ iyero edawọ.
Abọ Ologbo ọrọ Iwuhrẹ Mai
9. Amono họ “ekẹ ahwo” na, kọ ẹvẹ a bi ro fiobọhọ kẹ ibe enọ e rọwo?
9 A re ru abọjọ ẹgwọlọ mai ọrọ ekareghẹhọ Ọghẹnẹ gba eva iwuhrẹ Ileleikristi, oria nọ inievo nọ a ro mu a rẹ jọ kẹ ithubro. Pọl ukọ na o kere nọ okenọ Jesu “o muvrẹ kpo ehru no, o te su enọ e rọ igbo kpo igbo, [jẹ kẹ ekẹ ahwo].” Pọl o te fibae nọ: “[Kristi] ọ tẹ kẹ otu jọ re a jọ ikọ, ejọ eruẹaro, ejọ etausiuwoma, ejọ [ithuru-igodẹ] gbe iwuhrẹ; fiki oma-othọvẹre erezi na, rọkẹ iruo odibo ẹme na ọgba fiki ebabọ oma Kristi.” (Ahwo Ẹfẹsọs 4:8, 11, 12) Ẹvẹ eva e rẹ were omai te inọ “ekẹ ahwo” nana—ekpako nọ a ro mu na—a be kpọ ovao mai kpohọ ekareghẹhọ Jihova okenọ ma te kokohọ kẹ egagọ!
10. Eme họ ugogo ẹme Ahwo Hibru 10:24, 25 na?
10 Uyere kẹ eruẹrẹfihotọ Ọghẹnẹ o rẹ w’omai jọ iwuhrẹ ukoko isoi mai na k’oka k’oka. Pọl o dhesẹ epanọ u wuzou te re ma kokohọ ẹsikpobi. O kere nọ: “Jọ mai ohwo o he roro epanọ ọ rẹrọ jaja ọrivẹ riẹ oma, re o wo uyoyou, je ru iruo ezi kpobi, [wha hẹ] se oma ba e kugbe he, wọhọ epanọ uruemu otu jọ o rọ, rekọ whai ohwo ọ hẹ ta udu họ ohwo awọ, ofa riẹ, wha riẹ nọ ẹdẹ na ọ kẹlino.”—Ahwo Hibru 10:24, 25.
11. Ẹvẹ iwuhrẹ ẹkpoka mai na ọvuọvo e rọ rrọ erere k’omai?
11 Kọ who wo ovuhumuo oware nọ iwuhrẹ mai i bi ru k’omai? Ewuhrẹ Uwou-Eroro ẹkpoka na ọ rẹ bọ ẹrọwọ mai ga, fiobọhọ k’omai nya lele ekareghẹhọ Jihova, jẹ thọ omai wọso “ẹzi akpọ na.” (1 Ahwo Kọrint 2:12; Iruẹru 15:31) Eva Ewuhrẹ Ogbotu na, iruẹme e rẹ rehọ ithubro no Ẹme Ọghẹnẹ ze, kugbe ekareghẹhọ Jihova avọ “eme uzuazọ ebẹdẹ bẹdẹ” igbunu Jesu. (Jọn 6:68; 7:46; Matiu 5:1–7:29) Isukulu Odibọgba Ọghẹnẹ na o re ru ona uwuhrẹ mai w’oma viere. Ẹnyaharo nọ Ewuhrẹ Odibọgba na o re fiobọhọ k’omai ru evaọ edhere-ẹmeọta ọ usiuwoma n’uwou ruọ uwou, ozihebro, ebe iwuhrẹ Ebaibol, gbe abọ ọfa odibọgba mai na, ọ ghare w’umuo ho. Utu osese eva Uwuhrẹ Obe Ukoko mai na o rẹ k’omai uvẹ ulogbo re ma t’eme nọ i kpomahọ ekareghẹhọ Ọghẹnẹ.
12, 13. Ẹvẹ ahwo Ọghẹnẹ evaọ orẹwho Esia jọ a ro dhesẹ ovuhumuo kẹ iwuhrẹ Ileleikristi no?
12 Iwuhrẹ ukoko nọ ma rẹ jọ ẹsikpobi o rẹ kareghẹhọ omai ijaje Ọghẹnẹ je fiobọhọ ru omai ga evaọ abọ-ẹzi evaọ oke ẹmo, ọbẹwẹ, gbe edawọ ẹrọwọ mai efa. Epanọ iwuhrẹ na i wuzou te u duobọte Ileleikristi 70 jọ nọ a le no iwou rai ruọ owhawho evaọ orẹwho Esia jọ. Avọ ọtamuo re a gbe kokohọ ẹsikpobi, a te zihe kpohọ ẹwho rai nọ ẹmo ọ raha no na, a tẹ fariẹ umutho eware nọ i kiọkọ Ọgwa Uvie na, a tẹ wariẹ bọe fihọ owhawho na.
13 Nọ a thihakọ ẹmo ikpe buobu no evaọ abọ ọfa orẹwho ovona, ahwo Jihova a gbẹ be gọ avọ ọwhọ. A nọ ọkpako-ukoko jọ evaọ oria na nọ: “Eme ọ mai fiobọhọ no evaọ ekokohọ inievo na?” Uyo vẹ ọ kẹ? “Evaọ ikpe 19, uvumọ ewuhrẹ o ti vo omai hi. Ẹsejọ fiki ebọmbo nọ a bi gbolo gbe ebẹbẹ efa, inievo na jọ e rẹ sai te oria ewuhrẹ na ha, rekọ ma re va uvumọ ewuhrẹ hẹ.” Inievo eghaghae nana a ghinẹ riẹ epanọ u wuzou te re a ‘kuomagbe.’
14. Eme ma rẹ sai wuhrẹ no uruemu Anna ọkpọkuaye na ze?
14 Anna, aye-uku ikpe 84 na, “o je no uwou egagọ-ode he.” Fikiere, ọ jariẹ evaọ okenọ a rehọ Jesu ọmọfofa na ziọ etẹe nọ a nwani yẹi no. (Luk 2:36-38) Kọ whọ gba riẹ mu no re iwuhrẹ e siọ owhẹ ba evo? Kọ whọ be daoma ra re whọ kake jariẹ evaọ abọ okokohọ kpobi? Ithubro erere abọ-ẹzi nọ ma rẹ jọ omakugbe enana wo e rẹ k’omai imuẹro ivevẹ inọ Ọsẹ obọ odhiwu mai ọ be sẹro ahwo riẹ. (Aizaya 40:11) Omakokohọ itieye na e rẹ jẹ kẹ oghọghọ, yọ ẹnyaze mai o re dhesẹ ovuhumuo mai rọkẹ ekareghẹhọ Jihova.—Nehemaya 8:5-8, 12.
Ekareghẹhọ Jihova E Lẹliẹ Omai Wo Ohẹriẹ
15, 16. Ẹvẹ ekoko ekareghẹhọ Jihova u re ro kpomahọ uruemu mai?
15 Ekoko ekareghẹhọ Ọghẹnẹ u re fiobọhọ hẹriẹ omai no akpọ omuomu nana. Wọhọ oriruo, ẹmeoyo kẹ ekareghẹhọ Ọghẹnẹ o rẹ th’omai no ọfariẹ-ogbe. (Iziewariẹ 5:18; Itẹ 6:29-35; Ahwo Hibru 13:4) A rẹ sai fi ẹdawọ erueta, ewhariọ, hayo ujitho kparobọ ziezi ẹkwoma ẹmeoyo kẹ ekareghẹhọ Ọghẹnẹ. (Ọnyano 20:15, 16; Iruo-Izerẹ 19:11; Itẹ 30:7-9; Ahwo Ẹfẹsọs 4:25, 28; Ahwo Hibru 13:18) Ẹmeoyo kẹ ekareghẹhọ Jihova o rẹ jẹ th’omai no orukele, ẹgo ofih’eva, hayo odẹ amọfa oraha.—Iruo-Izerẹ 19:16, 18; Olezi 15:1, 3.
16 Ẹkwoma ẹmeoyo kẹ ekareghẹhọ Ọghẹnẹ, ma rẹ jọ fuafo, hayo hẹrioma, kẹ iruo riẹ. Yọ ẹvẹ u wuzou te re a hẹrioma no akpọ nana! Evaọ olẹ se Jihova evaọ aso urere uzuazọ otọakpọ riẹ, Jesu o ru ayare nana kẹ ilele riẹ: “Mẹ kẹ rae ẹme ra; akpọ na o te mukpahe ae, fiki epanọ a rọ e rọ akpọ na ha, wọhọ epanọ mẹ rọ ọ rọ akpọ na ha. Mẹ lẹ nọ who si ai no eva akpọ na ha, rekọ re who siwi ai no obọ oyoma na. A rọ e rọ akpọ na ha, wọhọ epanọ mẹ rọ ọ rọ akpọ na ha. Ru ai erẹri eva uzẹme na; ẹme ra uzẹme.” (Jọn 17:14-17) Joma gbẹ hae rehọ Ẹme Ọghẹnẹ ghaghae, onọ o hẹriẹ omai no kẹ iruo efuafo riẹ na.
17. Eme ọ rẹ sae via otẹrọnọ ma rri ekareghẹhọ Ọghẹnẹ vo, fikiere eme u fo nọ ma re ru?
17 Wọhọ idibo Jihova, ma gwọlọ re a jẹ omai rehọ kẹ iruo riẹ. Rekọ ma te veghe uzou kẹ ekareghẹhọ Ọghẹnẹ, ẹzi akpọ na ọ vẹ te da ruọ omai oma, onọ a be whaharo evaọ ẹmeọta, ebe, ughe, gbe uruemu riẹ na. Yọ ma gwọlọ jọ enọ i you igho ho, otu oheri, omovia, ababọ uyere, ekaela, ofu-ọkpoo, uzou-uveghe, omoya, enọ i you enu-awere siọ Ọghẹnẹ ba—gbe iruemu efa buobu erọ enọ e hẹrioma no Ọghẹnẹ na. (2 Timoti 3:1-5) Nọ ma rria kodo ruọ edẹ urere uyerakpọ omuomu nana no na, joma ruabọhọ ẹlẹ kẹ obufihọ Ọghẹnẹ re ma gbe koko ekareghẹhọ Jihova jẹ rọ ere ‘yọrọ ẹme riẹ.’—Olezi 119:9.
18. Ekoko ekareghẹhọ Ọghẹnẹ u ti ru omai jẹ emamọ owọ vẹ?
18 Ekareghẹhọ Jihova e kẹre vi ozọ nọ i re si omai kpahe eware nọ ma re ru hu ọvo. Ekoko ekareghẹhọ riẹ i re ru omai jẹ emamọ owọ, e rẹ wọ omai fievahọ Jihova vọvọ jẹ rehọ udu, ẹwẹ, iroro, gbe ẹgba mai kpobi you rie. (Iziewariẹ 6:5; Olezi 4:5; Itẹ 3:5, 6; Matiu 22:37; Mak 12:30) Ekareghẹhọ Ọghẹnẹ e rẹ jẹ w’omai you erivẹ mai. (Iruo-Izerẹ 19:18; Matiu 22:39) Ma rẹ mai dhesẹ uyoyou Ọghẹnẹ gbe ọrivẹ ẹkwoma eruo oreva Ọghẹnẹ jẹ ghale “eriariẹ Ọghẹnẹ” nọ e rẹ kẹ uzuazọ na kugbe amọfa.—Itẹ 2:1-5.
Ekoko Ekareghẹhọ Jihova O rẹ Kẹ Uzuazọ!
19. Ẹvẹ ma sai ro dhesẹ k’amọfa nọ u fo je w’erere re a koko ekareghẹhọ Jihova?
19 Ma te koko ekareghẹhọ Jihova je fiobọhọ kẹ amọfa ru ere, ma ti siwi oma mai gbe enọ e kezọ k’omai. (1 Timoti 4:16) Ẹvẹ ma sai ro dhesẹ kẹ amọfa nọ ekoko ekareghẹhọ Jihova u fo je w’erere? Ẹkwoma efihiruo ehri-izi Ebaibol evaọ uzuazọ mai. Enọ “a ro mu kẹ uzuazọ ebẹdẹ bẹdẹ” a ve ti wo imuẹro inọ edhere uzuazọ nọ a dhesẹ via evaọ Ẹme Ọghẹnẹ na họ onọ u fo ẹrria. (Iruẹru 13:48) A vẹ jẹ ruẹ nọ ‘Ọghẹnẹ ọ ghinẹ rọ udevie mai’ oma o vẹ te wọ ae re a kuomagbe omai evaọ egagọ Olori Osu na, Jihova.—1 Ahwo Kọrint 14:24, 25.
20, 21. Eme ekareghẹhọ Ọghẹnẹ gbe ẹzi riẹ i ti fiobọhọ k’omai ru?
20 Ẹkwoma Ikereakere na nọ ma re gbe wuhrẹ, efihiruo eware nọ ma bi wuhrẹ na, jẹ rehọ eruẹrẹfihotọ abọ-ẹzi Jihova ruiruo vọvọ, ma re ti you ekareghẹhọ riẹ thesiwa. Ma te koko ai, ekareghẹhọ nana i ti fiobọhọ k’omai fi “ohwo ọkpokpọ na họ oma, ọnọ a ma tho Ọghẹnẹ eva uvi ẹrẹreokie gbe ẹfuọ.” (Ahwo Ẹfẹsọs 4:20-24) Ekareghẹhọ Jihova gbe ẹzi ọfuafo riẹ i ti ru omai dhesẹ uyoyou, oghọghọ, udhedhẹ, uye oruẹ krẹkri, oma-onyẹ, ewoma, orọwọ, oma-urokpotọ, oma-oyọrọ—ekwakwa nọ e hẹrioma gaga no uruemu akpọ nọ ọ roma hwa ogaga Setan na! (Ahwo Galesha 5:22, 23; 1 Jọn 5:19) Fikiere, ma rẹ kẹ uyere nọ a tẹ kareghẹhọ omai itee Jihova makọ evaọ etoke uwuhrẹ Ebaibol omobọ mai, ẹkwoma ekpako nọ a ro mu na, gbe eva iwuhrẹ gbe ikokohọ mai.
21 Fikinọ ma bi koko ekareghẹhọ Jihova, ma rẹ sae ghọghọ ma tẹ be make ruẹ uye fiki ẹrẹreokie. (Luk 6:22, 23) Ma rẹ rẹroso Ọghẹnẹ re o siwi omai no iyero nọ e mai muozọ kpobi. Onana o mai wuzou enẹna nọ a bi koko erẹwho kpobi kpohọ “ẹdẹ ẹmo ologbo Ọghẹnẹ Erumeru na” eva Amagẹdọn na.—Eviavia 16:14-16.
22. Eme ọ rẹ jọ ọtamuo mai kpahe ekareghẹhọ Jihova?
22 Ma tẹ gwọlọ wo okẹ aruoriwo orọ uzuazọ ebẹdẹ bẹdẹ na, ma re you ekareghẹhọ Jihova thesiwa je koko ai avọ udu mai kpobi. Fikiere joma wo ẹzi ọso-ilezi na ọnọ ọ so nọ: “Isẹri ra ikiẹrẹe ri bẹdẹ; kẹ omẹ otọoriẹ re mẹ ruẹse jọ.” (Olezi 119:144) Yọ joma dhesẹ ọtamuo nọ o dhesẹ oma via evaọ eme ọso-ilezi na: “Me bose owhẹ [Jihova]; siwi omẹ, re mẹ ruẹse vuhu isẹri-se ra.” (Olezi 119:146) Ẹhẹ, ẹkwoma ẹme gbe iruẹru, joma dhesẹ nọ ma ghine you ekareghẹhọ Jihova thesiwa.
Ẹvẹ Whọ te k’Uyo?
• Ẹvẹ ọso-ilezi na o rri ekareghẹhọ Jihova?
• Fikieme ma jẹ gwọlọ ekareghẹhọ Ọghẹnẹ?
• Didi abọ iwuhrẹ mai i wo kpahe ekareghẹhọ Ọghẹnẹ?
• Ẹvẹ ekareghẹhọ Jihova e rẹ rọ hẹriẹ omai no akpọ nana?
[Uwoho nọ o rrọ ẹwẹ-obe avọ 25]
Ọso-ilezi na o you ekareghẹhọ Jihova thesiwa
[Iwoho nọ e rrọ ẹwẹ-obe avọ 26, 27]
Evaọ aruorokele oriruo Anna, kọ whọ gba riẹ mu no re iwuhrẹ e se owhẹ ba evo?
[Uwoho nọ o rrọ ẹwẹ-obe avọ 28]
Ẹmeoyo kẹ ekareghẹhọ Jihova o rẹ hẹriẹ omai no jọ fuafo avọ ọjẹrehọ kẹ iruo riẹ