Kọ Ma Ti Yo Oyena Vẹre?
1 Uzẹme, ma yo rie no! Jihova ọ wariẹ eware buobu evaọ Ẹme riẹ rọkẹ erere ahwo riẹ. Jesu ọ wariẹ iwuhrẹ kpahe abọ sa-sa Uvie na ẹsibuobu. Ikọ riẹ a jẹ hae wariẹ kiẹ eme ọ abọ-ẹzi riwi ẹwẹwariẹ ro kugbe ahwo nọ a riẹ uzẹme na ziezi no.—Rom 15:15; 2 Pita 1:12, 13; 3:1, 2.
2 Evaọ oke mai na ukoko Jihova u ru ọruẹrẹfihotọ no re a hae dhe izoẹme nọ e r’oja ẹwẹwariẹ eva iwuhrẹ ukoko. A wuhrẹ ebe jọ unuẹse buobu no. Ẹhẹ, o r’oja re ma yo eware nọ ma yo no vẹre!
3 Ẹme-Ọwariẹ O Re Ru Ẹgwọlọ Ologbo Jọ Gba: Ekareghẹhọ Jihova i re ru otoriẹ mai kodo viere, ru eriwo mai kẹre, jẹ bọ ọtamuo mai re ma daji edhere abọ-ẹzi ga. (Ol. 119:129) Ẹkiẹkpemu ọrọ itee gbe ehri-izi Ọghẹnẹ o wọhọ ughẹgbe uriwo. U re fiobọhọ k’omai muẹrohọ omobọ mai ziezi jẹ whaha edhesẹ uruemu ọ ‘ọnọ o re yo no o vẹ thọrọ iẹ ẹro.’—Jem. 1:22-25.
4 Otẹrọnọ ma gbẹ be kareghẹhọ oma mai uzẹme na ẹsikpobi hi, eware efa e rẹ ruọ idu mai. Ekareghẹhọ Ọghẹnẹ e rẹ bọ omai ga re ma dadamu kẹ okpomahọ ogbekuo akpọ Setan. (Ol. 119:2, 3, 99, 133; Fil. 3:1) Ekareghẹhọ ẹsikpobi nọ ma bi wo kpahe orugba ẹjiroro Ọghẹnẹ na e rẹ w’omai re ma “roro.” (Mak 13:32-37) Ẹwariẹ uzẹme Ikereakere u re fiobọhọ k’omai daji edhere uzuazọ ebẹdẹ bẹdẹ na.—Ol. 119:144.
5 Epanọ Ma re ro Wo Erere k’Oma Mai: Ma rẹ ‘kpọ eva mai họ edhere ekareghẹhọ Ọghẹnẹ’ hrọ. (Ol. 119:36) Okenọ a tẹ be te ta kpahe uzoẹme nọ ma riẹ kpahe eva ewuhrẹ ukoko, u fo re ma ruẹrẹ oma kpahe re oke u te te, se eria ikereakere nọ a fodẹ na, je roro kpahe oghẹrẹ nọ ma sai ro fi ovuẹ na họ iruo. Joma rri ọkiẹkpemu okerefihotọ evaọ Isukulu Odibọgba Ọghẹnẹ na vo ho, bi roro nnọ u du wo erere k’omai hi. (Luk 8:18) Ma re zihe ruọ enọ e rẹ siọ ezọ ba ẹgaviẹ vievie he fikinọ a bi dhe ugogo izoẹme ẹwẹwariẹ evaọ iwuhrẹ mai.—Hib. 5:11.
6 Joma wo iroro ọso-ilezi na: “Mẹ jọ eva edhere [ekareghẹhọ] ra wo evawere gaga te epanọ u re te ohwo obọ no oghẹrẹ efe kpobi tha.” (Ol. 119:14) Ẹhẹ, ma yo eware eghaghae enana no vẹre, yọ ẹsejọhọ ma te wariẹ yo ai. Fikieme? Keme Jihova ọ riẹ nọ u fo re ma yo ai!