‘Iruo nọ Areghẹ O Ru A re ro Vuhumu Inọ O Kiete’
1. Oghẹrẹ vẹ ahwo jọ a rri iruo mai?
1 Ẹsejọ ma rẹ jọ usiuwoma nyaku ahwo nọ a rẹ ta emiẹsọ kẹ omai fikinọ a riẹ omai ziezi hi hayo a raha Isẹri Jihova kẹ ai no. Ẹsejọhọ a wo eriwo ọthọthọ fiki iyẹrẹ erue nọ a yo hayo se evaọ ekwakwa awhusi. Evaọ eria jọ a bi se omai “ẹko egagọ oyoma.” Eme u fo nọ ma re ru nọ a te bi se omai ekpehre edẹ itieye?
2. Eme o re fi obọ họ kẹ omai whaha elọhoma nọ a te bi se omai ekpehre edẹ?
2 Wereva Ẹsikpobi: Evaọ ikpe-udhusoi ọsosuọ, a ta eme iyoma kpahe Jesu gbe idibo Jihova efa unuẹse buobu. (Iruẹru 28:22) Rekọ, a dhomovuọ iruo odibọgba na fiki ekpehre edẹ nọ a je se ai hi. Jesu ọ ta nọ: ‘Iruo nọ areghẹ o ru a re ro vuhumu inọ o kiete.’ (Mat. 11:18, 19) Ọ rehọ ajọwha ruabọhọ eruo oreva Ọsẹ riẹ, yọ o fi eva họ inọ enọ e gwọlọ ginẹ riẹ uzẹme na a te ruẹ aghare emamọ usi na. Ma tẹ be kareghẹhọ nọ a ru Ọmọ Ọghẹnẹ epọvo na, ma sae whaha elọhoma.
3. Fikieme iyẹrẹ erue nọ a nẹ kpahe omai gbe ọwọsuọ i gbe ro gbe omai unu hu?
3 Jesu ọ ta nọ akpọ na o ti mukpahe ilele riẹ wọhọ epanọ a mukpahe iẹe. (Jọn 15:18-20) Fikiere, u re gbe omai unu hu nọ a tẹ n’iyẹrẹ erue kpahe omai hayo wọso omai. Ma re tube rẹro eware itieye vi epaọ ọsosuọ nọ ma be rria kodo ruọ edẹ urere na, gbe nọ ofu Setan o bi dhe ẹgẹga na. (Evia. 12:12) Eva e rẹ were omai inọ kẹle na a te raha akpọ Setan no.
4. Nọ a tẹ be ta eme iyoma kẹ omai fiki usiuwoma na, ẹvẹ u fo nọ ma re ru?
4 Kpahe Eme Iwowolẹ: Nọ a tẹ ta ẹme oyoma kẹ omai, joma kpahe eme iwowolẹ ẹsikpobi. (Itẹ 15:1; Kọl. 4:5, 6) O tẹ lọhọ, ma rẹ sai dhesẹ kẹ ohwo nọ ọ ginẹ gwọlọ riẹ inọ a ta erue buobu kpahe Isẹri Jihova no hayo nọe oware nọ o lẹle riẹ roro ere kpahe omai. Eme iwowolẹ mai e sae lẹliẹe ruẹ nọ Isẹri Jihova a rrọ epanọ a bi dhesẹ ai na ha, ọ vẹ te gaviezọ kẹ usiuwoma oke ofa. Rekọ nọ eva e tẹ be dha ohwo na gaga, o rẹ mai woma re ma nya se iẹe ba. Jọ u mu omai ẹro inọ makọ oghẹrẹ kpobi nọ amọfa a rri omai kẹhẹ, Jihova o rri iruo odibọgba mai ghaghae.—Aiz. 52:7.