“Lele Ahwo Kpobi Ria Dhedhẹ”
1. Ohrẹ Ebaibol vẹ ma re fihọ iruo nọ ma tẹ nyaku ahwo nọ eva e be dha?
1 Mai idibo Jihova ma rẹ rria dhedhẹ kugbe ahwo, yọ ovuẹ udhedhẹ ma be vuẹ. (Aiz. 52:7) Rekọ ẹsejọ ma rẹ nyaku ahwo nọ eva e rẹ dha fikinọ ma nyae ta usiuwoma kẹ ae. Kọ ẹvẹ ma sai ro dhesẹ nọ mai yọ ahwo nọ a gwọlọ udhedhẹ nọ ma tẹ nyaku ahwo otiọye na?—Rom 12:18.
2. Fikieme ma jẹ daoma wo otoriẹ oware nọ o be lẹliẹ eva dha ohwo?
2 Wo Otoriẹ Oware nọ O Soriẹ: Ejọ a re le omai fikinọ iwuhrẹ Isẹri Jihova e rẹ dha ae eva, amọfa fiki eware efa. O sae jọnọ ohwo na o bi ru oware jọ evaọ oke nọ ma rọ nya na, hayo o wo ẹbẹbẹ jọ nọ o be kẹe uye. O tẹ make rọnọ usiuwoma nọ ma nyae ta kẹe oye o dha riẹ eva, o sae jọnọ fikinọ a viẹ riẹ họ no. (2 Kọr. 4:4) Ma te wo otoriẹ oware nọ o soriẹ nọ eva e be rọ dhae, o te whae ze nọ uruemu ohwo na o gbẹ te rọ kẹ omai uye he.—Itẹ 19:11.
3. Ẹvẹ ma sae rọ kẹ ahwo nọ ma be ta usiuwoma kẹ adhẹẹ?
3 Kẹ Ae Adhẹẹ: U wo eware jọ nọ ahwo ẹkwotọ mai a rọwo no emaha rai ze. (2 Kọr. 10:4) A wo udu nọ a rẹ rọ salọ sọ a rẹ gaviezọ kẹ omai hayo a rẹ gaviezọ họ. Ma rẹ ta kẹ ae nọ a wuhrẹ i rai thọ no hayo dhesẹ kẹ ae nọ ma riẹ vi ai hi. Ohwo ọ tẹ ta kẹ omai nọ o bi yo ho, ma rẹ kẹe uvẹ.
4. Ẹvẹ ma sae rọ ta ẹme wowolẹ?
4 Jọ Ẹme Ra Ọ Jọ Wolẹ: A tẹ make la omai eka, ma rẹ rọ unu kpotọ kpahe ẹme kẹ ae. (Kọl. 4:6; 1 Pita 2:23) Ukpenọ who re lele ahwo na vro avro, ta ẹme kpahe oware nọ ma jọ rọwo kugbe. Ma rẹ sae nọ ohwo na oware nọ o je rri ẹme na ere. Ma tẹ ruẹ nọ ẹme na o bi ti su kpohọ avro, o rẹ mai woma re ma ku ẹme na họ bọwo oke ofa.—Itẹ 9:7; 17:14.
5. Erere vẹ o re noi ze nọ ma te ru udhedhẹ kugbe ahwo nọ ma be ta usiuwoma kẹ?
5 Ma tẹ rọ unu kpotọ ta ẹme kẹ ohwo, ẹsejọhọ ohwo na ọ te kareghẹhọ omaurokpotọ mai, jẹ gaviezọ ẹdẹ ọfa nọ oniọvo ọfa ọ tẹ nyae ta usiuwoma kẹe. (Rom 12:20, 21) Ọ tẹ make ta nọ ọ gwọlọ yo vievie he, ọ sai kurẹriẹ ẹdẹjọ. (Gal. 1:13, 14) Ohwo na ọ gbẹ maki kurẹriẹ hẹ, nọ ma te bi dhesẹ nọ ma gwọlọ udhedhẹ, o te wha orro se Jihova, jẹ lẹliẹ amọfa riẹ nọ mai yọ ahwo udhedhẹ.—2 Kọr. 6:3.