Wharo, Ghele na Jọ Ohwo nọ O re Ru Udhedhẹ
1 Ibuobu ahwo nọ ma be hae ta usiuwoma kẹ a rẹ ta eware nọ a rọwo no eva rai kpobi ze, rekọ nọ e wọso uzẹme Ebaibol na. Dedenọ o gba omai họ nọ ma rẹ ta usiuwoma na avọ aruọwha, o gwọlọ re nọ ma re “lele ahwo kpobi ria dhedhẹ” jẹ whaha eva nọ ma re ru dha amọfa. (Rom 12:18; Iruẹru 4:29) Ẹvẹ ma sai rọ wharo yọ ghele na ma bi ru udhedhẹ nọ ma bi whowho ovuẹ Uvie na?
2 Fiẹrohọ Abọ-Ẹme nọ Wha jọ Rọwokugbe: Ohwo nọ o re ru udhedhẹ ọ rẹ whaha ikẹ-isio. Eware nọ ohwo nọ ma be ta usiuwoma kẹ ọ rọwo kekeke nọ ma rẹ ta ẹme wọso evaọ edhere nọ o rẹ kpọe eva u re ru ei nọ ọ jẹ gaviezọ kẹ ovuẹ mai hi. Otẹrọnọ ọ t’ẹme ọthọthọ jọ, ma sae rọ areghẹ mu ẹme jọ họ nọ ma jẹ sae rọwokugbe ohwohwo. Nọ ma te fiẹgba họ eware nọ ma jọ rọwokugbe ohwohwo, ma sae rọ ere si ekpehre iroro nọ o wo kpahe omai no jẹ nyate udu riẹ.
3 Otẹrọnọ ma kpae iroro vrẹ ẹme nọ ọ gba ha nọ ohwo nọ ma be ta usiuwoma kẹ ọ ta, kọ u dhesẹ nọ ma rọwo kugbei hayo ma bi gbe uzẹme na hotọ? Ijo. Iruo mai wọhọ egbodibo Ileleikristi họ, orọnikọ re ma rehọ ẹme kpobi nọ ọ gba ha nọ ohwo ọ ta rọ vravro ho, rekọ re ma ta usiuwoma Uvie Ọghẹnẹ. (Mat. 24:14) Nọ ohwo ọ tẹ t’ẹme nọ ọ gba ha, ukpenọ ma re kpomovuọ họ ohwo na oma, ma sae rehọ iẹe wọhọ uvẹ nọ ma rọ riẹ iroro ohwo na.—Itẹ 16:23.
4 Rọ Ọghọ kẹ Ohwo nọ Whọ be Ta Ẹme Kẹ: Oke jọ o rẹ jariẹ nọ o rẹ gwọlọ nọ ma rehọ aruọwha gbe ududu t’ẹme nọ ma tẹ be kpọ iwuhrẹ ethọthọ vi. Rekọ wọhọ ahwo nọ a re ru udhedhẹ, ma rẹ whaha ẹkoko-ose gbe eme atahwẹ nọ ma re ro dhesẹ ahwo nọ a rọwo je bi wuhrẹ eware ethọthọ. Uruemu ọ ma riẹ vi amọfa nọ ma re dhesẹ u re ru nọ amọfa a gbẹ kezọ kẹ omai hi, rekọ uruemu ọ omurokpotọ avọ ẹwo o rẹ lẹliẹ ahwo nọ a you uzẹme na gaviezọ k’omai. Adhẹẹ nọ ma rẹ kẹ ahwo nọ a be gaviezọ k’omai gbe oware nọ a rọwo u re fi ọghọ họ ai oma, u ve ru ei lọhọ nọ a rẹ rọ jẹ ovuẹ mai rehọ.
5 Pọl ukọ na o roro te eware nọ ahwo nọ ọ jẹ ta usiuwoma kẹ a rọwo, ọ tẹ gbẹ edhere nọ ọ rọ ta usiuwoma na kẹ ae evaọ oghẹrẹ nọ u re ro te ai udu. (Iruẹru 17:22-31) Ọ rehọ unevaze ro zihe ruọ ‘eware kpobi kẹ oghẹrẹ ahwo kpobi,’ re ọ “ruẹse siwi ahwo jọ.” (1 Kọr. 9:22) Ma sai ru epọvo na re ẹkwoma udhedhẹ nọ ma re ru kugbe ahwo nọ ma be rọ aruọwha ta usiuwoma na.