Ru Ọnọ Whọ be Ta Usiuwoma kẹ Roro
1. Onaa-ẹmeọta vẹ evaọ usiuwoma o mai woma?
1 Onaa-ẹmeọta vẹ o rẹ mai woma evaọ usiuwoma ota, onọ a rẹ jọ gba ohwo họ rọwo oware manikọ onọ a re jo ru ohwo roro, re ọyọvo ọ jiroro egbagba? Onọ a re jo ru ohwo roro oye Pọl uko na o ro ruiruo nọ ọ jẹ ta ẹme kẹ ahwo Ju evaọ Tẹsalonika, fikiere, ‘otu rai jọ a te kurẹriẹ.’ (Iruẹru 17:2-4) Ẹvẹ ma sai ro ru amọfa roro?
2. Ẹvẹ ma sae rọ rehọ aro kele Pọl nọ ma tẹ be ta usiuwoma?
2 Roro te Oghẹrẹ nọ O te Jọ Ohwo na Oma gbe Uyero Riẹ: Ma tẹ riẹ eware nọ ahwo a rọwo evaọ ẹkwotọ mai, ẹsiẹe ma te mae ro ru ai roro. Eware nọ ahwo Griki nọ e jọ oria nọ a re se Arẹopagọs na a riẹ jẹ rọwo eye Pọl o ro mu ẹme họ kẹ ae. (Iruẹru 17:22-31) Fikiere, nọ whọ tẹ be ruẹrẹ oma kpahe kẹ usiuwoma, roro kpahe eware nọ ahwo ẹkwotọ ra a rọwo gbe enọ e rẹ dhae eva. (1 Kọr. 9:19-22) Nọ ohwo ọ tẹ kpare ẹme-avro jọ ze, daoma ta ẹme jọ nọ wha sae jọ rọwokugbe.
3. Ẹvẹ enọ nọ ma re ro ru ruiruo ziezi o sai ro fi obọ họ kẹ omai ru amọfa roro?
3 Rehọ Enọ Ruiruo Ziezi: Ma sai dhesẹ edhere kẹ ohwo nọ o bi kpohọ erẹ gbagba ha ajokpanọ ma riẹ ugogo oria nọ ọ rrọ. Epọvo na, ma sai ru ohwo jiroro egbagba ha ajokpanọ ma riẹ oghẹrẹ nọ o rri ẹme na. Taure Jesu o te ti lele ohwo ta ẹme nọ u re ru ei roro, ọ jẹ hẹ mae kake nọ enọ. Wọhọ oriruo, nọ ohwo jọ ọ nọ Jesu nọ, “Eme me re ruẹ re [mẹ] reuku uzuazọ ebẹdẹ bẹdẹ?,” Jesu ọ nọ riẹ onọ re ọ riẹ eriwo riẹ taure ọ tẹ kuyo. (Luk 10:25-28) Evaọ oke ofa nọ Pita ọ kuyo thọ, Jesu ọ rọ areghẹ nọe enọ rọ kpọ iroro riẹ vi. (Mat. 17:24-26) Fikiere, nọ ohwo ọ tẹ nọ onọ hayo ta ẹme jọ thọ, ma sae nọe enọ ro ru ei roro ziezi.
4. Fikieme ma jẹ daoma ru ọnọ ma be ta usiuwoma kẹ roro?
4 Ma te ru re ọnọ ma be ta usiuwoma kẹ o roro, yọ ma be rọ aro kele Owuhrẹ Ologbo na Jesu, gbe uvi etausiuwoma ikpe-udhusoi ọsosuọ efa. Ma rẹ whaha ẹta eme nọ i re kpomovuọ họ ohwo na oma. (1 Pita 3:15) Onana o rẹ whae ze nọ ọ jẹ rọwo nọ ma zihe oke ofa.