“Oghẹrẹ nọ A Sae rọ Kẹ Ahwo Emagazini . . . ”

Ma be hae jọ Ewuhrẹ Odibọgba na ta ẹme kpahe oghẹrẹ nọ a sae rọ rehọ emagazini kẹ ahwo. Orọnikọ a rẹ jọ ẹme nana ta kpahe uzoẹme kpobi nọ o rrọ emagazini na ha. Ukpoye, a rẹ ta kpahe epanọ a sae rọ rehọ emagazini na kẹ ahwo. Fikiere, wọhọ epanọ Odibọgba Uvie Mai o be hae ta na, oniọvo nọ o bi ru ẹme nana ọ rẹ ta ẹme kpẹkpẹe nọ o rẹ lẹliẹ emagazini na were ahwo. Ọ vẹ nọ inievo na re a ta kpahe epanọ a sae rọ rehọ emagazini na kẹ ahwo. U fo nọ a rẹ ta ẹme kpahe uzoẹme jọ no taure a te ti kpohọ ọfa, re ohwo kpobi o muẹrohọ epanọ ọ sai ro fi ẹme nọ a be ta na họ iruo. Orọnikọ inievo na a rẹ ta ẹme kpobi nọ a te ta kẹ ohwo nọ a gwọlọ kẹ emagazini na ha, rekọ a rẹ fodẹ onọ jọ nọ o sae lẹliẹ emagazini na were ahwo, a vẹ jẹ fodẹ oria Ebaibol nọ a ti se. Evaọ ukuhọ riẹ, o ve ru idhesẹvia oghẹrẹ nọ a sae rọ rehọ emagazini na kẹ ahwo. U fo re ma jọ obọ uwou se emagazini na re ma sae zọhọ fihọ ẹme nọ a te ta kpahe ae na. Ma tẹ ruẹrẹ oma kpahe ziezi, ma ti fi obọ họ kẹ ohwohwo riẹ epanọ ma sae rọ kẹ ahwo emagazini.—Itẹ 27:17.