Ahwo A ti Wuhrẹ Eware Buobu
1. U te no ẹme nọ a ti ru no, eme ọfa ọ rẹ sai duobọte enọ ma zizie ziọ Ekareghẹhọ na? Ru ei vẹ.
1 Evaọ okevẹ? Evaọ owọwọ nọ ma ti ru Ekareghẹhọ na. Fiki onana, ma zizie ahwo buobu no. Orọnikọ ẹme nọ ahwo nọ ma zizie a ti yo ọvo o rẹ sai duobọte ai hi. Nọ aye jọ o no Ekareghẹhọ jọ kpozi, ọ tẹ ta oware nọ ọ ruẹ—oghẹrẹ nọ ahwo kpobi a je ru whẹtiẹ whẹtiẹ, gbe uwou uwowoma na nọ ọ rrọ fuafo nọ ahwo unevaze a bọ jẹ be rẹrote. Fikiere, mai kpobi orọnikọ oruẹme na ọvo ho, ma sai fi obọ họ kẹ ahwo wuhrẹ oware jọ evaọ omakugbe nana nọ o mai wuzou evaọ ukpe na.—Ẹf. 4:16.
2. Ẹvẹ mai omomọvo ọ sai ro fi obọ họ kẹ erara nọ e ziọ Ekareghẹhọ na?
2 Yere Erara Sasasa: Ovao osasa nọ ma re ro yere erara nọ e nyaze u re se isẹri. (Jọn 13:35) Whọ gbẹ sae make ta ẹme kẹ ohwo kpobi hi, whọ sai yere ahwo nọ a kẹle owhẹ sasasa je dhesẹ oma ra kẹ ae. (Hib. 13:1, 2) Muẹrohọ erara nọ o wọhọ nọ e riẹ oniọvo ọvo ho. Ẹsejọhọ obe-uzizie u te rai obọ evaọ oke usi-uwhowho na. Whọ rẹ sae nọ inọ, “Kọ onana họ orọ ọsosuọ nọ who ro kuomagbe omai?” Zizie ae re a keria gb’owhẹ, jẹ vuẹ ai inọ a te wo onọ jọ a rẹ sae nọ owhẹ. Otẹrọnọ o gwọlọ nọ ukoko ra u re no Ọgwa Uvie na kpata kpata rọkẹ ukoko ofa, whọ sae ta nọ: “Mẹ hae gwọlọ riẹ oghẹrẹ nọ Ekareghẹhọ na e jọ owhẹ oma. Ẹvẹ mẹ avọ owhẹ a sae rọ ruẹ ẹro ẹdẹfa?”
3. Ẹvẹ ma re ro dede enọ e siọ iruo Uvie na ba no rehọ?
3 Dede Enọ E Siọ Iruo Uvie na Ba No Rehọ: Ababọ avro, iwhowho-uvie nọ e siọ iruo Uvie na ba no a te nyaze, kugbe ejọ nọ i re kpohọ iwuhrẹ hẹ rekọ a rẹ ziọ Ekareghẹhọ ẹsiẹvo ẹgbukpe na. Dede ae rehọ, jẹ ta kẹ ae nọ eva e were owhẹ nọ whọ rọ rue rai. (Rom 15:7) A te ru Ekareghẹhọ na no, ekpako a sai weze bru rai re a tuduhọ ae awọ inọ a hae ziọ ewuhrẹ. Ma be lẹ inọ jọ eware nọ ahwo nọ a te ziọ Ekareghẹhọ na a ti yo gbe maero onọ a te ruẹ o wọ ae kẹ Ọghẹnẹ oruaro fiki ‘iruo iwoma mai nọ a ruẹ.’—1 Pita 2:12.