Kẹ Jihova Uyere Fiki Uyoyou-Ẹwo Riẹ
Ekareghẹhọ Uwhu Kristi nọ A ti Ru Evaọ March 24
1 Ọso-ilezi na o whowho nọ: “Jọ a yere ỌNOWO fiki uyoyou ulogbo riẹ, epa iruo urirẹ riẹ rọ kẹ emọ ahwo!” (Ol. 107:8) Uyoyou-ẹwo Ọghẹnẹ o kẹre vi ọdawẹ nọ o wo kẹ ahwo. A dhesẹ onana vẹ evaọ eme ujiro nana nọ a rọ ẹgba ẹzi kere na: ‘O ỌNOWO . . . whọ rọ uyoyou ra yọrọ omẹ.’ (Ol. 94:18) Ẹvẹ uyoyou-ẹwo nọ Jihova dhesẹ nọ o ro si obọ no Ọmọ ọvo riẹ fiki mai o rro te!—1 Jọn 4:9, 10.
2 Nọ Ekareghẹhọ uwhu Kristi o be kẹle na, ẹvẹ ma sai ro yere “Ọghẹnẹ nọ o dhesẹ uyoyou nọ o rẹ hiẹ hẹ” kẹ omai na? (Ol. 59:17) O gwọlọ nọ mai omomọvo ma re fi oke họ nọ ma re ro roro didi kpahe edẹ urere nọ Jesu jọ otọakpọ. (Ol. 143:5) O te jẹ kẹ erere re whọ nya lele omaa isase Ebaibol nọ a ruẹrẹ họ kẹ ezi Ekareghẹhọ na wọhọ epanọ a dhesẹ fihọ Ẹkiẹriwo Ikereakere na Kẹdẹ Kẹdẹ—2005, yọ o tẹ lọhọ, ru isase gbe ekiakiẹ efa eva uzou avọ 112-116 eva obe ọ Ọzae nọ Ọ Mae Rro gbe ebe efa nọ a kere no Ebaibol ze. Roro didi kpahe eria nọ who se na, je ru re e da ruọ owhẹ oma. (1 Tim. 4:15) Nọ ma tẹ lẹ je roro didi kpahe Ẹme Ọghẹnẹ orọnikọ u re ru udu mai ghọghọ ọvo ho, rekọ u re je dhesẹ uyoyou mai kẹ Jihova via.—Mat. 22:37.
3 Ta Isiuru Họ Amọfa Oma re A Yere Ọghẹnẹ: Eva ukpe nukpo, ahwo 16,760,607 a jọ akpọ na soso kpohọ Ekareghẹhọ na. Evaọ iwhre Liberia jọ, a woro uzizie Ekareghẹhọ na nya iwhre na wariẹ, bi zizie ahwo re a ziọ Ekareghẹhọ na. Inievo na a jọ ogege nọ a jẹ fa ebọro evaọ ẹwho na ru ehaa na. Dede nọ iwhowho-uvie isoi ọvo e jọ iwhre yena, ahwo nọ a kpohọ Ekareghẹhọ na a bu te 636!
4 Epọvo na re, ma gwọlọ fiobọhọ kẹ ahwo buobu te epanọ o rẹ lọhọ te kpobi re a ku oma gbe omai evaọ ekoko Ekareghẹhọ na. Kọ who gbe kere edẹ ahwo nọ whọ gwọlọ zizie fihọ otọ? Iwoho nọ a dhesẹ fihọ uke Awake! ọ March 8 gbe Uwou-Eroro ọ April 1 na e kẹ uzizie. A sae rehọ obe uzizie Ekareghẹhọ na ro ruiruo re. Rọ oma totọ kere oke gbe oria Ekareghẹhọ na vevẹ fihọ obe-uzizie na, whọ vẹ rọ ọjọ kẹ ohwo kpobi nọ who zizie. Nọ March 24 ọ be kẹle na, zihe bru ahwo nọ who zizie na re whọ kareghẹhọ ae, je ru ọruẹrẹfihotọ urere.
5 Ẹvẹ ma sai ro fiobọhọ kẹ emọ-uwuhrẹ Ebaibol mai nọ i ri mu iwuhrẹ họ ẹnya ha re a ziọ ehaa na je wo erere noi ze vọvọ? Nọ wha bi ru obe-uwuhrẹ na, rehọ umutho iminiti jọ ro fiobọhọ kẹ ae riẹ epanọ ekoko Ekareghẹhọ na o wuzou te. Whọ rẹ sae ruẹ uvi evuẹ nọ who re ro ru onana evaọ Uwou-Eroro ọ March 15, 2004 (ọrọ oyibo), ẹwẹ-obe avọ 3-7, gbe obe ọ Reasoning na, ẹwẹ-obe avọ 266-269.
6 Dede Erara Rehọ: Eva oria Ekareghẹhọ na, nya bru erara je dede ai rehọ. (Rom 12:13) Ru ọruẹrẹfihotọ nọ whọ rẹ rọ keria gba ahwo nọ who zizie, je muẹrohọ nọ a wo Ebaibol gbe obe-ile. Jọ u no omai eva ze re ma dede inievo-emezae hayo erọ emetẹ kpobi nọ e se iruo Uvie ba no riẹriẹriẹ nọ e daoma nyaziọ Ekareghẹhọ na. Isiuru uyoyou nọ ma re dhesẹ o sai fiobọhọ kẹ ai wariẹ mu oma họ ekugbe ukoko na. (Luk 15:3-7) Evaọ ehaa efuafo nana, joma ru onọ ma rẹ sai ru kpobi re ma ta udu họ amọfa awọ re a ku oma gbe omai evaọ uyere orọkẹ Jihova fiki “uvi uyoyou riẹ.”—Ol. 31:21.
[Study Questions]
1. Ẹvẹ Jihova ro dhesẹ uyoyou-ẹwo kẹ omai no?
2. Ẹvẹ ma sai ro dhesẹ uyere mai kẹ Jihova?
3, 4. (a) Ẹvẹ ma sae rọ rehọ aro kele uruemu inievo mai obọ Liberia na? (b) Amono whọ jiroro nọ who ti zizie kpohọ Ekareghẹhọ na?
5. Ẹvẹ ma sae rọ ta udu họ emọ-uwuhrẹ Ebaibol mai awọ re a kpohọ Ekareghẹhọ na?
6. Fikieme u je wuzou re ma dede erara nọ e ziọ Ekareghẹhọ na?