‘Wha You Jihova, Whai Erezi Riẹ Kpobi’
A ti Ru Ekareghẹhọ Uwhu Jesu Eva April 4
1 Ikpe jọ nọ i kpemu, nọ Ukraine ọ jọ otọ esuo Ọgbahọ, isu na a je fi ẹro họ inievo na kiọkiọkiọ, maero nọ ẹdẹ Emu Owọwọ Olori na o te bi si kẹle, keme a rẹro inọ a ti duku oria nọ inievo na a bi ti kokohọ. Onana o jọ ẹbẹbẹ ẹsikpobi, nọ o rrọ nọ isu na e riẹ uzedhe ẹdẹ ekareghẹhọ na. Kọ eme inievo na a rẹ sai ru? Oniọvo-ọmọtẹ jọ o wo uwou nọ a rọ ire hayo ipila bọ kpehru no ame. Nọ isu na a te sai rẹro nnọ ahwo a re kokohọ otọ uwou nọ ame o ku hu na, inievo na a tẹ rehọ ire bọ agbada họ ehru ame nọ o diwi te ighilawọ na. Dede nọ inievo na a keria kpiri-awọ eva ehru agbada nọ a bọ na, uvumọ ohwo o kpokpo i rae he nọ ukoko na soso o be rehọ evawere ru Ekareghẹhọ na.
2 Ọtamuo inievo Ukraine mai nọ a ro yoẹme kẹ ujaje na re a ru Ekareghẹhọ uwhu Jesu na yọ obọdẹ odhesẹvia uyoyou nọ a wo kẹ Ọghẹnẹ. (Luk 22:19; 1 Jọn 5:3) Oke kpobi nọ ma tẹ be rẹriẹ ovao ku ebẹbẹ evaọ uzuazọ mai, jọ iriruo itieye na e bọ omai ga, re ma gbaemu nnọ ma rẹ jariẹ re ma ru Emu Owọwọ Olori na evaọ April 4. Ẹkwoma ere oruo, yọ ma bi dhesẹ nọ ma wo oghẹrẹ iroro ọso-ilezi na ọnọ ọ so nọ: “Wha you ỌNOWO, whai erezi riẹ kpobi.”—Ol. 31:23.
3 Fi Obọ họ kẹ Amọfa re Uyoyou Nọ A Wo kẹ Ọghẹnẹ O Rro: Uyoyou nọ ma wo kẹ Ọghẹnẹ o rẹ jẹ wọ omai zizie amọfa re a ku oma gbe omai ru Ekareghẹhọ na. Uko-obeva Odibọgba Uvie Mai ọrọ February ọ ta udu họ mai omomọvo awọ re ma kere edẹ ahwo kpobi nọ ma gwọlọ zizie kpohọ Ekareghẹhọ na fihotọ. Kọ whọ be rọ obọ kotọ zizie ohwo kpobi nọ who kere fihọ obe ra na? Roma totọ dhesẹ epanọ ehaa na i wuzou te kẹ ae. Oma ogbẹnyusu nọ whọ rẹ rọ kareghẹhọ ae ẹdẹ gbe oke Ekareghẹhọ na jegbe, o tẹ lọhọ, re whọ ta kẹ ae nnọ whọ te jọ usu kugbe ai o rẹ sae kẹ ai uduowha re a nyaze.
4 Eva obọ Ekareghẹhọ na, daoma gaga re who dede ahwo nọ a jẹ uzizie mai rehọ na, je ru oma sasa ae. Ẹvẹ whọ sai ro fi obọ họ kẹ ae re uyoyou rai kẹ Jihova o rro haro? Jọ u no owhẹ eva ze re whọ kuyo enọ nọ a rẹ sae nọ. Mu ẹro họ otọ kẹ isiuru ahwo na re whọ ta kẹ ae kpahe obe-uwuhrẹ Ebaibol o tẹ gwọlọ ere. Zizie ai re a kpohọ iwuhrẹ ukoko ẹkpoka mai. Maero, ekpako na a te mae tọ ẹro vi Ileleikristi nọ e se iruo Uvie ba no riẹriẹriẹ nọ e nyaze. A rẹ sai ru ọruẹrẹfihotọ nọ a re ro weze bru ahwo otiọye jẹ ta udu họ ai awọ re a wariẹ mu iruẹru rai họ kugbe ukoko na, jẹ sai ru eme jọ nọ a ta evaọ Ekareghẹhọ na vẹ.—Rom 5:6-8.
5 Uyoyou Mai kẹ Jihova nọ Ma re Ru Diwi Viere: Okẹ ẹtanigbo na nọ ma re roro kpahe ziezi o rẹ sai ru uyoyou mai kẹ Jihova gbe Ọmọ riẹ diwi viere. (2 Kọr. 5:14, 15) Osẹri jọ nọ o kpohọ Ekareghẹhọ na te ikpe buobu no, ọ ta nọ: “Ma re rẹro Ekareghẹhọ na. U zihe ruọ oware nọ o ghare viere komai kukpe kukpe. Mẹ kareghẹhọ epanọ me ro dikihẹ uwou uwhori na evaọ ikpe 20 nọ i kpemu, bi rri ori ọsẹ ọghaghae mẹ, o tẹ lẹliẹ omẹ wo ovuhumuo odidi kẹ ẹtanigbo na viere. Eriariẹ gheghe ọvo me wo kpahe iẹe vẹre. O, mẹ riẹ ikereakere kpobi nọ i kie kpahe ẹtanigbo na gbe epanọ a re ro ru ai vẹ! Rekọ nọ uwhu u kpomahọ omẹ, udu mẹ o rọ ghinẹ vọ avọ oghọghọ fiki oware nọ ma ti wo tobọ ẹkwoma ẹtanigbo ọghaghae yena.”—Jọn 5:28, 29.
6 Nọ ẹdẹ Ekareghẹhọ enukpe nana o bi si kẹle na, daoma ruẹrẹ udu ra họ kẹ ehaa na. (2 Irv. 19:3) Roro didi kpahe obọdẹ isase Ebaibol Ekareghẹhọ na, onọ a ma omaa riẹ fihọ Ẹkiẹriwo Ikereakere na Kẹdẹ Kẹdẹ—2004 gbe eva 2004 Calendar na. Ahwo jọ a rẹ reawere uzou avọ 112-116 orọ obe Ọzae nọ Ọ Maero na nọ a rẹ kiẹriwi evaọ etoke uwuhrẹ uviuwou rai. Amọfa a re ru ekiakiẹ efa ẹkwoma ebe efa nọ utu ọrigbo nọ o wo ẹrọwọ avọ areghẹ na a kere. (Mat. 24:45-47) Mai kpobi ma rẹ sae ta ẹme kpahe okẹ ẹtanigbo na evaọ elẹ nọ i no udu ze. (Ol. 50:14, 23) Ẹhẹ, evaọ ezi Ekareghẹhọ nana, joma ruabọhọ eroro kpahe uyoyou nọ Jihova o dhesẹ kẹ omai, je roro kpahe idhere nọ ma re ro dhesẹ uyoyou mai kẹe.—Mak 12:30; 1 Jọn 4:10.