Ẹkpẹti Onọ

◼ Ẹvẹ ma re wuhrẹ obe kugbe ọmọ-uwuhrẹ nọ o bi wo ẹnyaharo kri te?

O mai woma re a gbe wuhrẹ obe kugbe ọmọ-uwuhrẹ nọ o bi wo ẹnyaharo bẹsenọ o re wuhrẹ ebe nana re no—Eme Ebaibol na O Gine Wuhrẹ? gbe ‘Daji Uyoyou Ọghẹnẹ.’ A re ru onana o tẹ make rọnọ ohwo na ọ họ-ame yọ o ri wuhrẹ ebe ivẹ nana re he. Ohwo na ọ tẹ make họ-ame no, ma rẹ gbẹ n’iyẹrẹ oke na, ozihebro na, gbe uwuhrẹ na. Otẹrọnọ owhowho-uvie ọfa o kuomagbe omai je w’obọ evaọ uwuhrẹ na o re kele oke na re.—Rri Odibọgba Uvie Mai ọrọ March 2009, ẹwẹ-obe avọ 2.

U wuzou re ahwo ọkpokpọ a riẹ uzẹme na ziezi re ma tẹ se ae ba ewuhrẹ. U fo re a “tawọ mu” evaọ Kristi je ru re “orọwọ rai o ga” re a sai dikihẹ ga kẹ edawọ nọ i ti te ai. (Kọl. 2:6, 7; 2 Tim. 3:12; 1 Pita 5:8, 9) Ofariẹ, re a sai wuhrẹ amọfa ziezi, a re wo eriariẹ egbagba “uzẹme na.” (1 Tim. 2:4) Ma te wuhrẹ ebe ivẹ na kugbe emọ-iwuhrẹ mai, yọ ma bi fi obọ họ kẹ ae re a dadawọ mu “edhere nọ a re ro kpohọ uzuazọ.”—Mat. 7:14.

Taure ekpako na a te kuenu nọ ohwo o te ame-ọhọ, a re muẹrohọ inọ o wo otoriẹ igogo iwuhrẹ Ebaibol na vevẹ jẹ be rria lele ai. Ekpako na a re muẹrohotọ gaga nọ a tẹ be kiẹ ohwo nọ o ri wuhrẹ obe ọsosuọ na re he riwi. Otẹrọnọ ohwo jọ o ri te kẹ ame-ọhọ họ, ekpako na a re ru ọruẹrẹfihotọ nọ a re ro fi obọ họ kẹe re ọ ruẹsi te kẹ ame-ọhọ evaọ obaro.—Rri A Koko Omai Họ re Ma Ru Oreva Jihova, ẹwẹ-obe avọ 217-218.

[Ẹme nọ a fi ẹgba họ nọ ọ rrọ ẹwẹ-obe avọ 2]

U wuzou re ahwo ọkpokpọ a riẹ uzẹme na ziezi