Kọ Emọ Ra A Ruẹrẹ Oma Kpahe No?
1. Fikieme o rọ r’oja re emọ-isukulu a ruẹrẹ oma kpahe?
1 Uviemenẹ emọ-isukulu a ti mu isukulu họ. Ababọ avro, emọ ra a te rẹriẹ ovao dhe ise-abọ gbe itunyẹ ekpokpọ. A ti je wo uvẹ ọkpokpọ nọ a ti ro “se isẹi kẹ uzẹme” na. (Jọn 18:37) Kọ a ruẹrẹ oma kpahe no?
2. Re emọ ra a sae ruẹrẹ oma kpahe, eme u fo nọ a rẹ riẹ?
2 Kọ emọ ra a riẹ ehaa sa-sa nọ e rrọ erọ akpọ na gbe oware nọ o rọ thọ re ma jarai w’obọ? Kọ a ruẹrẹ oma kpahe kẹ oware nọ a ti ru no nọ a tẹ be tuduhọ ai awọ re a kpohọ isukulu ikpehru, nyusu ọmọzae avọ ọmọtẹ, da-idi, vovo hayo lọ imu-egaga? Kọ a te ta ọvo inọ egagọ mai u mukpahe oware utioye, manikọ a riẹ epanọ a sae rọ ta oware nọ a rọwo?—1 Pita 3:15.
3. Ẹvẹ esẹgbini a sae rọ rehọ oke Egagọ Uviuwou ruẹrẹ emọ rai kpahe?
3 Jọ Oke Egagọ Uviuwou Ru Onana: Uzẹme o rrọ inọ wha te hae ta ẹme kpahe ebẹbẹ nọ emọ na e be nyaku evaọ obọ isukulu evaọ ukpe na soso. Rekọ nọ wha tẹ be daoma ta kpahe ebẹbẹ nọ a sae nyaku evaọ obọ isukulu taure a te ti mu isukulu họ u ti ru emọ ra riẹ oware nọ a re ru. Kọ wha gbẹ rehọ oke Egagọ Uviuwou ọvo hayo ivẹ jọ ro ru onana? Whọ sae nọ emọ ra re a fodẹ eware nọ e be mae lẹliẹ udu bru rai nọ a bi ti mu isukulu họ na. Wha sae wariẹ ta kpahe eware nọ wha ta kpahe evaọ ikpe nọ i kpemu nọ orọnọ a kpako je wo eriariẹ vi epaọ anwẹdẹ no na. (Ol. 119:95, NW) Wha sai ru odhesẹvia nọ who je ru wọhọ iticha, ọkohrẹ isukulu, hayo ibe ọmọ-isukulu. Wuhrẹ emọ ra epanọ a rẹ rọ rehọ Ebaibol na kẹ uyo, jẹ rehọ ebe wọhọ Reasoning hayo Jehovah’s Witnesses and Education gbe Young People Ask ro ruiruo. Oniọvo-ọmọtẹ jọ ọ rehọ odhesẹvia ro wuhrẹ emọ riẹ epanọ a re ro dhesẹ oma rai kẹ iticha ekpokpọ rai inọ Isẹri Jihova a rrọ.—Rri Uwou-Eroro ọ December 15, 2010, ẹwẹ-obe avọ 3-5.
4. Eme esẹgbini nọ i wo areghẹ a re ru?
4 Ise-abọ nọ o gba izoge Ileleikristi họ inọ a rẹ rẹriẹ ovao dhe evaọ edẹ urere nana i bi dhe ẹgẹga. (2 Tim. 3:1) Esẹgbini nọ i wo areghẹ a rẹ daoma roro kpahe ise-abọ itieye, a vẹ ruẹrẹ emọ rai kpahe kẹ epanọ a re ro fi ai kparobọ. (Itẹ 22:3) Taure a te ti mu isukulu họ, dawo oma ra kpobi fi obọ họ kẹ emọ ra ruẹrẹ oma kpahe.