Kọ Whọ Ruẹrẹ Oma Kpahe no Re Who Mu Isukulu Họ?
1. Didi uvẹ u rovie fihọ k’owhẹ nọ who ti mu isukulu họ na?
1 Whọ tẹ rrọ uzoge Oleleikristi nọ o bi ti mu isukulu họ obọ hayo nọ o bi no eklase jọ ruọ ọfa, whọ rẹ rẹriẹ ovao dhe ebẹbẹ ekpokpọ sa-sa evaọ obọ isukulu. O make rrọ ere na, who wo uvẹ okpokpọ nọ who re ro “se isẹi kẹ uzẹme” na. (Jọn 18:37) Kọ whọ ruẹrẹ oma kpahe no re who se isẹri?
2. Idhere vẹ whọ rọ ruẹrẹ oma kpahe kẹ isukulu no?
2 Re whọ sae kparobọ evaọ kabọ kabọ uzuazọ ra, Jihova, ọrigbo nọ o wo ẹrọwọ avọ areghẹ na gbe esẹgbini ra a k’owhẹ uwuhrẹ nọ u re fi obọ họ k’owhẹ no. (Itẹ 1:8; 6:20; 23:23-25; Ẹf. 6:1-4; 2 Tim. 3:16, 17) Ababọ avro, whọ riẹ oghẹrẹ ebẹbẹ nọ whọ sae rẹriẹ ovao dhe evaọ obọ isukulu no. Nọ whọ riẹ oware nọ Ọghẹnẹ ọ gwọlọ mi owhẹ gbe oghẹrẹ nọ okegbe isukulu ọ rrọ no na, ruẹrẹ oma ra kpahe re who se isẹri. (Itẹ 22:3) Roro ziezi kpahe ithubro gbe ekpọvio Ikereakere nọ e rrọ obe ọ “Young People Ask” uko 1 gbe 2 na gbe izoẹme sa-sa nọ e ta kpahe izoge na nọ e be hae jọ evaọ Awake! na.
3. Evaọ idhere vẹ whọ sai ro se isẹri?
3 Whọ te sae jọ isukulu ra se isẹri evaọ idhere buobu. Nọ amọfa a te bi muẹrohọ ẹgọ gbe osẹ ọkpakpatiẹ ra, uruemu gbe ẹmeunu owoma ra, adhẹẹ nọ whọ be kẹ ibe emọ-isukulu gbe iticha ra, je tube muẹrohọ oghẹrẹ nọ who bi yeri emamọ uzuazọ, ahwo jọ a te nọ inọ, “Eme o ru owhẹ wo ohẹriẹ no emọ nọ i kiọkọ?” (1 Tim. 2:9, 10; Mal. 3:18; Jọn 15:19) Oyena o sai rovie uvẹ fihọ nọ who re ro se isẹri jẹ ta ẹrọwọ ra via. Bẹsenọ ukpe na u re re, ẹsejọhọ whọ te rẹriẹ ovao dhe ebẹbẹ sa-sa nọ a te jọ gwọlọ nọ who kuomagbe oghẹrẹ ehaa jọ. Nọ a tẹ nọ owhẹ oware nọ who gbe bi kuomagbe ae he, kọ whọ te ta nọ: “Ma rẹ jọ egagọ mẹ ru ei hi; Mẹ yọ omọvo Isẹri Jihova,” hayo, mai tube woma, kọ whọ te rehọ uvẹ na ro se isẹri kpahe Jihova, Ọsẹ oyoyou ra na? Whọ tẹ ruẹrẹ oma kpahe ziezi jẹ nya lele ọkpọvio Jihova, u ti fi obọ họ k’owhẹ sai se emamọ isẹri kẹ ibe emọ-isukulu ra, iticha ra gbe amọfa.—1 Pita 3:15.
4. Eme o ru owhẹ wo imuẹro inọ whọ te nya isukulu ra nwrotọ gbẹsinẹdẹ?
4 O sae jọ nọ ozọ o dina rrọ owhẹ ẹro nọ who bi ti mu isukulu họ na, rekọ riẹ inọ who wo uketha ahwo buobu nọ a gwọlọ nọ whọ nya isukulu ra nwrotọ gbẹsinẹdẹ. Ofariẹ, eva e were omai k’owhẹ inọ who wo uvẹ nọ whọ sai ro se isẹri evaọ obọ isukulu. Fikiere, ozọ u mu owhẹ hẹ, ruẹrẹ oma kpahe kẹ isukulu ra!