Izoge—Wha Rehọ Uvẹ Isukulu Rai Ruiruo
1 Ẹvẹ o r’owhẹ oma kpahe ezihe kpohọ isukulu nọ ehọlide oke ivo na o tẹ vrẹ no? O r’owhẹ oja re who wo erere no ẹgbukpe ọfa ọrọ isukulu enya ze? Kọ whọ te rehọ uvẹ nọ isukulu i rovie k’owhẹ na ro ruiruo re whọ ghale uzẹme na kugbe emọ-eklase gbe iticha ra? Ma fievahọ nọ whọ te gwọlọ dawo utho ẹgba ra evaọ isukulu.
2 Jọ Emamọ Ọmọ-Isukulu: Otẹrọnọ whọ ruẹrẹ oma kpahe ziezi evaọ oke ewuhrẹ ra jẹ kezọ ziezi, who ti wo erere okrẹkri. Kru oma ga evaọ iruo ihom-whọko ra, rekọ whọ k’uvẹ re iruo isukulu ra i kpomahọ iruo uvie he.—Fil. 1:10.
3 Rehọ isase ọ ibroshọ na Jehovah’s Witnesses and Education ro muọ ukpe okpokpọ isukulu na họ. Kẹsena, whẹ hayo ọsẹ gbe oni ra a vẹ rehọ ovo jọ kẹ iticha ra kpobi. Vuẹ ae nọ o te k’iyo enọ kpobi nọ a wo. Onana u ti fiobọhọ kẹ ae w’otoriẹ ehri-izi gbe orọwọ ra ziezi je riorio obọ k’owhẹ nọ who bi fi eware nọ a wuhrẹ owhẹ họ iruo na. O te jẹ kẹ iticha ra imuẹro inọ whẹ avọ ọsẹ gbe oni ra wha gwọlọ rọwokugbe ai nọ a bi fiobọhọ k’owhẹ wo ewuhrẹ ọghaghae na.
4 Jọ Emamọ Osẹri: Kọ who gbe rri isukulu fihọ ẹkwotọ obọra nọ whọ jẹ ta usiuwoma ọnyakuo? Evaọ ukpe isukulu nọ o be tha na, who ti wo obọdẹ uvẹ isẹri-ise. Who ti wo eriariẹ igbunu abọ-ẹzi nọ, whọ tẹ ghale ae kugbe amọfa, e rẹ sai “siwi [owhẹ] gbe ahwo [nọ] a be kezọ ẹme ra.” (1 Tim. 4:16) Ẹkwoma ẹyọrọ uruemu oriruo Oleleikristi je se isẹri evaọ oke kpobi nọ u fo, whọ rẹ wha erere se omobọra gbe amọfa.
5 Oniọvo ọmaha ọmọzae jọ o se isẹri ọnyakuo kẹ ibe emọ-isukulu evaọ obọ isukulu riẹ. Evaọ udevie ahwo nọ a jẹ emamọ owọ họ ohwo Kathọlik jọ, ọnọ ọ se ẹrria Ọghẹnẹ nọ ọ jẹ hae rehọ ahwo nọ a rọwo Ọghẹnẹ s’ẹkoko, gbe uzoge jọ nọ ọ jọ ọgba ivovavovo jegbe ọgbidi. Oma rai kpobi, oniọvo ọmaha ọnana o fiobọhọ kẹ ahwo 15 evaọ udevie uzoge riẹ nyate omarọkẹ gbe ame-ọhọ!
6 Fikiere izoge, wha r’oma rai kẹ ewuhrẹ je ruiruo evaọ ẹkwotọ isẹri-ise obọdẹ rai na. Kẹsena wha vẹ te reawere irere ilogbo no isukulu enya ze.