Eme Me re Ru Otẹrọnọ Isukulu E Were Omẹ Hẹ?

Iticha ra e rrọ eva gaga. Emọ isukulu ra a be gwọlọ gele owhẹ fihọ oware uyoma. Edawọ nọ who bi ru e ga wumuo ho, yọ ihomwhọko i bu thesiwa. Whọ tẹ ta nọ isukulu e were owhẹ hẹ, eware jọ e wha riẹ ze nọ whọ rọ ta ere. Uzoge jọ nọ a re se Rachela ọ ta nọ:

“Ukpenọ mẹ jọ obọ isukulu mẹ rẹ jọ oria ofa kpobi. O te mae were omẹ re mẹ jọ obọ unueri, jọ kugbe egbẹnyusu mẹ, hayo tubẹ nyai fiobọhọ kẹ ọsẹgboni mẹ there emu hayo hwere uwou!”

Otẹrọnọ epanọ Rachel o rri isukulu na ere who rri isukulu re, koyehọ who bi rri oke nọ whọ rọ rrọ isukulu na wọhọ oke nọ a ro fi owhẹ họ uwou-odi nọ whọ be jọ thihakọ bọwo ẹdẹ nọ a re si owhẹ no uwou-odi na, koyehọ ẹdẹ nọ who ti ro nwrotọ no isukulu na. Kọ ere u fo nọ who re rri oke nọ whọ rọ rrọ isukulu, manikọ u fo re who rri rie oghẹrẹ ofa?

Kọ whọ riẹ? Whọ tẹ be daoma re isukulu e were owhẹ, ozọ isukulu u gbe ti mu owhẹ hẹ. Who gbe ti rri isukulu wọhọ oria nọ whọ rẹ gba oma họ nya bọwo ẹdẹ nọ who re nwrotọ họ. Ukpoye, who ti rri isukulu wọhọ oria nọ u ti ru owhẹ fihọ ziezi, re who wuhrẹ eware nọ i ti fiobọhọ kẹ owhẹ nọ whọ tẹ rro te ohwo no.

Re isukulu e were owhẹ ziezi, daoma roro kpahe eware nọ ma be te ta kpahe na:

Who ti wuhrẹ eware buobu. Eware nọ whọ rẹ jọ isukulu wuhrẹ e rrọ buobu, yọ eware nana nọ who ti wuhrẹ na i re fiobọhọ kẹ owhẹ nọ who te wo iruo no ẹdẹfa. I ti je fiobọhọ kẹ owhẹ ru eware sa-sa evaọ kabọ kabọ uzuazọ ukpenọ whọ rẹ rẹroso amọfa. Nọ omara nọ, ‘O tẹ make rọnọ u wo eware jọ nọ i ru nọ isukulu e gbẹ rọ were omẹ tere he, emamọ eware vẹ mẹ be jọ isukulu wuhrẹ?’

Ohrẹ Ebaibol: “Wo uvi areghẹ re whọ jẹ riẹ epanọ a re roro oware te ziezi.”—Itẹ 3:21.

Whọ te riẹ eware ru. Who te bi gine fiẹrohotọ ziezi evaọ isukulu, whọ rẹ riẹ oghẹrẹ nọ whọ rẹ rọ rehọ oke ra ru emamọ oware, nọ whọ gbẹ rọ raha oke ra kufiẹ hẹ. Who re wuhrẹ emamọ uruemu, who ve je wuhrẹ epanọ whọ rẹ rọ gobọ iruo. Eware nana kpobi i ti fiobọhọ kẹ owhẹ gaga nọ whọ tẹ rro te ohwo no. Nọ omara nọ: ‘Oghẹrẹ vẹ isukulu nọ mẹ be nya na i bi ro fiobọhọ kẹ omẹ gobọ iruo jẹ riẹ eware ru? Ẹvẹ mẹ sae gbẹ rọ daoma ziezi evaọ eware nana?’

Ohrẹ Ebaibol: “Erere o re no oghẹrẹ iruo egaga kpobi ze.”—Itẹ 14:23.

Who ti wuhrẹ epanọ whọ sai ro ru eware kugbe amọfa. Eware nọ whọ be hai lele emọ isukulu ra ru na e sai fiobọhọ kẹ owhẹ riẹ epanọ whọ sai ro wo ọdawẹ kẹ amọfa jẹ kẹ ae adhẹẹ. Uzoge jọ nọ a re se Joshua ọ ta nọ: “Re ohwo ọ riẹ epanọ ọ sai ro lele amọfa ta ẹme ziezi u wuzou gaga, wọhọ epanọ ogha-ewuhrẹ wọhọ history gbe science i wuzou na. Onana yọ oware nọ u ti fiobọhọ kẹ owhẹ evaọ edẹ uzuazọ ra kpobi.” Nọ omara nọ, ‘Eme mẹ jọ isukulu wuhrẹ no kpahe epanọ a re lele amọfa yeri ziezi, makọ ahwo nọ a rrọ ahwo ẹwho mẹ hẹ, hayo a rọwo eware nọ mẹ rọwo ho?’

Ohrẹ Ebaibol: “Wha daoma lele ahwo kpobi rria dhedhẹ.”—Ahwo Hibru 12:14.

Whọ te jọ emamọ ohwo evaọ obaro. Isukulu i re fiobọhọ kẹ owhẹ riẹ eware nọ whọ rẹ mae riẹ ru ziezi, whọ vẹ ma omaa uzuazọ ra rri abọ yena. Ọmọtẹ jọ nọ a re se Brooke ọ ta nọ: “Whọ sai tube wuhrẹ rri ogha-ewuhrẹ nọ whọ be mae jọ daoma, wọhọ epanọ me ru, re who te nwrotọ no isukulu no, whọ vẹ sai wo iruo.” Nọ omara nọ: ‘Iruo vẹ mẹ te gwọlọ ru rọ kuọ omamẹ nọ me te nwrotọ no isukulu no? Ẹvẹ mẹ sai ro wuhrẹ rri abọ nọ o ti fiobọhọ kẹ omẹ wo iruo yena?’

Ohrẹ Ebaibol: “Nabi roro edhere nọ whọ be te nya na te.”—Itẹ 4:26, ẹme-obotọ.