Ewuhrẹ Akpọ Avọ Ute Abọ-Ẹzi Ra
1 Re who wo emamọ ewuhrẹ nọ o r’oja evaọ okenọ whọ rrọ ọmoha o rẹ sae k’owhẹ ona isukulu nọ o gwọlọ re whọ riẹ se je kere je wo otoriẹ nọ u fo kpahe otọakpọ gbe uzuazọ nọ o riẹ, ikuigbe, iroraroro, gbe otokiẹ-eriariẹ. Ere oruo, whọ sai wuhrẹ epanọ who re ro roro vevẹ, kiẹ izẹme, ku ebẹbẹ họ, jẹ jiroro nọ e rẹ kẹ erere. Ekpohọ isukulu otiọye na o rẹ wha erere s’owhẹ evaọ etoke uzuazọ ra kpobi. Ẹvẹ ewuhrẹ akpọ ra na o sai ro w’obọ kpahe ute abọ-ẹzi ra evaọ uzuazọ je fiobọhọ k’owhẹ wo “emamọ areghẹ gbe orimuo”?—Itẹ 3:21, 22.
2 Jọ Erere Evaọ Iruo Ọghẹnẹ: Nọ whọ rrọ isukulu na, kezọ evaọ eklase je ru ihom-whọko ra ziezi. Otẹrọnọ who wo emamọ uruemu isase gbe ewuhrẹ, o rẹ sae lọhọ owhẹ obọ viere re whọ kiẹ Ẹme Ọghẹnẹ je kru oma ra ga evaọ abọ-ẹzi. (Iruẹru 17:11) Eriariẹ ekẹkẹe i re fiobọhọ k’owhẹ yeri kugbe ahwo oghẹrẹ ọ otọhotọ-uyerakpọ, isiuru, gbe erọwọ sa-sa nọ whọ be nya ku evaọ odibọgba na. Ewuhrẹ nọ who wo t’obọ evaọ isukulu o rẹ jọ erere k’owhẹ nọ whọ be wọ owha Oleleikristi ra evaọ ukoko Ọghẹnẹ na.—Wawo 2 Timoti 2:21; 4:11.
3 Wuhrẹ Epanọ Whọ rẹ rọ Ko Unu Ra: Whọ tẹ r’oma kẹ, whọ rẹ sai je wuhrẹ ona nọ o gwọlọ re whọ ko unu ra nọ who te nwrotọ no. (Wawo 1 Timoti 5:8.) Rọ omatotọ salọ ogha-ewuhrẹ. Ukpenọ whọ rẹ t’ẹro vi abọ-ewuhrẹ nọ a rẹ kake jọ ruẹ iruo ho, roro kpahe ewuhrẹ iruo obọ hayo ona nọ o rẹ lẹliẹ owhẹ ruẹ iruo nọ i fo evaọ oria kpobi. (Itẹ 22:29) Ewuhrẹ otiọye na u re ru ei lọhọ k’owhẹ re whọ ko omobọra otẹrọnọ whọ jiroro nọ who re ruiruo evaọ oria nọ ẹgwọlọ ọ jẹ mae rro.—Wawo Iruẹru 18:1-4.
4 Emamọ ewuhrẹ nọ o fo nọ who re wo evaọ okenọ whọ rọ isukulu u re fiobọhọ k’owhẹ ru odibọgba ra kẹre. Daoma gaga re who wo ona nọ o gwọlọ re whọ sae ko unu ra nọ whọ be nya haro evaọ iruo Jihova na. Ere oruo isukulu ra i ve ti fiobọhọ k’owhẹ evaọ ẹnyate ute abọ-ẹzi ra.