Dao Usiuwoma Owọwọ

1. Okevẹ obe jọ o ta nọ Pọl ọ jẹ hae rọ ta usiuwoma n’uwou ruọ uwou?

¹ Obe na Daily Life in Bible Times o ta nọ Pọl ọ jẹ hae ta usiuwoma n’uwou ruọ uwou no “ighọjọ ene owọwọ rite aso.” Ma riẹ hẹ sọ ere Pọl o je gine ru, rekọ ma riẹ nọ ‘Pọl o ru eware kpobi fiki usiuwoma na.’ (1 Kọr. 9:19-23) Ẹsejọhọ onana u dhesẹ nọ ọ jẹ hae ta usiuwoma n’uwou ruọ uwou evaọ oke nọ o re ro di ahwo họ uwou.

2. Ẹvẹ usiuwoma owọwọ u ro woma?

² Evaọ eria buobu, iwhowho-uvie a re kpohọ usiuwoma n’uwou ruọ uwou evaọ ohiohiẹ. Kọ evaọ ẹkwotọ ra, wha gbe bi di ahwo họ uwou ziezi evaọ ohiohiẹ? Ọkobaro jọ ọ ta nọ evaọ ẹkwotọ riẹ “a rẹ kaki di ahwo họ uwou evaọ irioke he, owọwọ a rẹ mae jọ uwou.” Evaọ eria jọ, owọwọ whọ rẹ sai ro di ezae họ uwou. Ahwo buobu a rẹ mai serihọ jẹ gaviezọ evaọ owọwọ. Otẹrọnọ ere o rrọ evaọ oborai, jọ ekpako na a ru ọruẹrẹfihotọ kẹ usiuwoma ota evaọ owọwọ.

3. Ẹvẹ ma sae rọ ta usiuwoma avọ areghẹ evaọ owọwọ?

³ Rọ Areghẹ Ru Ei: Usiuwoma ota owọwọ o gwọlọ areghẹ gaga. Wọhọ oriruo, whọ tẹ nya ku ohwo nọ ọ be re emu hayo bi ru oware, whọ sae ta kẹe nọ who ti zihe ze oke ọfa. Yọ u fo re omọvo o kpohọ usiuwoma owọwọ họ. Whọ nya ruọ aso gahrọ họ re whọ siọ ahwo nọ a gwọlọ kiẹzẹ ba ekpokpo. (2 Kọr. 6:3) Otẹrọnọ ozọ o rẹ jọ ofẹ ẹkwotọ jọ nọ oke u te kpo no, ku usiuwoma ota họ re oke u te ti siaro họ.—Itẹ 22:3.

4. Irere vẹ i re no usiuwoma owọwọ ze?

⁴ Irere: Oma o rẹ mae were omai nọ ma tẹ ruẹ ahwo ta usiuwoma kẹ. Epanọ ma ta usiuwoma kẹ ahwo bu te, ere ma sai fi obọ họ kẹ ahwo ‘wo usiwo, jẹ riẹ uzẹme na” te. (1 Tim. 2:3, 4) Fikiere daoma hai kpohọ usiuwoma evaọ owọwọ.