Rehọ Oke Ra Ruiruo Ziezi Evaọ Usiuwoma
Evaọ ukpe iruo 2014, Isẹri Jihova a rehọ euwa nọ i bu te 1,945,487,604 rọ ta usiuwoma. Onana u dhesẹ nọ ma gba riẹ mu no nọ ma rẹ ruabọhọ iruo Jihova. (Ol. 110:3; 1 Kọr. 15:58) Nọ orọnọ “oke nọ u kiọkọ u tulo ho” na, kọ ma gbẹ rọ oke nọ ma rrọ usiuwoma daoma ta ẹme kẹ ahwo bu vi epanọ ma be hai ru anwẹdẹ?—1 Kọr. 7: 29.
Re ma rọ oke nọ ma rrọ usiuwoma ruiruo ziezi, o gwọlọ nọ ma re nwene lele uyero kpobi. Wọhọ oriruo, otẹrọnọ whọ be hae raha auwa hayo bu vi ere evaọ abọjọ usiuwoma na ababọ ohwo nọ whọ rẹ ruẹ ta ẹme kẹ, kọ who gbe ru inwene jọ re whọ sae ruẹ ahwo ta ẹme kẹ? Oria kpobi o rrọ epọvo na ha. Ghele na, ithubro nọ e rrọ obotọ na e rẹ sai fiobọhọ kẹ owhẹ rọ oke nọ whọ rọ rrọ usiuwoma na ruiruo ziezi, whọ gbẹ “bọwo ofou hu.”—1 Kọr. 9:26.
Usiuwoma n’Uwou Ruọ Uwou: Anwọ ikpe buobu ze na, usiuwoma n’uwou ruọ uwou iwhowho-uvie buobu a be hai ro mu usiuwoma họ evaọ ohiohiẹ. Rekọ, nọ orọnọ ma re di ahwo buobu họ uwou hu fikinọ a kpohọ iruo no na, kọ whọ gbẹ dao usiuwoma n’uwou ruọ uwou nọ uvo o tẹ lọhọ no hayo evaọ owọwọ nọ a n’iruo ze no? Evaọ etoke ohiohiẹ rifi uvo, ma rẹ sae ta usiuwoma evaọ iyẹrẹ hayo evaọ eria eki.
Usiuwoma Ẹgbede: A rẹ wọ emẹjẹ hayo eware nọ a re ghelie fihọ eria nọ i re zurie evaọ ẹkwotọ ukoko na. (Rri Odibọgba Uvie Mai orọ Ahrẹ 2013, ẹwẹ. 5.) Otẹrọnọ oria nọ a rẹ wọ emẹjẹ fihọ u gbe bi zurie he, Ogbẹgwae Iruo Ukoko na o rẹ sae jiroro sọ a rẹ gwọlọ oria ofa nọ u bi zurie evaọ ẹkwotọ na.
Izihebro gbe Ebe-Iwuhrẹ Ebaibol: Otẹrọnọ oke nọ whọ be raha fihọ abọjọ usiuwoma ota na u bi wo iruo tere he, kọ whọ gbẹ rehọ oke yena kpohọ ozihebro gbe ebe-uwuhrẹ Ebaibol? Wọhọ oriruo, otẹrọnọ a rẹ jọ usiuwoma n’uwou ruọ uwou evaọ ohiohiẹ Ẹdẹ-Ọmaha di ahwo họ uwou ziezi, kọ who gbe ru obe-uwuhrẹ Ebaibol evaọ oke uvo hayo owọwọ? Evaọ etoke ozihebro, a rẹ sae ghale iwhowho-uvie nọ i wo izihebro evaọ ofẹ ovona kugbe re u fiobọhọ kẹ ae sae nyate ahwo buobu oma.
Dede nọ ma re kele oke kpobi nọ ma raha evaọ usiuwoma, eva e te mae were omai nọ emamọ iyẹrẹ i te noi ze. Whọ tẹ ruẹ nọ abọjọ usiuwoma na o bi wo iruo tere he evaọ etoke jọ, rehọ oke yena rọ dao abọ ọfa usiuwoma na. Lẹ se Jihova, “Olori ivuẹvu na,” re o fiobọhọ kẹ owhẹ rọ oke nọ whọ be hae rọ jọ usiuwoma na ruiruo ziezi.—Mat. 9:38.