Rehọ Oke Ra Ruiruo Ziezi

¹ Unu oke ovona ohwo kpobi o wo evaọ ẹkpoka. Abọ nọ ma rẹ raha rọ vaha emamọ usi na họ onọ o mae ghare keme o rrọ oke nọ a be raha fihọ iruo uzuazọ usiwo. (Rom 1:16) Ma re dhesẹ ovuhumuo mai kẹ onana ẹkwoma omaruẹrẹhọ kẹ usiuwoma ota nọ a m’omaa riẹ, ekpohọ oria omakugbe kẹ usiuwoma ota na evaọ ẹruoke, gbe ẹnya vrẹ evaọ ẹruoke kpohọ ẹkwotọ usiuwoma ota na. U fo re ma muọ usiuwoma họ ovavo viukpenọ ma rẹ raha oke. Nọ Jihova o wuhrẹ omai nnọ “koware koware kpobi ọvuọ ezi riẹ” no na, o gwọlọ re ma rehọ oke nọ ma ruẹrẹ fihọ kẹ odibọgba na ghine ruiruo ziezi.—Ọtausi. 3:1.

² Rehọ Oke Ra Ruiruo Avọ Areghẹ: Eghale buobu i re t’omai obọ evaọ okenọ ma tẹ be yọrọ omaa nọ o kuvẹ kẹ abọ owo evaọ odibọgba na kẹse kẹse gaga. Uzẹme riẹ họ, epanọ ma raha oke te evaọ odibọgba na, ere ma re wo iyẹrẹ iwoma bu te. Nọ ma tẹ dina nwene omaa-iruo mai omojọ, kọ ma sae raha oke fihọ usiuwoma ota na viere? Wọhọ oriruo, nọ iruo ẹghale emagazini i te kuhọ no evaọ Ẹdẹ-Ọmaha, kọ ma sae raha oke ofa jọ ro ru umutho izihebro jọ? Otẹrọnọ ma ta usiuwoma kri no omojọ evaọ Ẹdoka, kọ ma sae jẹ raha oke jọ ro ru izihebro hayo ru obe uwuhrẹ Ebaibol? Kọ o sae lọhọ re ma rehọ usiuwoma ota iyẹrẹ ro fiba usiuwoma ota ọ n’uwou ruọ uwou? Evaọ idhere enana hayo efa, ẹsejọhọ ma sae nyaharo evaọ iruo mai.

³ Evaọ okenọ ma tẹ rọ usiuwoma, oke oghaghae o sai vru mi omai nọ ma gbẹ yọrọ oma ha. Uzẹme, okenọ ova-ehru u te nwene fihọ oghẹrẹ jọ gaga, o rẹ sai kiehọ re ma gwọlọ uwou hayo oria nọ ma rẹ dhẹro. Dede na, evaọ ẹsebuobu ma rẹ sae rehọ oke oyena rọ ta usiuwoma hayo wuhrẹ amọfa uzẹme na. Kọ ma sae dhẹ ruọ uwou ohwo nọ o wo isiuru hayo ọmọ-uwuhrẹ Ebaibol mai jọ?

⁴ Evaọ umutho ikpe jọ nọ i kpemu na, o rrọ bẹbẹ re a di ahwo họ uwou. Re a yeri kugbe ẹbẹbẹ ọnana, iwhowho-uvie buobu a bi ru isẹri-ise n’uwou ruọ uwou rai evaọ oghẹrẹ oke sa-sa evaọ okpẹdẹ na. Kọ whọ gbẹ dawo isẹri-ise na evaọ okenọ uvo o be lọhọ no omojọ hayo evaọ oke owọwọ?

⁵ O rẹ mai woma otẹrọnọ ma bi lele ohwohwo gbiku hu evaọ oke nọ ma tẹ rrọ isẹri-ise ọ iyẹrẹ. Ukpoye, a re dikihẹ ọvuọ oria riẹ re a bigba ahwo re a sai muọ ẹme họ kugbe ai. Fikiere a vẹ rehọ oke na ro ruiruo ziezi je wo oghọghọ no iruo na ze viere.

⁶ Rehọ Uvẹ nọ U Rovie Fihọ Ro Se-Isẹri: Ẹdẹjọ nọ ohwo jọ ọ ta nnọ o wo isiuru hu, Osẹri na ọ tẹ nọe sọ omọfa jọ ọ rrọ uwou na nọ ọ rẹ sae t’ẹme kugbe. Onana u te su kpohọ ẹmeọta kugbe ọzae nọ o wo uwou na, ọnọ ọ mọ ẹyao ikpe buobu no yọ ehwa ọvo ọ rẹ mae jọ. Ẹruore nọ a kẹ fihọ Ẹme Ọghẹnẹ ọ tẹ wariẹ ru isiuru riẹ kẹ uzuazọ kpokpọ. U lehie he ọ tẹ kparoma, bi kpohọ iwuhrẹ eva obọ Ọgwa Uvie, jẹ be ghale ẹruore ọkpokpọ riẹ kugbe amọfa!

⁷ Oniọvo-ọmọtẹ ọ ikpe ikpegbọ jọ o fi iroro-ejẹ na h’iruo re a ta usiuwoma evaọ auwa ọvo taure Uwuhrẹ Obe Ukoko na u te ti muhọ. Evaọ unuẹthẹ ọsosuọ riẹ, ọ tẹ nyaku ọmọtẹ ikpe 13 jọ nọ ọ kezọ kẹe gaga jẹ rehọ obe. Okiokiọ riẹ evaọ obọ isukulu, oniọvo-ọmọtẹ ọmaha na ọ tẹ ruẹ ọmọtẹ ọvo nana. U lehie he, oniọvo na ọ tẹ ta kiẹ nnọ ọ gwọlọ ru uwuhrẹ Ebaibol kugbe ei, ọmọtẹ na ọ tẹ rọwo.

⁸ Rehọ Oke na Ruiruo Ziezi: Abọ nọ ma re wo evaọ usiuwoma ota na kẹse kẹse u re fiobọhọ k’omai bọ ona mai evaọ ẹvuẹ emamọ usi na. Kọ whọ sai ru ona nọ who re ro muọ ẹmeọta họ evaọ unuẹthẹ woma viere ẹkwoma emuhọ-ẹme nọ ọ mai woma nọ who re ro ruiruo? Kọ whọ sae jọ owuhrẹ nọ o wo ona viere evaọ okenọ who te bi ru obe uwuhrẹ Ebaibol? Evaọ ere oruo, whọ sai ghinẹ rehọ oke usiuwoma ota ra na ruiruo ziezi je ru odibọgba ra wo erere viere.—1 Tim. 4:16.

⁹ Nọ “oke nọ a fihọ o rẹ kpẹkpẹe” na, u fo re ma rọ iruo Ileleikristi rọ vọ izuazọ mai. (1 Kọr. 7:29) U fo re oke nọ ma rẹ ghale fihọ kẹ iruo usiuwoma ota na o karo evaọ omaa mai. Joma w’obọ ziezi, avọ ọwhọ evaọ odibọgba na. Oke yọ okẹ ugbunu nọ Jihova ọ rọ k’omai. Ẹsikpobi rehọ iẹ ruiruo avọ areghẹ jẹ rehọ iẹe ruiruo ziezi.

[Box on page 4]

Roro Kpahe Iroro-Ejẹ Enana:

◼ Kpohọ oria omakugbe kẹ usiuwoma ota na evaọ ẹruoke.

◼ Epanọ u fo te, ru itu ọ isẹri-ise na kakao.

◼ Whaha okioraha evaọ ekpohọ obọ ẹkwotọ na.

◼ Ru ẹkwotọ na evaọ oke nọ ahwo buobu a rẹ jọ uwou.

◼ Evaọ ẹsejọ whẹ ọvo nyusu otẹrọnọ ozọ o riẹ hẹ.

◼ Ru izihebro nọ e kẹle ẹkwotọ usiuwoma ota n’uwou ruọ uwou ra na.

◼ Ruabọhọ usiuwoma ota evaọ okenọ amọfa nọ a rrọ utu na a te lehie evaọ unuẹthẹ jọ.

◼ Rehọ okenọ ova-ehru u ro nwene na ro ruiruo ziezi.

◼ Oke kpobi nọ o lọhọ, wọhọ epanọ uyero na o rrọ, ta usiuwoma lehie vi auwa ọvo.