Rọ Aro Kele Eruẹaro Na—Jona
1. Emamọ iruemu vẹ Jona o wo?
1 Eme ọ rẹ ze owhẹ iroro nọ whọ tẹ kareghẹhọ Jona ọruẹaro na? Ahwo jọ a re roro nọ Jona yọ ọdhozọ hayo ohwo nọ ọ rrọ eva gaga. Rekọ Jona o wo emamọ iruemu, ọ roma kpotọ, o wo udu, o te je dhesẹ ọdawẹ kẹ amọfa. Ẹvẹ whọ sae rọ rehọ aro kele emamọ iruemu Jona?—Jem. 5:10.
2. Ẹvẹ ma sae rọ rehọ aro kele omaurokpotọ Jona?
2 Omaurokpotọ: Nọ Ọghẹnẹ ọ kaki vi Jona uwou, ọ tẹ dhẹ rri ofẹ ọfa. Ẹsejọhọ oware nọ o soriẹ ze họ, ahwo Asiria a re ru ozighi gaga, yọ a se Ninẹve “okpẹwho ijihẹ.” (Nah. 3:1-3) Rekọ, Jihova o fi obọ họ kẹ Jona kpọ iroro riẹ vi. Avọ omaurokpotọ, Jona ọ tẹ nya uwou nọ Jihova o vi rie na uwhremu na. (Itẹ 24:32; Jona 3:1-3) Dede nọ ọ dhẹ oke ọsosuọ, nọ Jihova ọ wariẹ vi ei uwou na ọ tẹ nwani ru epanọ Jihova ọ ta kẹe. (Mat. 21:28-31) Kọ ma be rọ aro kele uruemu nana, be ta usiuwoma na o tẹ make rọnọ a whọku omai hayo ahwo nọ ma be ta usiuwoma kẹ a be gaviezọ họ?
3. Oke vẹ o mae gwọlọ nọ who re dhesẹ udu gbe ọdawẹ evaọ usiuwoma ota na?
3 O Wo Udu, O te je Dhesẹ Ọdawẹ: Nọ Jona ọ ruẹ nọ ẹkporo o bi fi okọ nọ ọ ro na fiki oware uyoma nọ o ru, o te fi uzuazọ riẹ họ oza re enọ i bi bi okọ na a seba ewhu. (Jona 1:3, 4, 12) Uwhremu na, nọ Jona o te obọ Ninẹve, ọ tẹ ruọ eva okpẹwho na, ẹsejọhọ re ọ gwọlọ oria nọ u kiehọ nọ ọ sae jọ whowho ovuẹ ẹdhoguo Jihova. Onana u dhesẹ nọ Jona yọ ọdhozọ họ rekọ ọruẹaro Ọghẹnẹ nọ o wo udu. (Jona 3:3, 4) Kọ omai nẹnẹ? O gwọlọ nọ ma re wo udu re ma sae ta usiuwoma na ababọ ozodhẹ nọ a tẹ be wọso omai. (Iruẹru 4:29, 31) U te no ere no, o gwọlọ ọdawẹ re ma sae rehọ oke gbe eyero mai fi obọ họ kẹ amọfa evaọ iruo usiuwoma ota na.—Iruẹru 20:24.
4. Fikieme u je fo nọ ma re roro didi kpahe emamọ oriruo nọ eruẹaro Jihova a fihọ otọ kẹ omai?
4 Nọ who te se oria Ebaibol nọ o ta kpahe ọruẹaro Jihova jọ, who ti wo erere no iku na ze nọ who te fi omara họ ẹta ọruẹaro yena. Nọ omara nọ: ‘Didi ẹme mẹ hae ta? Ẹvẹ mẹ sae rọ rehọ aro kele emamọ iruemu ọruẹaro na?’ (Hib. 6:11, 12) Izoẹme efa nọ e te romavia evaọ Odibọgba Uvie Mai evaọ obaro e te ta kpahe epanọ ma sae rọ rehọ aro kele eruẹaro Jihova efa.