Eme Ọ be Wọ Omai Ta Usiuwoma?
1. Uyoyou kẹ amono o rẹ wọ omai ta usiuwoma na?
1 Usiuwoma Uvie Ọghẹnẹ nọ ma rẹ ta họ oware nọ o mai woma nọ ma re ru nẹnẹ. Nọ ma tẹ be ta usiuwoma na, yọ ma bi koko izi ivẹ nọ e mae rro na, enọ e ta nọ ma re you Jihova, je you ọrivẹ mai. (Mak 12:29-31) Uyoyou o rẹ wọ omai ta usiuwoma na avọ ọwhọ.—1 Jọn 5:3.
2. Ẹvẹ usiuwoma nọ ma be ta u ro dhesẹ nọ ma you Jihova?
2 Uyoyou kẹ Jihova: Ma te you Jihova, ma ti se isẹ kẹe. Anwọ ikpe idu ezeza (6,000) na nọ Setan ọ be rọ ta Jihova raha. (2 Kọr. 4:3, 4) O bi ru ahwo rọwo nọ Ọghẹnẹ o re gboja kẹ erahaizi evaọ erae ehẹle, inọ Ọghẹnẹ yọ Esanerọvo nọ a rẹ sai wo otoriẹ riẹ hẹ, gbe nọ Ọghẹnẹ ọ be daezọ ahwo akpọ họ. Ahwo buobu a tubẹ rọwo nọ Ọghẹnẹ ọ rrọ họ. Fikiere o rrọ omai oja re ma wuhrẹ ahwo uzẹme na kpahe Jihova. Oma nọ ma be dawo re ma se isẹ kẹ Jihova o be were iẹe, je ru oma vo Setan.—Itẹ 27:11; Hib. 13:15, 16.
3. Ẹvẹ usiuwoma nọ ma be ta kẹ amọfa u ro dhesẹ nọ ma you rai?
3 Uyoyou kẹ Erivẹ: Nọ whọ tẹ ta usiuwoma kẹ ohwo, u dhesẹ nọ who you rie. O gwọlọ nọ ahwo a re yo usiuwoma na evaọ oke obẹbẹ nana. Ahwo buobu a wọhọ ahwo Ninẹve nọ Jona o whowho ovuẹ Ọghẹnẹ kẹ, enọ e “riẹ obọze avọ ẹkpẹlobọ rai hi.” (Jona 4:11) Usiuwoma nọ ma be ta kẹ ahwo u re fi obọ họ kẹ ai riẹ oghẹrẹ nọ a sai ro wo evawere evaọ uzuazọ. (Aiz. 48:17-19) Usiuwoma na o rẹ kẹ ae ẹruore. (Rom 15:4) Ohwo nọ ọ gaviezọ kẹ usiuwoma na je ru lele eware nọ o bi wuhrẹ, “a re ti siwi ei.”—Rom 10:13, 14.
4. Eme ọ rẹ thọrọ Jihova ẹro vievie he?
4 Emamọ emọ a re you esẹgbini rai ẹsikpobi orọnikọ ẹsejọ ọvo ho. Epọvo na re, uyoyou nọ ma wo kẹ Ọghẹnẹ gbe erivẹ mai o rẹ wọ omai gwọlọ uvẹ nọ ma rẹ rọ ta usiuwoma ẹsikpobi orọnikọ okenọ ma lele ukoko mai kpohọ usiuwoma ọvo ho. Ma re seri usiuwoma ota họ họ. (Iruẹru 5:42) Uyoyou utioye na o rẹ thọrọ Jihova ẹro vievie he.—Hib. 6:10.