Rọ Aro Kele Eruẹaro Na—Joẹl
1. Nọ ma tẹ rrọ usiuwoma, ẹvẹ ma sae rọ rehọ aro kele Joẹl?
1 Ono họ Joẹl ọruẹaro na? Ẹme nọ ọ ta kpahe omariẹ kpobi họ, ọyomariẹ yọ “ọmọzae Pẹtuẹl.” (Joẹl 1:1) Ọruẹaro nana nọ o wo omaurokpotọ na ọ jẹ ta kpahe ovuẹ Jihova orọnikọ omobọ riẹ hẹ. Epọvo na re, nọ ma tẹ rrọ usiuwoma, ma re ru re amọfa a jiri omai hi, ukpoye ma re se no Ebaibol na ze jẹ rehọ ujiro kpobi kẹ Jihova. (1 Kọr. 9:16; 2 Kọr. 3:5) Ofariẹ, usiuwoma nọ ma be ta na o rẹ bọ omai ga. Abọ vẹ ọrọ eruẹaruẹ Joẹl na e rẹ sai fi obọ họ kẹ omai wo ọwhọ gbe ẹruore?
2. Nọ ma riẹ nọ ẹdẹ Jihova o kẹle no na, eme ma re ru?
2 “Ẹdẹ ỌNOWO na Ọ Kẹle I No” (Joẹl 1:15): Dede nọ a kere eme nana ikpe buobu nọ i kpemu, ma be rria etoke nọ i bi ro rugba. Akpọ na o bi dhe eyeyoma, ahwo a bi se omai ẹkoko, yọ a be rọwo gaviezọ kẹ usiuwoma na ha. Enana kpobi i dhesẹ nọ edẹ urere uyerakpọ omuomu nana ma be rria na. (2 Tim. 3:1-5; 2 Pita 3:3, 4) Nọ ma te roro kpahe epanọ urere na o kẹle te no, ma te rọ usiuwoma ota na karo evaọ uzuazọ mai.—2 Pita 3:11, 12.
3. Fikieme usiuwoma ota na o rọ roja maero nọ etoke uye ulogbo na o kẹle no na?
3 “ỌNOWO na Họ Oria Adhẹzọ Ahwo Riẹ” (Joẹl 3:16): Enuhu nọ a jọ oria Ebaibol nana fodẹ na u dhesẹ oke nọ ofu Jihova o te rọ ze evaọ etoke uye ulogbo na. Eva e be were omai inọ Jihova o ti siwi idibo riẹ evaọ oke yena. (Evia. 7:9, 14) Nọ ma be ta usiuwoma na jẹ be ruẹ oghẹrẹ nọ Jihova ọ be rọ kẹ omai ẹgba na, onana u ti ru omai wo ẹrọwọ gbe ithihakọ nọ i ti fi obọ họ kẹ omai evaọ etoke uye ulogbo na.
4. Fikieme eva e rẹ rọ were omai?
4 Dede nọ ahwo jọ a ta nọ ovuẹ ọraha ọvo Joẹl o je whowho, Joẹl ọ ta kpahe esiwo nọ idibo Ọghẹnẹ a bi rẹro riẹ. (Joẹl 2:32) Fikiere, nọ esiwo mai ọ kẹle no na, joma ta usiuwoma Uvie na ududu nọ ma bi ru lele ẹme nọ ọ rrọ Joẹl 2:23, nọ o ta nọ: “Jọ eva e were owhai eva ỌNOWO na, Ọghẹnẹ rai.”