Rọ Aro Kele Eruẹaro Na—Hosia
1. Onọ vẹ o sae jọnọ whọ nọ omara no?
1 ‘Didi eware mẹ rẹ sai gbobọnẹ fiki Jihova?’ Ẹsejọhọ whọ nọ omara onọ yena no nọ who roro didi kpahe eware ezi nọ Jihova o ru no gbe ohrọ-oriọ riẹ. (Ol. 103:2-4; 116:12) U no Hosia eva ze re o ru oware nọ Jihova ọ ta kẹe nọ o ru, dede nọ o gwọlọ nọ ọ rẹ kpairoro vrẹ eware jọ. Ẹvẹ ma sae rọ rehọ aro kele Hosia?
2. Ẹvẹ ma sae rọ rehọ aro kele Hosia evaọ usiuwoma ota na?
2 Ta Usiuwoma na Evaọ Oke Ebẹbẹ: Hosia o je whowho ovuẹ riẹ evaọ uvie erua-ikpe Izrẹl, yọ evaọ oke yena ahwo a gbẹ jẹ gọ Jihova ha. Jeroboam II nọ ọ jọ ovie evaọ oke yena o je ru eware iyoma evaọ aro Jihova, yọ ọ jẹ wha egagọ ọmọ-eruẹ nọ Jeroboam I ọ tohọ na haro. (2 Iv. 14:23, 24) Ivie efa nọ i su e ruabọhọ ekpehre uruemu ovona bẹsenọ a rọ raha uvie erua-ikpe na evaọ ukpe 740 B.C.E. Dede nọ egagọ erue i je titi evaọ oke yena, Hosia ọ gọ Jihova jẹ jọ ọruẹaro evaọ ikpe nọ i bu te 59. Kọ ma gba riẹ mu nọ ma rẹ ta usiuwoma na ẹsikpobi re, makọ oke nọ ahwo a be wọso omai hayo nọ a gwọlọ yo ho?—2 Tim. 4:2.
3. Ẹvẹ oware nọ Hosia o ru u ro dhesẹ ohrọ-oriọ Jihova via?
3 Tẹrovi Ohrọ-Oriọ Jihova: Jihova ọ ta kẹ Hosia nọ jọ ọ rehọ “aye ogberẹ.” (Hos. 1:2) Dede nọ Goma, aye riẹ o yẹ ọmọzae kẹe, u muẹro nọ ọ wariẹ yẹ emọ ivẹ efa nọ e jọ emọ Hosia ha. Hosia ọ rọ vrẹ aye riẹ, onọ u dhesẹ ohrọ-oriọ ulogbo nọ Jihova o wo kẹ emọ Izrẹl nọ i kurẹriẹ. (Hos. 3:1; Rom 9:22-26) Kọ ma sai thihakọ eware jọ re ma sae ta kẹ amọfa kpahe ohrọ-oriọ Jihova?—1 Kọr. 9:19-23.
4. Didi eware ma rẹ sai gbobọnẹ fiki Jihova?
4 Idibo Jihova jọ a no iruo nọ a jẹ jọ hwa ae okposa re a sae ruẹ oke ta usiuwoma na ziezi. Amọfa jọ a gba riẹ mu nọ a rẹ rọo hayo yẹ emọ họ re a sae rọ oma kẹ egagọ Jihova ziezi. Nọ ma te roro kpahe uzuazọ nọ Hosia o yeri, ma rẹ sae ta nọ, ‘Mẹ rẹ sai ru oware utioye vievie he.’ Rekọ, nọ ma te roro didi kpahe uyoyou ulogbo nọ Jihova o wo kẹ omai, jẹ kuvẹ re ẹzi riẹ o fi obọ họ kẹ omai, Jihova ọ rẹ sae rọ omai ru iruo nọ ma roro nọ ma rẹ sai ru vievie he wọhọ epanọ o jọ kẹ Hosia na.—Mat. 19:26; Fil. 2:13.