Eware nọ A rọ Ẹro Ruẹ
◼ Obọ Australia: Ọzae jọ nọ a re se John nọ o kpohọ isukulu ziezi, ọ jẹ hai kpohọ ichọche evaọ okenọ ọ jọ ọmaha, rekọ uwhremu na o te zihe ruọ ohwo nọ ọ “rọwo nọ Ọghẹnẹ ọ rrọ vievie he.” Ọkobaro jọ ọ tẹ kẹe ibroshọ na Was Life Created? Nọ o zihe bru ei ọ tẹ kẹe ibroshọ Origin of Life. Ọkobaro na ọ tẹ be hai zihe bru ei re ọ kẹe emagazini nọ i kpozi nọ e ta ẹme kpahe emama hayo eruẹaruẹ Ebaibol. Nọ u te oke jọ no ọ tẹ kẹ John obe na, The Bible—God’s Word or Man’s? Nọ o se obe na no, ọ tẹ ta nọ ọyomariẹ yọ ohwo nọ “ọ dina wo avro sọ Ọghẹnẹ ọ rrọ.” Kẹsena ọkobaro na ọ tẹ kẹe obe ọ Ebaibol Wuhrẹ na, a te se edhe. 8 evaọ ẹwẹ. 20 gbe edhe. 13-16 evaọ ẹwẹ. 23-24. Eria Ebaibol nọ a fodẹ evaọ obe na e were John te epanọ ọ rọ ta nọ, “O wọhọ nọ mẹ te wariẹ kiẹ Ebaibol na riwi.”
◼ Obọ Mexico: Ọzae jọ ọ ta kẹ oniọvo jọ inọ ọ rọwo nọ Ọghẹnẹ o wo eme Ebaibol na ha. Oniọvo na ọ tẹ ta kẹe oware nọ u dhesẹ nọ Ọghẹnẹ o wo eme Ebaibol na. Nọ avọ oniọvo na a ta ẹme unuẹse jọ no, eware nọ ọzae na o bi wuhrẹ no Ebaibol ze na i te ti tei udu. Oware jọ nọ u duobọtei gaga họ, nọ o wuhrẹ kpahe izi Ọghẹnẹ. Ọ vuẹ oniọvo na nọ: “Oke ọsosuọ nọ mẹ avọ owhẹ ma je se Ebaibol, o jọ wọhọ ẹsenọ ma bi se obe gheghe, eme na i je duobọte omẹ hẹ. Rekọ nọ ma te bi se Ebaibol enẹna, maero kọ izi nọ e ta kpahe emamọ uruemu, i re duobọte omẹ udu gaga.”
◼ Obọ America: Nọ oniọvo jọ avọ aye riẹ a fi ebe ukoko na họ emẹjẹ evaọ oria jọ nọ u re zurie, a tẹ ruẹ aye jọ nọ o no obọ Taiwan ze, ọnọ ọ rọwo nọ Ọghẹnẹ ọ rrọ, rekọ o roro nọ Ebaibol na yọ obe ahwo America. Ọ ta nọ oware nọ o lẹliẹ e riẹ nya ziọ oria ebe na họ, eva e be were iẹe he dede nọ o wo ugho. Rekọ o je rẹro inọ Ebaibol na u ti fi obọ họ kẹe wo evawere evaọ uzuazọ. Oniọvo na avọ aye riẹ a tẹ rehọ obe Ebaibol Wuhrẹ na ro mu uwuhrẹ họ kugbei, avọ ibroshọ Lasting Peace and Happiness—How to Find Them. Ukpenọ a wuhrẹ uzou avọ 2 evaọ obe Ebaibol Wuhrẹ na, a te wuhrẹ uzoẹme nana “A Guidebook for the Blessing of All Mankind” evaọ ibroshọ na. Nọ a ta kpahe edhe-ẹme ọsosuọ rite ọrọ avọ ezeza no, aye na ọ tẹ ta nọ u gbe rie unu gaga inọ Ebaibol na o wo ohẹriẹ no ebe egagọ efa kpobi. Nọ a ta kpahe eruẹaruẹ Ebaibol nọ i rugba no, aye na ọ tẹ ta nọ, “Obe ofa nọ mẹ rẹ sai roro ku nọ o gba te Ebaibol na o rrọ họ!”
◼ Obọ Japan: Oniọvo jọ ọ ta usiuwoma kẹ ohwo jọ nọ ọ ta nọ Ọghẹnẹ ọ rrọ họ, rekọ oniọvo na ọ jẹ hae kẹe Awake! nọ i wo izoẹme ọ “Was It Designed?” Ẹmẹrera na, ọzae na o te ti nwene iroro, jẹ ta nọ ẹsejọhọ Ọmemama jọ ọ riẹ. Enẹna, ọzae na ọ rọwo nọ Ọghẹnẹ ọ rrọ, yọ oniọvo na ọ be rehọ ibroshọ Emamọ Usi nọ U No Obọ Ọghẹnẹ Ze! ro wuhrẹ iẹe.
◼ Obọ Canada: Nọ aye jọ o je no uwou riẹ ze re ọ ruọ omoto riẹ, oniọvo-ọmọtẹ jọ ọ tẹ kẹe emagazini nọ i kpozi kẹle. Nọ oniọvo na o zihe, aye na ọ tẹ ta kẹe nọ ọ gwọlọ wuhrẹ hẹ, yọ ọ rọwo nọ Ọghẹnẹ ọ rrọ họ. Rekọ oniọvo na ọ tẹ wariẹ zihe, ọ tẹ wha ibroshọ A Satisfying Life—How to Attain It lele oma. Nọ oniọvo na o di ei họ uwou, ọ tẹ ta kẹ aye na nọ o bi roro kpahe iẹe dede nọ ọ rọwo Ọghẹnẹ hẹ, keme o muẹrohọ nọ aye na ọvo ọ be yọrọ emọ riẹ. O te dhesẹ edhe-ẹme avọ 6 nọ o rrọ ẹwẹ-obe avọ 4 ibroshọ na kẹe, onọ o ta kpahe oria nọ ma rẹ jọ duku emamọ ohrẹ. Kẹsena ọ tẹ ta kẹe re o se ithubro nọ e rrọ uwuhrẹ avọ 2 na, onọ o ta kpahe epanọ a rẹ rọ yọrọ emọ. Eva e were aye na gaga, ọ tẹ rehọ ibroshọ na.