Rọ Aro Kele Eruẹaro Na—Nahum
1. Eme ma wuhrẹ no obe Nahum ze?
1 A raha okpẹwho Ninẹve muotọ wọhọ epanọ Nahum ọ ruẹaro riẹ, onọ o kẹ imuẹro nọ Jihova ọ rẹ siọ ewegrẹ riẹ ba eru kele he. Makọ oghẹrẹ kpobi nọ a ga te kẹhẹ, ọvo ọ sai dikihẹ hẹ. (Nah. 1:2, 6) Nọ ma tẹ kiẹ eruẹaruẹ Nahum na riwi ziezi, u ti fiobọhọ kẹ omai evaọ usiuwoma na.
2. Ẹvẹ ma sai ro ru ovuẹ mai siuru?
2 Kẹ Ahwo Omosasọ gbe Ẹruore: Who te rri oghẹrẹ nọ obe Nahum na u ro muhọ, who re roro nọ ọraha nọ o bi ti te Ninẹve okpẹwho esuo Asiria na ọvo ọ ta ẹme kpahe. (Nah. 1:1; 3:7) Rekọ, ovuẹ ẹdhoguo na o jọ emamọ usi kẹ idibo Jihova. Otofa odẹ Nahum họ “Ọnọ ọ rẹ sasa ahwo oma,” yọ onana o kẹ ahwo Ju imuẹro nọ Jihova o ti kpe ewegrẹ rai no kẹle. Nahum ọ tẹ jẹ ta nọ Jihova họ “adhẹzọ mai eva oke ukpokpoma.” (Nah. 1:7) Nọ ma be ta usiuwoma na, mai omamai ma bi whowho emamọ usi jẹ tuduhọ amọfa awọ re a fi Jihova họ adhẹzọ rai.—Nah. 1:15.
3. Ẹvẹ ma sae rọ rehọ iriruo gbe etadhesẹ ta usiuwoma wọhọ epanọ Nahum o ru na?
3 Rọ Iriruo gbe Etadhesẹ Ta Usiuwoma Na: Nahum o kere nọ ọraha nọ o ti te Ninẹve o te wọhọ onọ u te okpẹwho Ijipti nọ a re se Thẹbis (koyehọ No-amọn), onọ ahwo Asiria a raha evaọ oke nọ u kpemu. (Nah. 3:8-10) Nọ ma be vuẹ ahwo kpahe ekuhọ uyerakpọ omuomu nana, ma rẹ jẹ ta kpahe eruẹaruẹ Ebaibol nọ i rugba no nọ i dhesẹ nọ Jihova o re gine ru eyaa riẹ kpobi gba. Wọhọ oriruo, okenọ egbaẹmo Babilọn avọ erọ Midia a wọ ẹmo ziọ okpẹwho Ninẹve evaọ ukpe 632 B.C.E., okposo jọ nọ ọ rrọ o tẹ lẹliẹ Ethẹ Taigris vọ kpọhọhwẹ, o tẹ lẹliẹ abọjọ igbẹhẹ ikpehru nọ e jẹ thọ okpẹwho na zurie. A te fi Ninẹve kparobọ lọlọhọ wọhọ epanọ Jihova ọ ta.—Nah. 1:8; 2:6.
4. Ẹvẹ ma sai ro ru ẹme mai vẹ re ahwo a wo otoriẹ riẹ?
4 Jọ Ẹme Ra O Vẹ re Ahwo A Wo Otoriẹ Riẹ: Oghẹrẹ nọ Nahum o dhesẹ eware nọ o kere kpahe na gbe oghẹrẹ nọ e te rọ via o jọ vevẹ. (Nah. 1:14; 3:1) Epọvo na re, u fo nọ eme mai e rẹ jọ vevẹ nọ ahwo a re wo otoriẹ rai lọlọhọ. (1 Kọr. 14:9) Evaọ ẹdẹ ọsosuọ nọ whọ rọ nyae ta usiuwoma kẹ ohwo, vuẹe vevẹ oware nọ o wọ owhẹ ze. Nọ who te bi wuhrẹ Ebaibol kugbe ahwo, fiobọhọ kẹ ai re a fi ẹrọwọ họ Jihova gbe Ẹme riẹ, re a jẹ riẹ oghẹrẹ nọ ẹme na o ro kiekpahe ae dẹẹ.—Rom 10:14.
5. Imuẹro vẹ ma wo no eruẹaruẹ Nahum na ze?
5 Eme nọ e rrọ obe Nahum na i dhesẹ nọ Nahum o fievahọ eme Jihova inọ e te seba erugba ha. Nọ ma kẹle ekuhọ uyerakpọ Setan no na, ma wo omosasọ no eme nana nọ Jihova ọ ta na ze inọ: “Ọ rẹ kpare bru ewegrẹ riẹ isiava ha, rekọ ẹsiẹvo ọ rẹ raha ae no.”—Nah. 1:9.