Ile Ekpokpọ Rọkẹ Egagọ Mai
1 Evaọ ẹgwae ẹgbukpe Isẹri Jihova nọ a jọ obọ America gba kẹle na evaọ Akpe 4, 2014, a ru owhowhovia inọ ma bi ti nwene obe-ile mai na. Usi nana o wha evawere se inievo na gaga. A kareghẹhọ inievo na kpobi epanọ ile ukoko na i wuzou te evaọ egagọ mai.—Ol. 96:2.
2 O sai gb’owhẹ unu nọ, ‘Fikieme a bi je ro nwene obe-ile na?’ Eware buobu e wha riẹ ze. Orọ ọsosuọ, otoriẹ nọ ma wo kpahe Ikereakere na u bi dhe evevẹ yọ onana o te lẹliẹ eme ile jọ nwene. (Itẹ 4:18) Oware ofa nọ o te lẹliẹ omai nwene obe-ile na ona: Eme buobu nọ e rrọ obe-ile mai na a rehọ e rai no Ebaibol ọ New World Translation nọ ma wo vẹre na ze. Obọnana, u fo nọ ma re nwene eme ile na re e rọwokugbe eme ọ Ebaibol ọ New World Translation ọkpokpọ na. Onana o te gwọlọ omodawọ gaga, fikiere ma tẹ jiroro nọ ma rẹ nwane rọ uvẹ nana fi ile efa ba obe-ile na.
3 Kọ ma te hẹrẹ bẹsenọ a re printi obe-ile ọkpokpọ na tao re ma te mu ile ekpokpọ na họ ẹso? Ijo. Eva e were omai nọ ma be rọ j’owhai riẹ nọ no umuo oke nana vrẹ, ma te hai fi ile ekpokpọ na họ Oria Evuẹ itanẹte jw.org mai na. Nọ a te siobọno ole ọkpokpọ, a te rehọ iẹe ku Ewuhrẹ Odibọgba họ, onọ a ti se “ole ọkpokpọ” evaọ Odibọgba Uvie Mai.
4 Epanọ A re ro Wuhrẹ Ile Ekpokpọ Na: O rẹ dina jọ bẹbẹ re a wuhrẹ ole ọkpokpọ. Ghele na, ma rẹ daoma suile evaọ iwuhrẹ ukoko mai wọhọ epanọ ọso-ilezi na o ru, orọnikọ ma re mu unu họ họ. (Ol. 30:12) Re whọ sai wuhrẹ ile ekpokpọ na, ru lele ithubro nana:
Gaviezọ kẹ ikporakporo ole na unuẹse buobu, onọ ma ti fihọ Oria-Evuẹ mai na. Epanọ whọ gaviezọ kẹ ikporakporo na te, ere whọ te kareghẹhọ ole na te re.
Wuhrẹ eme ole na, jẹ daoma fi ai họ uzou.
Suole na lele ikporakporo na. So ẹe unuẹse buobu bẹsenọ whọ rẹ riẹ ole na.
Wha hae rọ oke jọ so ile ekpokpọ na kugbe evaọ etoke Egagọ Uviuwou rai bẹsenọ uviuwou na soso o rẹ riẹ ile na.
5 Evaọ emerae nọ e rrọ aro na, otẹrọnọ ole ọkpokpọ a ti ro ku Ewuhrẹ Odibọgba họ, ukoko na soso o rẹ gaviezọ kẹ ikporakporo ole na ẹsiẹvo tao. Kẹsena a vẹ so ole na lele ikporakporo na, wọhọ epanọ ma be hai ru anwẹdẹ.
6 Evaọ uzẹme, ile nọ ma rẹ so evaọ obọ ewuhrẹ yọ obọdẹ edhere jọ nọ ma re ro kuomagbe inievo mai rọ uvou mai jiri Jihova, yọ onana o rẹ kẹ omai evawere. Fikiere, u fo nọ ma rẹ whaha uruemu otafe nọ ma rẹ ro nọ a tẹ gwọlọ so ole evaọ obọ ewuhrẹ.
7 U te no ere no, edhere ọfa ọ riẹ nọ ma sai ro dhesẹ nọ ma rri ile ukoko na ghaghae. Evaọ ikokohọ ubrotọ gbe erọ okogho mai, u wo ikporakporo nọ a ruẹrẹhọ nọ a re kporo taure abọ ohiohiẹ gbe abọ uvo u te ti muhọ. Isiava ẹgbukpe inievo-emetẹ gbe emezae a rẹ rọ ugho obọrai jẹ ofa no eghagha avọ eghagha kpobọ Patterson, New York, re a kporo ile ewewere nana rọkẹ egagọ mai. Fikiere, nọ ohwo-agbara na o te zizie omai nọ ma keria re ma reawere ikporakporo nana nọ a ruẹrẹhọ kẹ omai na, joma ru ere. Onana u ti fiobọhọ kẹ omai ruẹrẹ udu mai kpahe kẹ eme nọ ma bi ti yo na.—Ẹzra 7:10.
8 Ma te rọ ole ọkpokpọ mai jọ ro ku ewuhrẹ inẹnẹ na họ nọ uzoẹme riẹ o ta nọ “Uvie na U bi Su—Jọ O Ze!” A jọ ẹgwae ẹgbukpe nọ a gba kẹle na ta kpahe ole nana, yọ ugogo ẹjiroro nọ a rọ ruẹrẹ ole nana họ họ, re a rehọ iẹe dhesẹ nọ anwọ ikpe 100 ena nọ Uvie na u ro muhọ esuo na.
9 Ababọ avro, ile ekpokpọ na yọ “eware iwoma” jọ nọ Jihova ọ kẹ omai. (Mat. 12:35a) Joma gbaemu nọ ma re wuhrẹ ile ekpokpọ nana jẹ so ae no udu ze, re ma rọ ere jiri Ọghẹnẹ mai jẹ wha orro sei.—Ol. 147:1.