Ghale “Eware Iwoma” Ẹkwoma Amọfa nọ Whọ rẹ Ghọ (Mat. 12:35a)

Ababọ avro, mai kpobi ma gwọlọ ghale “eware iwoma” ẹkwoma amọfa nọ ma rẹ “ghọ.” (Rom 12:13) Ekpako ukoko a bi ru onana ẹkwoma ọkovuẹ ọrara nọ a rẹ ghọ, a vẹ jẹ hwa ugho nọ ọ rọ jẹ ofa. Rekọ o rẹ sae jọ omai obọ gbẹgbẹdẹ ẹsejọ re ma ru ọghọ hayo zizie ohwo ziọ uwou mai fikinọ ma wo ugho tere he, hayo fiki oghẹrẹ uwou nọ ma be rria. Ma te roro kpahe ẹme nọ Jesu ọ ta kẹ Mata, o rẹ sai fiobọhọ kẹ omai nọ ma gbẹ rọ ruawa kpahe eware itieye na ha. (Luk 10:39-42) Jesu ọ ta nọ “abọ owoma” nọ o rrọ ọghọruo họ omakugbe gbe uduotahawọ nọ ma rẹ kẹ ohwohwo, orọnikọ okpemu nọ ma re there hayo emamọ uwou nọ egbara e rrọ nọ ma re wo tao ho. Ma te fi ohrẹ nana họ iruo, ma te sae ghale “eware iwoma” kẹ inievo mai wọhọ epanọ Ebaibol na ọ ta.—3 Jọn 5-8.