Fiobọhọ kẹ Ahwo nọ I Tuaro Wuhrẹ Kpahe Jihova
1. Ẹvẹ Jesu o ro dhesẹ ohrọ kẹ ahwo nọ i tuaro?
1 Emedẹ jọ ọvo i kiọkọ taure a te ti kpe Jesu. Nọ o je no okpẹwho Jeriko vrẹ, ezae ituaro ivẹ jọ nọ e be yare eware a te bo gaga nọ: “Jọ ohrọ mai o re owhẹ, Olori!” Dede nọ Jesu o je roro kpahe oja nọ a bi ti gbe kẹe, o dikihẹ, o te se ezae ivẹ na je siwi ai. (Mat. 20:29-34) Ẹvẹ ma sae rọ rehọ aro kele ohrọ nọ Jesu o dhesẹ kẹ ituaro na?
2. Ẹvẹ ma sae rọ ta usiuwoma kẹ ohwo nọ o tuaro nọ ma nyaku evaọ ẹgbede?
2 Fiobọhọ: Whọ tẹ nyaku ohwo nọ o tuaro, o tẹ make rrọ ẹgbede, dhesẹ oma kẹe jẹ vuẹe nọ whọ gwọlọ fiobọhọ kẹe. Fikinọ a re gbolo aro kẹ je fru eware mi ahwo nọ i tuaro, ozọ o rẹ sai mu ei evaọ oke ọsosuọ. Rekọ whọ tẹ whẹtiẹ ei họ oma je dhesẹ nọ whọ gwọlọ gine fiobọhọ kẹe, udu riẹ u ti te otọ. Kareghẹhọ nọ aro-otuo kpobi ọ rrọ epọvo na ha, yọ onana u re dhesẹ epanọ who re fiobọhọ kẹe te. Who te fiobọhọ kẹe no, whọ sae vuẹe nọ whọ rrọ usu ahwo nọ e be rọ Ebaibol wuhrẹ ahwo. Ta kẹe nọ whọ gwọlọ se oria Ebaibol jọ kẹe, se oria wọhọ Olezi 146:8 hayo Aizaya 35:5, 6. Otẹrọnọ ọ rẹ sai se obe nọ ahwo ituaro a rẹ rọ obọ rara se nọ a re se Braille, nọe sọ whọ sae rọ obe utioye na sei, re u fiobọhọ kẹe gbe wuhrẹ Ebaibol na. Whọ sae jẹ rehọ enọ a se fihọ jw.org/iso rọ kẹe. Otẹrọnọ ekọmputa riẹ u wo okwakwa nọ u re se eme do via no ekọmputa na ze, whọ sae rehọ ebe mai jọ nọ e rrọ jw.org/iso sei evaọ RTF (Rich Text Format) nọ a rẹ sai fihọ ekọmputa re u se eme na do via kẹe.—Rri ẹkpẹti na “Who te bi Fiobọhọ kẹ Ohwo nọ O Tuaro. . . .”
3. Ẹvẹ ma sae rọ ruẹ ahwo nọ i tuaro evaọ ẹkwotọ mai?
3 Gwọlọ Ahwo nọ I Tuaro: Ma rẹ kake ruẹ ahwo nọ i tuaro ho nọ ma tẹ rrọ usiuwoma n’uwou ruọ uwou keme o rẹ jarae oma oghẹrẹ jọ re a ta ẹme kẹ ohwo nọ a riẹ hẹ. Fikiere, o ginẹ gwọlọ omodawọ gaga mi omai re ma “gwọlọ” ae via jẹ ta usiuwoma kẹ ae. (Mat. 10:11) Kọ u wo ohwo jọ nọ o tuaro nọ wha gbẹ rrọ iruo hayo isukulu? Daoma lelei ta ẹme. Otẹrọnọ ẹkwotọ ra u wo isukulu kẹ ahwo nọ i tuaro, rehọ ebe Braille mai kẹ ae re a fihọ uwou-ebe isukulu na. Kọ whọ riẹ ohwo jọ nọ ohwo uviuwou riẹ o tuaro? Otẹrọnọ a jọ ẹkwotọ ra wo itu nọ e rẹ rẹrote ituaro hayo enọ i re kpohọ iwou nọ ahwo ituaro e rrọ nyai fiobọhọ, vuẹ ohwo uviuwou ohwo na, ọnọ o re dede ahwo rehọ, hayo ohwo nọ o wuzou oria na inọ o rẹ were Isẹri Jihova re a fiobọhọ kẹ ahwo nọ i tuaro, jẹ vuẹe nọ whọ te rehọ ebe nọ ahwo nọ i tuaro a re se hayo enọ a rekọdo sei. Se oria Ebaibol jọ kẹe nọ o ta nọ Ọghẹnẹ o ti si aro-otuo no, inọ o te gbẹ jọ vievie he. Whọ sai je kporo ividio “Ababọ Riẹ, Mẹ Hae te Riẹ Oware Ovo Ho,” onọ o rrọ jw.org/iso kẹe, onọ ọzae otuaro jọ o jo gbiku erere nọ o wo fikinọ a ru Ebaibol na fihọ oghẹrẹ nọ ahwo ituaro a re ro sei. Whọ tẹ ta oware nọ o wọ owhẹ nya vevẹ, o sai ru nọ a re ro dhesẹ ohwo nọ o tuaro kẹ owhẹ.
4. Eme iku Janet na i wuhrẹ omai?
4 Oniọvo-ọmọtẹ jọ nọ o tuaro nọ a re se Janet o kpohọ uwou ulogbo jọ nọ ahwo jọ nọ i tuaro a be rria. O te mu ẹme họ kugbe uvovo aye jọ. Janet ọ tẹ vuẹe nọ, “Jesu o siwi ahwo nọ i tuaro ro dhesẹ oware nọ o ti ru kẹ ituaro evaọ obaro.” A te se Eviavia 21:3, 4 kugbe, ọ tẹ vuẹe nọ evaọ Uvie Ọghẹnẹ eyaa nana i ti jo rugba. Aye na ọ tẹ fọ tao, kẹsena ọ tẹ ta nọ: “Me ri yo ẹme utiona no unu ohwo nọ o tuaro ze ẹdẹvo ho. Ahwo buobu nọ e be ruẹ ude a re roro nọ ahwo nọ i tuaro hayo esẹ anwae rai a ru oware jọ thọ fikioye a ro tuaro.” Janet o te vi e-mail oghẹrẹ nọ ọ rẹ rọ ruẹ obe Ebaibol Wuhrẹ na sei, yọ enẹna a bi wuhrẹ iẹe kugbe isiava ẹkpoka.
5. Dede nọ ma sai rovie aro enọ i tu hu wọhọ epanọ Jesu o ru, eme o rẹ sai no ohrọ gbe isiuru nọ ma re dhesẹ kẹ ae ze?
5 Uzẹme nọ ma sai siwi ahwo nọ i tuaro ho wọhọ epanọ Jesu o ru, ghele na ma sai fiobọhọ kẹ ahwo nọ ọghẹnẹ uyero-akpọ nana o wuhu iroro rai di no, te enọ i tuaro re a wo otoriẹ uzẹme Ẹme Ọghẹnẹ. (2 Kọr. 4:4) Jesu o rovie aro ezae ivẹ nọ e jọ kẹle Jeriko keme “ohrọ rai” o re riẹ. (Mat. 20:34) Ma tẹ rọ aro kele Jesu dhesẹ ohrọ kẹ enọ i tuaro, ma te daoma fiobọhọ kẹ ahwo jọ nọ i tuaro wuhrẹ kpahe Jihova, ọnọ o ti si aro-otuo no bẹdẹ bẹdẹ.