Oghẹrẹ nọ Ma rẹ Rehọ Ebe nọ A Se Do Via Ruiruo
1. U te no ebe nọ a rẹ sai se no, eme ọfa ma wo nọ i re fiobọhọ kẹ omai?
1 O rẹ were ahwo buobu re a jọ jw.org/iso se eme uzẹme nọ e rrọ gbagba nọ e rẹ were oma. (Ọtausi. 12:10) U te no ebe mai nọ a rẹ sai se no, kọ whọ be hae rehọ enọ a se do via na kẹ omara? Ẹkwoma enana ahwo a be rọ gaviezọ kẹ eware buobu nọ e rrọ oria evuẹ itanẹte mai na. Didi erere ma rẹ sai wo no ebe mai nọ a se do via na ze?
2. Ẹvẹ ma sae rọ rehọ ebe mai nọ a se do via na ru uwuhrẹ omobọ mai hayo orọ uviuwou mai?
2 Rọkẹ Uwuhrẹ Omobọ Mai Hayo Orọ Uviuwou Mai: Nọ ma tẹ be hae gaviezọ kẹ Ebaibol, emagazini, hayo ebe mai efa nọ a se do via evaọ okenọ ma bi kpohọ erẹ hayo bi ru eware efa, u re fiobọhọ kẹ omai rọ oke mai ruiruo ziezi. (Ẹf. 5:15, 16) Ma sai ru egagọ uviuwou mai were ziezi nọ ma tẹ be hae gaviezọ kẹ ikporakporo obe mai jọ nọ a se do via yọ ma kru obe na họ obọ bi rri lele isase na. Ma tẹ be gaviezọ kẹ ikporakporo ebe mai nọ a se do via evaọ etoke uwuhrẹ omobọ mai, u re fiobọhọ kẹ omai, maero nọ ma tẹ gwọlọ riẹ obe ese ziezi hayo wuhrẹ ẹvẹrẹ ọkpokpọ.
3. Amono ebe mai nọ a se do via na e te were evaọ ẹkwotọ ra?
3 Evaọ Usiuwoma Ota: Ebe mai nọ a se do via na e rẹ sae were ahwo nọ ma rẹ nyaku evaọ usiuwoma, nọ a rẹ ta nọ a wo uvẹ nọ a re ro se obe he. Hayo ma tẹ nyaku ahwo nọ a bi yo ẹvẹrẹ mai hi, a te gaviezọ kẹ omai otẹrọnọ ma kporo usi Uvie na kẹ ae evaọ “ẹvẹrẹ ẹwho” rai. (Iruẹru 2:6-8) Evaọ eria jọ, re a gaviezọ kẹ iku nọ a bi gbe yọ uruemu ẹwho rai. Wọhọ oriruo, u wo utu ahwo jọ nọ a re se Hmong nọ o rrọ uruemu ẹwho rai re a gbiku anwae kẹ izoge na, yọ eware nọ a yo e rẹ kake thọrọ ae ẹro ho. Evaọ Africa, ikuigbe e rẹ were ahwo buobu.
4. Enọ vẹ ma rẹ sae nọ omamai kpahe ahwo nọ a rrọ ẹkwotọ mai?
4 Evaọ ẹkwotọ usiuwoma ota ra, kọ u ti woma re who kporo ebe mai nọ a se do via kẹ ahwo nọ whọ be ta usiuwoma kẹ evaọ ẹvẹrẹ rai? Kọ whọ riẹ ohwo jọ nọ whọ rẹ sae rọ ifonu hayo ekọmputa vi ikporakporo ebe mai nọ a se do via na se? Kọ whọ sai fi ebe mai nọ a se do via họ idiski re whọ rehọ iẹe kẹ ohwo nọ whọ be ta usiuwoma kẹ, je ku obe na gbei rọ kẹe? Ma sae niyẹrẹ obe, ibroshọ, emagazini, hayo omobe-ovẹvẹ kpobi nọ ma rọ kẹ ahwo, te enọ a re se evaọ ifonu gbe ekọmputa, te enọ a se do via nọ a re kporo. A ru ebe mai nọ a se do via na re ma gaviezọ kẹ ae evaọ uwuhrẹ omobọ mai, ma vẹ jẹ rehọ ae kọ ibi Uvie na họ udu ahwo.—1 Kọr. 3:6.